ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារជំនាញ ពិនិត្យ​ការងារ​បង្កបង្កើនផល និងវាយតម្លៃផលប៉ះពាល់ និងការខូចខាត​ដោយទឹកជំនន់ នៅក្រុង និងស្រុកចំនួន៣ ក្នុងខេត្តស្ទឹងត្រែង

ចេញ​ផ្សាយ​ ៩ តុលា ២០២៥ 386

នៅរសៀលថ្ងៃទី៨ ខែតុលា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ បានបន្តដឹកនាំក្រុមការងារជំនាញ ជួបសំណេះសំណាល និងពិនិត្យការងារបង្កបង្កើនផលរបស់ប្រជាកសិករ និងវាយតម្លៃផលប៉ះពាល់ និងការខូចខាតដោយទឹកជំនន់ ដែលធ្វើឡើង​នៅ​ក្រុង​ស្ទឹងត្រែង ស្រុកសៀមបូក និងស្រុកថាឡាបរិវ៉ាត់ ក្នុងខេត្តស្ទឹងត្រែង។
ដំណើរបេសកកម្មចុះពិនិត្យនោះ មានការចូលរួមពី ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក យិន ច័ន្ទសុធី អគ្គ​នាយករងនៃអគ្គនាយកដ្ឋានកសិកម្ម មន្ត្រីបច្ចេកទេស មន្រ្តីមន្ទីរ​កសិកម្ម រុក្ខាប្រមាញ់ និងនេសាទខេត្តស្ទឹងត្រែង និងអាជ្ញាធរស្រុក-ឃុំ រួមជា​មួយ​ប្រជាកសិករនៅតំបន់នោះ។
នាឱកាសនោះ ឯកឧត្តម តូច ប៊ុនហួរ និងក្រុមការងារ បានចុះជួបជាមួយ​សមាជិក​សហគមន៍កសិកម្មអូរពងមាន់ (ភូមិរាជានុកូល១ សង្កាត់ស្ទឹងត្រែង ក្រុងស្ទឹងត្រែង) ដើម្បីស្វែងយល់ពីការថែទាំដំណាំ និងការប្រើប្រាស់ជីថ្នាំ​តាមលក្ខណៈបច្ចេកទេស។ ជាមួយគ្នានោះ ក្រុមការងារបានណែនាំឱ្យ​សហគមន៍ខិតខំស្វែងរកដៃគូវិនិយោគ (ឈ្មួញ) ឬរោងចក្រកែច្នៃក្នុងស្រុក ដើម្បីត្រៀមរៀបចំ កិច្ចសន្យាទិញ-លក់ គ្រាប់ស្វាយចន្ទីឱ្យបានច្បាស់លាស់ (អនុវត្តកសិកម្មតាមកិច្ចសន្យា) សម្រាប់រដូវកាលប្រមូលផលខាងមុខ។
ក្រុមការងារបានបន្តចុះទៅជួបសមាជិកសហគមន៍កសិកម្មស្រែក្រសាំង ស្ថិត​នៅឃុំស្រែក្រសាំង ស្រុកសៀមបូក ដើម្បីសិក្សាស្វែងយល់ពីការថែទាំ និង​ការប្រើប្រាស់ជីថ្នាំដំណាំ ព្រមទាំងណែនាំឱ្យសហគមន៍ពន្លឿនការស្វែងរក ដៃគូទិញ-លក់ ដើម្បីធានាទីផ្សារគ្រាប់ស្វាយចន្ទីក្នុងរដូវប្រមូលផល។ ជាមួយ​គ្នានោះតំណាងសហគមន៍ក៏បានស្នើសុំវគ្គបណ្តុះបណ្តាលបច្ចេកទេសបន្ថែមលើដំណាំស្វាយចន្ទី និងសុំឱ្យក្រសួងកសិកម្មពិនិត្យលទ្ធភាព​ក្នុងការបង្កើត​សហគមន៍កសិកម្មទំនើបស្វាយចន្ទី (តំបន់នេះមានផ្ទៃដីដំណាំស្វាយចន្ទី​ប្រមាណជាង ៤,០០០ហិកតា)។
នៅចុងបញ្ចប់នៃដំណើរបេសកកម្មនេះ ឯកឧត្តមរដ្ឋលេខាធិការ និងក្រុម​ការងារ​បាន​បន្តបេសកកម្មចុះទៅជួបកសិករដែលរងផលប៉ះពាល់​ដោយ​ទឹកជំនន់ និងធ្វើការពិនិត្យ វាយតម្លៃជាក់ស្តែងពីការខូចខាតលើដំណាំស្រូវ និងដំណាំរួមផ្សំនៅតាមទីតាំងមានដូចជា៖ ភូមិដំរីផុង ឃុំកោះសំពាយ ស្រុក​សៀមបូក ខេត្តស្ទឹងត្រែង និងភូមិស្រែឬស្សី ឃុំស្រែឬស្សី ស្រុកថាឡាបរិវ៉ាត់ ខេត្តស្ទឹងត្រែង៕