ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញជាអធិបតីភាពក្នុងពិធីសម្ពោធដាក់ឱ្យដំណើរការជណ្តើរត្រីជាផ្លូវការ នៅក្រុងច្បារមន ខេត្តកំពង់ស្ពឺ
ចេញផ្សាយ ១២ មីនា ២០២៦ 2446
នៅថ្ងៃទី១១ ខែមីនា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានអញ្ជើញជាអធិបតីភាព ក្នុងពិធីសម្ពោធដាក់ឱ្យដំណើរការជណ្តើរត្រីជាផ្លូវការ ស្ថិតនៅភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ។
ពិធីនេះមានការអញ្ជើញចូលរួមពីលោក សុង ហុង អនុប្រធានរដ្ឋបាលជលផល លោក ស្រ៊ុន ស្រន់ អភិបាលរងនៃគណៈអភិបាលខេត្តកំពង់ស្ពឺ លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ មន្ទីរជំនាញពាក់ព័ន្ធជុំវិញខេត្ត និងប្រជាពលរដ្ឋសរុបចំនួន១២០នាក់។
នាឱកាសនោះ ឯកឧត្តម ឃុន សាវឿន បានណែនាំឱ្យរដ្ឋបាលខេត្ត និងអាជ្ញាធរមូលដ្ឋានចូលរួមជួយថែរក្សា ការពារជណ្តើរត្រី សម្រាប់ជួយសម្រួលដល់ការបន្លាស់ទីរបស់ត្រី ដែលបានសាងសង់ឡើងនេះ និងជួយទប់ស្កាត់ការប្រើឧបករណ៍នេសាទខុសច្បាប់គ្រប់ប្រភេទ នៅក្នុងតំបន់ជណ្តើរត្រី ដើម្បីអភិរក្ស និងបង្កើនផលពូជត្រី ជាប្រយោជន៍សម្រាប់ប្រជាពលរដ្ឋក្នុងភូមិសាស្រ្តខេត្តកំពង់ស្ពឺ។
សូមជម្រាបជូនថា ជណ្តើរត្រីនេះ ត្រូវបានសាងសង់ឡើង ក្រោមការឧបត្ថម្ភគាំទ្រ ពីមជ្ឈមណ្ឌលអូស្ត្រាលីសម្រាប់ស្រាវជ្រាវកសិកម្មអន្តរជាតិ (ACIAR) ក្នុងភាពជាដៃគូជាមួយ Charles Sturt University នៃប្រទេសអូស្ត្រាលីតាមរយៈគម្រោងបច្ចេកវិទ្យាជលផល។
ជណ្តើរត្រីនេះជួយកាត់បន្ថយផលប៉ះពាល់អវិជ្ជមាននៃសំណង់ធារាសាស្ត្រលើប្រព័ន្ធអេកូឡូស៊ីទន្លេ រួមមាន៖ ការស្តារឡើងវិញ នូវការតភ្ជាប់តាមបណ្តោយទន្លេ ស្ទឹង។ អនុញ្ញាតឱ្យត្រី អាចធ្វើការផ្លាស់ទីឡើង និងចុះ រវាងផ្នែកខាងលើ និងខាងក្រោមទំនប់ កាត់បន្ថយការធ្លាក់ចុះនៃបរិមាណ និងជីវចម្រុះនៅក្នុងទន្លេ ស្ទឹង ជាពិសេសជួយជំរុញកំណើនសេដ្ឋកិច្ចប្រជាពលរដ្ឋមួយកម្រិតថែមទៀត តាមរយៈបង្កើនផលនេសាទ៕
