ឯកឧត្តមវេជ្ជបណ្ឌិត ជា សំណាង និងឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញដឹកនាំប្រជុំតម្រង់ទិសលើគោលការណ៍ណែនាំស្តីពីការសម្របសម្រួល និងសមាហរណកម្មវិស័យកសិកម្ម សុខាភិបាល អប់រំ ដើម្បីទទួលបានលទ្ធផលអាហារូបត្ថម្ភកាន់តែប្រសើរឡើង

ចេញ​ផ្សាយ​ ១ សីហា ២០២៥ 1821

នៅថ្ងៃទី៣១ កក្កដា និងថ្ងៃទី០១ សីហា ២០២៥ ឯកឧត្តមវេជ្ជបណ្ឌិត ជា សំណាង​ អនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំតម្រង់ទិសគម្រោងអន្តរវិស័យគំរូឈ្មោះថា «នវានុវត្តន៍ថ្មីសម្រាប់លទ្ធផលកាន់តែប្រសើរ ការធ្វើសមាហរណកម្មរវាងវិស័យកសិកម្ម សុខាភិបាល និងអប់រំ ដើម្បីផ្លាស់ប្តូរលទ្ធផលអាហារូបត្ថម្ភនៅកម្ពុជា» ហៅកាត់ថា «INAS» នៅសាលាខេត្តតាកែវ និងកំពត។

កិច្ចប្រជុំនេះមានការចូលរួមពី​ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ លោកស្រី គា សុភូ អភិបាលរងនៃគណៈអភិបាលខេត្តតាកែវ លោក សេង សិរីបុត្រ អភិបាលរងនៃគណ:អភិបាលខេត្តកំពត លោកស្រីវេជ្ជបណ្ឌិត ជា ម៉ារី ប្រធានកម្មវិធីជាតិអាហារូបត្ថម្ភ លោក ហ៊ូ ក្រើន នាយកអង្គការហេឡែន ខេលល័រ អន្តរជាតិកម្ពុជា មេឃុំ ប្រធានមណ្ឌលសុខភាព នាយកសាលាបឋមសិក្សា និងមន្ត្រីកសិកម្មឃុំ នៃឃុំពាក់ព័ន្ធ សរុប៩៧នាក់។

ឯកឧត្តមរដ្ឋលេខាធិការ បានគូសបញ្ជាក់ថា កិច្ចប្រជុំនេះ គឺជាជំហានដ៏សំខាន់មួយក្នុងការអនុវត្តគម្រោងអន្តរវិស័យគំរូ «INAS»  ដែលបច្ចុប្បន្នត្រូវបាននឹងកំពុងអនុវត្តនៅក្នុងឃុំចំនួន២៥​ ក្នុងខេត្តចំនួន៥ គឺតាកែវ កំពត កំពង់ឆ្នាំង កំពង់ធំ និងបន្ទាយមានជ័យ។ គម្រោងអន្តរវិស័យគំរូ​«INAS» មានគោលបំណងបង្ហាញពីគំរូសម្របសម្រួល និងធ្វើសមាហរណកម្មសកម្មភាពវិស័យកសិកម្ម សុខាភិបាល និងអប់រំ នៅថ្នាក់ឃុំ-សង្កាត់ដែលធ្វើឱ្យប្រសើរឡើងនូវលទ្ធផលអាហារូបត្ថម្ភសម្រាប់ស្ត្រីនិងកុមារ។

បើតាមឯកឧត្តមបណ្ឌិត យ៉ង សាំង កុមារ INAS ជាគម្រោងគំរូក្នុងការចូលរួមចំណែកការអភិវឌ្ឍន៍ធនធានមនុស្សរបស់ជាតិដោយផ្តោតលើសុខភាពម្តាយ និងកុមារអាយុក្រោម ៥ឆ្នាំ តាមរយៈការសហការរវាងសាលារៀន មណ្ឌលសុខភាពឃុំ និងមន្រ្តីកសិកម្មឃុំ ក្រោមការសម្របសម្រួលដោយរដ្ឋបាលឃុំ-សង្កាត់។

ជាមួយគ្នានេះ ឯកឧត្តមបានឱ្យដឹងទៀតថា មន្រ្តីកសិកម្មឃុំ​ ចូលរួមចំណែកយ៉ាងសំខាន់ លើការងាររបស់គម្រោងតាមរយៈការជំរុញកសិកម្មដែលគិតពីអាហារូបត្ថម្ភ ជាពិសេសក្នុងចំណោមគ្រួសារដែលមានកូនអាយុក្រោម៥ឆ្នាំ ក្នុងគោលបំណងរួម គឺកាត់បន្ថយអត្រាកុមារដែលក្រិន និងស្គមស្គាំង ដែលស្របគ្នាជាមួយយុទ្ធសាស្រ្តជាតិ​ ស្តីពីសន្តិសុខស្បៀង និងអាហារូបត្ថម្ភ ២០២៥-២០២៨។

សូមជម្រាបថា គម្រោងនេះ ក្រោមការសម្របសម្រួលដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល ក្រសួងអប់រំ យុវជន និងកីឡា និងរដ្ឋបាលថ្នាក់ក្រោមជាតិ ក្នុងកិច្ចសហការជាមួយអង្គការហេឡែន ខេលល័រ​ អន្តរជាតិ និងអង្គការដៃគូ ដោយអនុវត្តន៍ការងាររួមគ្នានៅឃុំគំរូចំនួន២៥ នៅខេត្តចំនួន៥ រួមមាន ខេត្តតាកែវ កំពត កំពង់ឆ្នាំង កំពង់ធំ និងខេត្តបន្ទាយមានជ័យ៕