ព័ត៌មានផ្សេងៗទៀត
ឯកឧត្តមសហប្រធានទាំង៣ អញ្ជេីញដឹកនាំកិច្ចប្រជុំកិច្ចប្រជុំលើកទី១២ ក្រុមការងារអន្តរក្រសួង (ត្រី-វិស័យ) កសិកម្ម-ទឹក-ជនបទ
ចេញផ្សាយ ២៦ កញ្ញា ២០២៥ 753
នៅថ្ងៃទី២៦ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និងឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ អញ្ជើញជាសហប្រធានដឹកនាំកិច្ចប្រជុំក្រុមការងារអន្តរក្រសួង (ត្រី-វិស័យ) កសិកម្ម-ទឹក-ជនបទ លើកទី១២ នៅទីស្ដីការក្រសួងធនធានទឹក និងឧតុនិយម ព្រមទាំងមានការអញ្ជើញចូលរួមពីក្រុមលេខាធិការដ្ឋាន និងសមាជិកក្រុមការងារត្រី-វិស័យអន្តរក្រសួងទាំងបី។
កិច្ចប្រជុំនេះ បានពិនិត្យវឌ្ឍនភាពការងារត្រី-វិស័យសម្រាប់ ខែកញ្ញា ឆ្នាំ២០២៥ និងផែនការសកម្មភាព ខែតុលា ឆ្នាំ២០២៥ របស់ក្រុមការងារតាមក្រសួងនីមួយៗ និងបានពិភាក្សា ឯកភាពគ្នាលើសកម្មភាពត្រូវអនុវត្តបន្តសម្រាប់សហគមន៍គោលដៅត្រី-វិស័យឆ្នាំ២០២៦ និងការត្រៀមរៀបចំសេចក្តីព្រាងផែនការ ៣ឆ្នាំរំកិល ២០២៦-២០២៨ និងផែនការប្រចាំឆ្នាំ២០២៦។
ជាលទ្ធផលនៃកិច្ចប្រជុំ ក្រុមការងារទាំង៣ក្រសួង បន្តធ្វើការរួមគ្នា និងជំរុញឱ្យលេខាធិការដ្ឋានក្រុមការងារត្រីវិស័យពង្រឹងការងារស្នូល ពន្លឿនការជ្រើសរើសទីប្រឹក្សា មានសមត្ថភាពជួយលើការងាររៀបចំសេចក្តីព្រាងផែនការ ៣ឆ្នាំរំកិល ២០២៦-២០២៨ និងផែនការប្រចាំឆ្នាំ២០២៦។ លេីសពីនេះ អង្គប្រជុំបានសម្រេចរៀបចំជាទម្រង់របាយការណ៍ភ្ជាប់មួយប្រព័ន្ធឌីជីថលដែលមានភាពងាយស្រួល និងឆាប់រហ័ស អាចចូលទៅពិនិត្យនិងបញ្ចូលព័ត៌មានបាន។
អង្គប្រជុំបានកំណត់យកថ្ងៃទី៣០ ខែតុលា ឆ្នាំ២០២៥ សម្រាប់កិច្ចប្រជុំក្រុមការងារត្រីវិស័យលើកទី១៣ នៅទីស្ដីការក្រសួងអភិវឌ្ឍន៍ជនបទ ដោយក្នុងនោះក្រុមការងារលេខាធិការដ្ឋាននឹងរៀបចំរបាយការណ៍រួមដើម្បីរាយការណ៍ពីវឌ្ឍនភាពការងារ និងគោរពស្នើសុំការឯកភាពពីឯកឧត្ដមរដ្ឋមន្រ្ដីក្រសួងទាំង៣ កំណត់យកថ្ងៃទី៤ ខែធ្នូ ឆ្នាំ២០២៥ សម្រាប់កិច្ចប្រជុំថ្នាក់រដ្ឋមន្រ្ដីនៅទីស្ដីការក្រសួងធនធានទឹក និងឧតុនិយម ផងដែរ៕
