ឯកឧត្ដមរដ្ឋលេខាធិការ តូច ប៊ុនហួរ និងឯកឧត្តមបណ្ឌិត យ៉ង សាំង កុមារ អញ្ជើញចូលរួមជាអធិបតីក្នុងពិធីបើកវគ្គបណ្ដុះបណ្ដាលដល់មន្រ្តីកសិកម្មឃុំទូទាំងប្រទេសស្ដីពីការគ្រប់គ្រងគ្រោះមហន្តរាយក្នុងវិស័យកសិកម្ម

ចេញ​ផ្សាយ​ ៥ កញ្ញា ២០២៥ 871

នៅថ្ងៃទី០៥ ខែកញ្ញា ឆ្នាំ២០២៥ ឯកឧត្ដម តូច ប៊ុនហួរ រួមជាមួយឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាអធិបតីក្នុងពិធីបើកវគ្គបណ្ដុះបណ្ដាលដល់មន្ត្រីកសិកម្មឃុំ ស្ដីពីការគ្រប់គ្រងគ្រោះមហន្តរាយក្នុងវិស័យកសិកម្ម នៅមន្ទីរកសិកម្ម រុក្ខាប្រមាញ់ និងនេសាទខេត្តតាកែវ។

ក្នុងពិធីនេះ មានការអញ្ជើញចូលរួមពីលោក ទុយ សុភក្រ អភិបាលរង នៃគណៈអភិបាលខេត្តតាកែវ លោកស្រី អាន ច័ន្ទសុភក្រ តំណាងអង្គការស្បៀងនិងកសិកម្មសហប្រជាជាតិ (FAO) លោក/លោកស្រីជាមន្រ្តីការិយាល័យកសិកម្ម ធនធានធម្មជាតិ និងបរិស្ថានស្រុកទាំង ១០ និងមន្រ្តីកសិកម្មឃុំ សរុបប្រមាណ ១០០នាក់។

វគ្គបណ្ដុះបណ្ដាលនេះ រៀបចំឡើងក្នុងគោលបំណងពង្រឹងសមត្ថភាពដល់មន្ត្រីកសិកម្មឃុំ លើការតាមដាន ប្រមូលទិន្នន័យ និងរាយការណ៍ពីគ្រោះមហន្តរាយនៅក្នុងឃុំគោលដៅ ជាពិសេស គឺផ្ដោតលើការកសាងសមត្ថភាពលើការគាំទ្រដល់កសិករក្នុងការត្រៀមបង្ការ និងបន្ធូរបន្ថយគ្រោះមហន្តរាយលើវិស័យកសិកម្ម។

ឆ្លៀតក្នុងឱកាសនេះ ឯកឧត្តមរដ្ឋលេខាធិការ ក៏បានណែនាំដល់មន្រ្តីកសិកម្មឃុំឱ្យយកចិត្តទុកដាក់ តាមដានជាប្រចាំនូវសភាពការណ៍នានាពាក់ព័ន្ធនឹងគ្រោះមហន្តរាយ ទឹកជំនន់ រាំងស្ងួត ជំងឺសត្វ សត្វល្អិតបំផ្លាញដំណាំ និងតម្លៃកសិផល។ល។ ដើម្បីរាយការណ៍ឱ្យបានទាន់ពេលវេលា សំដៅពង្រឹងអន្តរាគមន៍នានាដែលចាំបាច់ឱ្យកាន់តែមានប្រសិទ្ធផល និងប្រសិទ្ធភាពខ្ពស់។ ជាមួយគ្នានេះ ឯកឧត្ដមរដ្ឋលេខាធិការ ក៏បានសង្កត់ធ្ងន់លើតួនាទីរបស់មន្រ្តីកសិកម្មឃុំ ក្នុងការរាយការណ៍បញ្ហាប្រឈមនានាក្នុងមូលដ្ឋាន និងការចងក្រងទិន្នន័យកសិកម្មឱ្យបានជាក់លាក់។

សូមជម្រាបជូនថា វគ្គបណ្ដុះបណ្ដាលស្ដីពីការគ្រប់គ្រងគ្រោះមហន្តរាយក្នុងវិស័យកសិកម្មនេះ ទទួលបានការសហការឧបត្ថម្ភពីអង្គការស្បៀងនិងកសិកម្មសហប្រជាជាតិ ហើយគ្រោងនឹងរៀបចំឡើង សម្រាប់មន្រ្តីកសិកម្មទូទាំងប្រទេសចំនួន ១២២៨ រូប ក្នុង២៤ ខេត្ត៕