កិច្ចប្រជុំលើកទី៨ នៃគណៈកម្មការតម្រង់ទិស កម្មវិធីជំរុញកំណើនវិស័យជលផលប្រកបដោយចីរភាពនិងបរិយាបន្ន (ផ្នែកនេសាទ)

ចេញ​ផ្សាយ​ ០៣ ធ្នូ ២០២៤ 1446

នាព្រឹក ថ្ងៃទី០៣ ខែធ្នូ ឆ្នាំ២០២៤ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  រួមជាមួយលោក ឃុន អេវ៉ារ៉ាត តំណាងស្ថានទូតសហភាពអឺរ៉ុបប្រចាំកម្ពុជា ជាសហប្រធានគណៈកម្មការតម្រង់ទិស បានរួមគ្នាដឹកនាំកិច្ចប្រជុំគណៈកម្មការតម្រង់ទិសនៃ "កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន ផ្នែកនេសាទ" (CAPFISH-Capture) លើកទី៨  នៅសណ្ឋាគារកាំបូឌីយ៉ាណា រាជធានីភ្នំពេញ ដោយមានវត្តមានអ្នកចូលរួមសរុបចំនួន៥៤នាក់។

គោលបំណងនៃកិច្ចប្រជុំនេះគឺផ្ដោតសំខាន់ទៅលើការត្រួតពិនិត្យលទ្ធផលនិងសកម្មភាពដែលបានអនុវត្តក្នុងឆ្នាំ២០២៤ កន្លងមក ព្រមទាំងពិនិត្យនិងអនុម័តសម្រេចលើផែនការសកម្មភាព និងថវិកាសម្រាប់ឆ្នាំ២០២៥ ខាងមុខនេះ។

កម្មវិធីនេះត្រូវបាននិងកំពុងអនុវត្តដោយរដ្ឋបាលជលផល ដោយមានកិច្ចសហការនិងគាំទ្របច្ចេកទេសពីអង្គការ FAO, UNESCO,  UNIDO និងបណ្តាអង្គការ NGO
ចំនួន ៦ ផ្សេងទៀត រួមមានអង្គការ OXFAM, Aide et Action, WCS, Save the Children, Action Aid និង IUCN ។

ឆ្លៀតឱកាសនេះដែរ ឯកឧត្តម ហាស់ សារ៉េត បានថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ដែលបានជួយគាំទ្រថវិកាដ៏ច្រើនសន្ធឹកសន្ធាប់ សម្រាប់ការអនុវត្តកម្មវិធី CAPFISH-Program ដ៏មានសារៈសំខាន់ ដើម្បីជួយលើកស្ទួយសេដ្ឋកិច្ចជាតិ។

ឯកឧត្តមសហប្រធានក៏បានថ្លែងអំណរគុណដល់ក្រសួងសេដ្ឋកិច្ចនិងហិរញ្ញវត្ថុ ដែលបានជួយគាំទ្រនិងសហការជាមួយសហភាពអឺរ៉ុប ដើម្បីរៀបចំកម្មវិធី CAPFISH-Capture នេះដំណើរការបានដោយរលូនអស់រយៈពេល៥ឆ្នាំកន្លងមកនេះ។ ជាមួយគ្នានេះដែរ ឯកឧត្តមសហប្រធានក៏បានកោតសរសើរដល់ក្រុមការងារនៃរដ្ឋបាលជលផល ដែលបានខិតខំអនុវត្តកម្មវិធី CAPFISH-Capture នេះ ដោយបានសហការជាមួយក្រុមទីប្រឹក្សាបច្ចេកទេសជាតិ និងអន្តរជាតិ និងបណ្តាអង្គការនានា ទទួលបានជោគជ័យជាបន្តបន្ទាប់។

ឯកឧត្តម ហាស់ សារ៉េត ក៏បានជួយតម្រង់ទិស ចង្អុលបង្ហាញ និងបានលើកជាអនុសាសន៍ល្អៗមួយចំនួន ដើម្បីជំរុញការអនុវត្តសកម្មភាពកម្មវិធីនេះឱ្យកាន់តែមានប្រសិទ្ធភាពខ្ពស់ ដូចខាងក្រោម៖

• រៀបចំបញ្ចប់ផែនការគ្រប់គ្រងនិងអធិការកិច្ចជលផលទឹកសាបដើម្បីទទួលបានការអនុម័ត 
• បន្តការគ្រប់គ្រងនិងអភិរក្សធនធានជលផលតាមរយៈការបង្កើតជម្រកសិប្បនិម្មិត និងការការពារជម្រកជលផលសំខាន់ៗ និងការអនុវត្តផែនការគ្រប់គ្រងភ្លើងឆេះព្រៃលិចទឹក
• បន្តជម្រុញនិងពន្លឿនការអនុម័តច្បាប់ស្តីពីជលផលថ្មីឱ្យបានសម្រេចក្នុងដើមឆ្នាំ២០២៥នេះ ដើម្បីសម្រេចបានការកែទម្រង់ជលផល
• បន្តការអនុវត្តផែនការគ្រប់គ្រងនិងអធិការកិច្ចជលផលសមុទ្រ និងការប្រយុទ្ធប្រឆាំងការនេសាទខុសច្បាប់ គ្មានរបាយការណ៍ និងគ្មានការអនុញ្ញាត (IUU) ជាពិសេសការល្បាតទប់ស្កាត់បទល្មើសនេសាទសមុទ្រ
• បន្តការគាំទ្រដល់សហគមន៍នេសាទ និងសហគមន៍ស្រះជម្រកត្រី និងការជម្រុញសហគ្រប់គ្រងធនធានជលផល និងការលើកម្ពស់ជីវភាពប្រជាសហគមន៍នេសាទ
• បន្តជម្រុញការធ្វើឱ្យប្រសើរឡើងនូវការកែច្នៃធនធានជលផលដើម្បីទទួលបានការអនុញ្ញាតឱ្យនាំចូលទៅកាន់ទីផ្សារសហភាពអឺរ៉ុប និងទីផ្សារអន្តរជាតិ និង
• អនុវត្តការងារដែលនៅសេសសល់ឱ្យបានសម្រេចជោគជ័យក្នុងរយៈពេល១៣ខែខាងមុខនេះ មានជាអាទិភាពការចុះបញ្ជីនាវានេសាទ ការបំពាក់ប្រព័ន្ធតាមដាននាវានេសាទ VMS ការផ្តល់លិខិតអនុញ្ញាតឱ្យធ្វើអាជីវកម្មនេសាទ ការរៀបចំប្រព័ន្ធគ្រប់គ្រងព័ត៌មានជលផលឱ្យកាន់តែប្រសើរឡើង និងការធ្វើឱ្យសម្រេចបាននូវការនាំចេញផលិតផលជលផលទៅកាន់ទីផ្សារសហភាពអឺរ៉ុប។

ជាទីបញ្ចប់ ឯកឧត្តម ហាស់ សារ៉េត បានស្នើសុំតំណាងស្ថានទូតសហភាពអឺរ៉ុបប្រចាំកម្ពុជា បន្តជួយគាំទ្រកម្មវិធីនេះនៅវគ្គទី២ នាពេលខាងមុខទៀត។