ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ និងឯកឧត្តម គីម រិទ្ធី អញ្ជើញជាអធិបតីភាពក្នុងកិច្ចប្រជុំ «បូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦» របស់មន្ទីរកសិកម្មខេត្តព្រះវិហារ
ចេញផ្សាយ ១៣ កុម្ភៈ ២០២៦ 2797
នៅថ្ងៃទី១៣ ខែកុម្ភៈ ឆ្នាំ២០២៦ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ បានអញ្ជើញជាអធិបតីភាពក្នុងកិច្ចប្រជុំ «បូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦» របស់មន្ទីរកសិកម្មខេត្តព្រះវិហារ។
កិច្ចប្រជុំដែលធ្វើឡើង នៅមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ មានការចូលរួមថ្នាក់ដឹកនាំមន្រ្តីមន្ទីរកសិកម្មខេត្តព្រះវិហារ ព្រមទាំងថ្នាក់ដឹកនាំក្រោមឱវាទក្រសួងកសិកម្ម អាជ្ញាធរមូលដ្ឋាន មន្រ្តីកសិកម្មឃុំ-សង្កាត់ និងមន្រ្តីជំនាញពាក់ព័ន្ធជាច្រើនរូបទៀត។
គោលបំណងនៃកិច្ចប្រជុំ ដើម្បីបង្ហាញពីសមិទ្ធផលការងារ ដែលបានបំពេញក្នុងឆ្នាំ២០២៥ យកមកឆ្លុះបញ្ចាំងអំពីបទពិសោធន បង្ហាញនូវបញ្ហាប្រឈមនានា និងកាលានុវត្តភាពថ្មី ដើម្បីរិះរកវិធានការដោះស្រាយ និងកំណត់បណ្តាសកម្មភាពជាឤទិភាព ឈានឆ្ពោះទៅរកការអភិវឌ្ឍវិស័យកសិកម្ម ឱ្យរីកចម្រើនស្របតាមគោលនយោបាយកែទម្រង់ស៊ីជម្រៅរបស់រាជរដ្ឋាភិបាល។
នាឱកាសនោះ ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា ក្នុងចំណោមទិសដៅសំខាន់ៗ នៃការពង្រឹង និងពង្រីកផលិតកម្មស្រូវអង្ករសរីរាង្គ ពូជសុទ្ធផ្ការំដួលខេត្តព្រះវិហារ មានសារៈសំខាន់ណាស់សម្រាប់ការនាំចេញ និងសម្រាប់ផ្គត់ផ្គង់ទីផ្សារក្នុងស្រុក ដែលជាចំណុចអាទិភាពមួយ នៅក្នុងខេត្តដែលត្រូវយកចិត្តទុកដាក់៕
