ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម អញ្ជើញបិទវគ្គបណ្តុះបណ្តាលដល់មន្ត្រីកសិកម្មឃុំនៅខេត្តព្រះវិហារ

ចេញ​ផ្សាយ​ ២៣ ឧសភា ២០២៤ 2065

នៅថ្ងៃទី២០ ខែឧសភា ឆ្នាំ២០២៤នេះ ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញបិទវគ្គបណ្តុះបណ្តាលដល់មន្ត្រីកសិកម្មឃុំនៅមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ដោយផ្តោតលើកសិកម្មស្តង់ដារសរីរាង្គ ខ្សែច្រវាក់តម្លៃ បច្ចេកទេសផ្សព្វផ្សាយកសិកម្ម អេកូឡូស៊ី និងការសម្របសម្រួលសហគមន៍។

ថ្លែងក្នុងពិធីបិទវគ្គ ឯកឧត្តម ខាត់ សុធី បានវាយតម្លៃខ្ពស់លើខ្លឹមសារមេរៀន ដែលឆ្លើយតបនឹងស្ថានភាព ពីព្រោះខេត្តព្រះវិហារ ជាខេត្តដែលកសិករភាគច្រើនកំពុងតែអនុវត្តកសិកម្មសរីរាង្គនេះស្រាប់។ ឯកឧត្តមក៏បានលើកឡើងអំពីតួនាទីសំខាន់របស់មន្ត្រីកសិកម្មឃុំ ដែលត្រូវធ្វើការបម្រើប្រជាកសិករ ដែលត្រូវការការគាំទ្រផ្នែកបច្ចេកទេស និងទីផ្សារ ដោយគិតពីនិរន្តរភាពសេដ្ឋកិច្ច និងបរិស្ថាន។

បន្ថែមពីនេះ ឯកឧត្តមបានលើកទឹកចិត្តដល់មន្ត្រីកសិកម្មឃុំ ត្រូវសិក្សាអំពីវិធីសាស្រ្តប្រមូលទិន្នន័យកសិកម្ម ការវិភាគពីផលចំណេញ-ខាត របស់កសិករ ដើម្បីរកឱ្យឃើញបញ្ហា ទើបអាចជួយដល់កសិកម្មឱ្យទទួឡបានប្រាក់ចំណេញ។ ឯកឧត្តមក៏បានចង្អុលបង្ហាញ អំពីអត្ថប្រយោជន៍នៃការធ្វើកសិកម្មតាមបែបសមកាលកម្ម និងការបង្កើតសហគមន៍កសិកម្មទំនើប។

សូមបញ្ជាក់ថា វគ្គបណ្តុះបណ្តាលនេះមានរយ:ពេល៥ថ្ងៃ ចាប់ពីថ្ងៃទី១៦ ដល់ថ្ងៃទី២០ ឧសភា ឆ្នាំ២០២៤ ដោយមានការគាំទ្រពីគម្រោង WAT4CAM, CIRAD, AMRU RICE, SMP, CASDP, និង IBIS RICE៕