ព័ត៌មានផ្សេងៗទៀត
ឯកឧត្តមបណ្ឌិត ហ៊ាន វណ្ណហន ដឹកនាំក្រុមការងារ ចុះពិនិត្យប្រព័ន្ធធារាសាស្ត្រ និងកសិកម្មវៃឆ្លាត នៅស្រុកកោះញ៉ែក មណ្ឌលគិរី ក្នុងបេសកកម្មគាំទ្រគម្រោងកែលម្អសន្តិសុខទឹកកម្ពុជាលើកទី២
ចេញផ្សាយ ៧ ធ្នូ ២០២៥ 136
នាថ្ងៃទី៦ ខែធ្នូ ឆ្នាំ២០២៥ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងកែលម្អសន្តិសុខទឹកកម្ពុជា (CaWSIP-MAFF) បានដឹកនាំក្រុមការងារអនុវត្តគម្រោងចុះទស្សនកិច្ចដោយផ្ទាល់ ក្នុងបេសកកម្មគាំទ្រគម្រោងលើកទី២ របស់ធនាគារពិភពលោក នៅតំបន់គោលដៅអនុវត្ដគម្រោង ស្រុកកោះញ៉ែក ខេត្ដមណ្ឌលគិរី។
ដំណើរទស្សនកិច្ចនេះ មានការចូលរួមពីក្រុមការងារអនុវត្តគម្រោងនៃក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹកនិងឧតុនិយម ក្រុមបេសកកម្មរបស់ធនាគារពិភពលោក ព្រមទាំងមន្ត្រីអនុវត្តគម្រោងថា្នក់ខេត្តមណ្ឌលគិរី។
ក្រុមការងារបានជួបពិភាក្សាជាមួយអាជ្ញាធរមូលដ្ឋាន រួមមានរដ្ឋបាលឃុំស្រែហ៊ុយ តំណាងសហគមន៍កសិកម្ម សហគមន៍ព្រៃឈើ និងកសិករទទួលផលគម្រោង ស្ថិតក្នុងឃុំស្រែសង្គម និងឃុំស្រែហ៊ុយ។ កិច្ចពិភាក្សាបានផ្តោតលើព័ត៌មានចាំបាច់ជាច្រើន រួមមាន៖ ការវាយតម្លៃស្ថានភាពទំនប់មុន និងក្រោយសាងសង់ ការវាយតម្លៃសក្តានុពលដំណាំ និងស្ថានភាពសហគមន៍កសិកម្ម និងសហគមន៍ព្រៃឈើ។
បន្ទាប់ពីជំនួបពិភាក្សា ឯកឧត្ដមរដ្ឋលេខាធិការ ដោយមានការចូលរួមពីតំណាងធនាគារពិភពលោក (CO-TTL) ក្រុមការងារអនុវត្ដគម្រោងនៃក្រសួងទាំងពីរ និងមន្ត្រីកសិកម្មឃុំ បានបន្ដចុះពិនិត្យអាងស្តុកទឹក ទ្វារទឹក និងស្ថានភាពផលិតកម្មកសិកម្មជាក់ស្ដែង។ ជាពិសេស ក្រុមការងារបានចុះដល់ទីតាំងចំនួន ៤កន្លែង ដែលនឹងក្លាយជាគំរូសម្រាប់ការជំរុញ កសិកម្មឆ្លាតវៃ រួមមាន ទីតាំងសាងសង់ ផ្ទះសំណាញ់ និង ឃ្លាំងប្រមូលផ្ដុំកសិផល នៅក្នុងតំបន់វិសាលភាពគម្រោងនៃឃុំទាំងពីរ៕
