ឯកឧត្ដម ហ៊ាន វណ្ណហន រដ្ឋលេខាធិការ ក្រសួងកសិកម្ម អញ្ជើញដឹកនាំក្រុមការងារត្រួតពិនិត្យវឌ្ឍនភាពការអនុវត្តគម្រោង ACSEP នៅខេត្ដព្រះវិហារ និងខេត្ដកំពង់ធំ

ចេញ​ផ្សាយ​ ៩ ឧសភា ២០២៤ 2434

នៅថ្ងៃទី០៨ ខែឧសភា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្ដម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ ឯកឧត្ដម ហ៊ាន វណ្ណហន រដ្ឋលេខាធិការ ក្រសួងកសិកម្ម និងជាសហប្រធានគណៈកម្មការដឹកនាំគម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម (Agricultural Value Chain Competitiveness and Safety Enhancement Project-ACSEP) បានអញ្ជើញដឹកនាំក្រុមការងារថ្នាក់ជាតិ ចុះត្រួតពិនិត្យវឌ្ឍនភាពការអនុវត្តគម្រោង ACSEP នៅខេត្ដព្រះវិហារ និងខេត្ដកំពង់ធំ ក្នុងចំណោមខេត្ដគោលដៅទាំង៦ របស់គម្រោង។

គោលបំណងនៃដំណើរចុះត្រួតពិនិត្យវឌ្ឍនភាព និងតម្រង់ទិសនេះ គឺដើម្បីពង្រឹងការងារបច្ចេកទេស ជាពិសេសផែនការអនុវត្តកម្មវិធីគម្រោងថ្នាក់ក្រោមជាតិ ដោយមានជំនួយពីក្រុមការងារគម្រោងថ្នាក់ជាតិ ក៏ដូចជាពិនិត្យស្ថានភាព ពិភាក្សាពីតម្រូវការ និងបញ្ហាប្រឈម។

នៅក្នុងបេសកកម្មនេះដែរ ឯកឧត្តមនិងក្រុមការងារបានជួបជាមួយអ្នកពាក់ព័ន្ធ ពិភាក្សាពីបទពិសោធ និងសមត្ថភាពក្រុមអ្នកទទួលផលគម្រោង ព្រមទាំងផ្តល់អនុសាសន៍ដល់មន្ទីរកសិកម្មខេត្ដគោលដៅ ក្រុមអ្នកទទួលផលគម្រោង និងផ្ដល់ព័ត៌មានពាក់ព័ន្ធសំខាន់ៗ។ 

ជាការកត់សម្គាល់ ឯកឧត្ដម ហ៊ាន វណ្ណហន និងក្រុមការងារអនុវត្ដគម្រោង បានចុះពិនិត្យស្ថានីយស្រាវជ្រាវអភិវឌ្ឍកសិកម្មកោះកេរ្ដិ៍  ក្រុមហ៊ុន Santana Agro Products Com.,Ltd ស្ថិតនៅក្នុងស្រុករវៀង ខេត្ដព្រះវិហារ និងរៀបចំកិច្ចប្រជុំពិនិត្យវឌ្ឍនភាព និងតម្រង់ទិសការអនុវត្ដគម្រោងនៅមន្ទីរកសិកម្ម រុក្ខាប្រមាញ់ និងនេសាទ ខេត្ដកំពង់ធំ។

សូមបញ្ជាក់ថា ខេត្ដគោលដៅនៃគម្រោង ACSEP រួមមាន៖ ខេត្តកំពង់ចាម កំពង់ធំ សៀមរាប ឧត្តរមានជ័យ ព្រះវិហារ និងខេត្តត្បូងឃ្មុំ ដែលធ្វើទៅលើការពង្រឹងខ្សែច្រវាក់ តម្លៃប្រកបដោយភាពប្រកួតប្រជែងសម្រាប់កសិផលដែលបានកំណត់ដូចជា៖ ដំឡូងមី ស្វាយ ស្វាយចន្ទី បន្លែ និងមាន់ពូជ ក្នុងស្រុក តាមរយ: ការសម្របសម្រួលឲ្យកសិ-សិប្បកម្ម និងសហគមន៍កសិកម្មទទួលបានឥណទាន ការលើកកម្ពស់ការតភ្ជាប់ទៅនឹងទីផ្សារប្រកបដោយស្ថិរភាពសម្រាប់កសិ-សិប្បកម្ម និងសហគមន៍កសិកម្ម និងធ្វើឲ្យប្រសើរឡើង នូវសុវត្ថិភាព និងគុណភាពម្ហូបអាហារ និង ការផ្សារភ្ជាប់ពីកសិដ្ឋានទៅទីផ្សារ។ គម្រោងនេះនឹងផ្តល់ប្រយោជន៍ដល់សហគមន៍កសិកម្មប្រមាណ ២៣០ (ប្រហែល ២៧ ០០០ គ្រួសារ) និងកសិ-ធុរកិច្ចប្រមាណ ៥០ នៅក្នុងតំបន់គោលដៅគម្រោង៕