ព័ត៌មានផ្សេងៗទៀត
កិច្ចប្រជុំពេញអង្គនៃអាជ្ញាធរជាតិប្រយុទ្ធនឹងជំងឺអេដស៍លេីកទី១ ឆ្នាំ២០២៦
ចេញផ្សាយ ២៥ មិថុនា ២០២៦ 2957
នៅថ្ងៃទី២៥ ខែមិថុនា ឆ្នាំ២០២៦ ឯកឧត្ដម ឡោ រស្មី អនុរដ្ឋលេខាធិការ និងជាអនុប្រធានគណ:កម្មាធិការប្រយុទ្ធនឹងជំងឺអេដស៍ប្រចាំក្រសួងកសិកម្ម រុក្ខាប្រមាញ់ និងនេសាទ បានអញ្ជេីញចូលរួមកិច្ចប្រជុំពេញអង្គនៃអាជ្ញាធរជាតិប្រយុទ្ធនឹងជំងឺអេដស៍លេីកទី១ ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដោយមានការចូលរួមពីតំណាងក្រសួង-ស្ថាប័ន អាជ្ញាធរថ្នាក់ក្រោមជាតិ និងតំណាងអង្គការជាតិ-អន្តរជាតិជាង១៨០នាក់។
ឯកឧត្ដមទេសរដ្ឋមន្រ្តីប្រធានអង្គប្រជុំបានវាយតម្លៃខ្ពស់ចំពោះការចូលរួមចំណែករបស់គ្រប់ក្រសួង-ស្ថាប័ន រដ្ឋបាលថ្នាក់ក្រោមជាតិ និងដៃគូពាក់ព័ន្ធទាំងអស់ ដែលបានរួមចំណែកជួយឱ្យកម្ពុជាសម្រេចបានគោលដៅ 95-95-95 មុនកាលកំណត់ និងត្រូវបានអង្គការ UNAIDS ប្រកាសទទួលស្គាល់ជាប្រទេសទី១ ក្នុងតំបន់អាស៊ី-ប៉ាស៊ីហ្វិកដែលសម្រេចបានគោលដៅនេះ ដែលឆ្លុះបញ្ចាំងឱ្យឃេីញនូវកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការជំរុញអនុវត្ត "ផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍លេីកទី៦ (២០២៤ - ២០២៨)" របស់កម្ពុជា។
ដោយឡែក ក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ ក្រោមការដឹកនាំរបស់ឯកឧត្ដមរដ្ឋមន្ត្រី ឌិត ទីណា ក្រុមការងារចូលរួមយ៉ាងសកម្មក្នុងការផ្សព្វផ្សាយដល់ថ្នាក់ដឹកនាំ និងមន្រ្តីរាជការគ្រប់អង្គភាព ក៏ដូចជានិស្សិតនៃគ្រឹះស្ថានឧត្តមសិក្សាកសិកម្មរបស់ក្រសួង និងសហគមន៍មូលដ្ឋាន អំពីការបង្ការ និងទប់ស្កាត់ការឆ្លងមេរោគអេដស៍ និងការមិនរើសអើងចំពោះអ្នកផ្ទុកមេរោគអេដស៍ ដោយសហការយ៉ាងជិតស្និទ្ធជាមួយអគ្គលេខាធិការដ្ឋានអាជ្ញាធរ។
ទន្ទឹមនឹងនេះ តាមរយៈកិច្ចប្រជុំក្រុមការងាររាជរដ្ឋាភិបាល និងវេទិកាសាធារណៈនានា ថ្នាក់ដឹកនាំ និងក្រុមការងារក្រសួងកសិកម្មរុក្ខាប្រមាញ់ និងនេសាទ ចូលរួមជួយផ្សព្វផ្សាយអំពីការទប់ស្កាត់ និងបង្ការការឆ្លងមេរោគអេដស៍ និងការមិនរេីសអេីងចំពោះអ្នកផ្ទុកមេរោគអេដស៍ ដល់អាជ្ញាធរស្រុក-ឃុំ-ភូមិ និងប្រជាពលរដ្ឋក្នុងបណ្តាខេត្តនានាផងដែរ ជាពិសេសខេត្តបន្ទាយមានជ័យ៕
