ឯកឧត្តមរដ្ឋលេខាធិការប្រចាំការ អ៊ឹម ស៊ីថុល បានចូលរួមជាអធិបតីក្នុងពិធីបើកសិក្ខាសាលាស្តីពីការផ្សព្វផ្សាយលិខិតបទដ្ឋានគតិយុត្ត និងសេចក្តីណែនាំអំពីបែបបទ នីតិវិធី ពាក់ព័ន្ធនឹងការផ្តល់សេវារដ្ឋបាលក្នុងវិស័យកសិកម្មនៅ រដ្ឋបាលរាជធានី ខេត្ត

ចេញ​ផ្សាយ​ ៣០ វិច្ឆិកា ២០២៤ 1113

នាព្រឹកថ្ងៃទី២៨ ខែវិច្ឆិកា ឆ្នាំ២០២៤ ឯកឧត្តម អ៊ឹម ស៊ីថុល រដ្ឋលេខាធិការប្រចាំការ និងជាអនុប្រធានប្រចាំការគណៈកម្មាធិការដឹកនាំការងារកំណែទម្រង់វិមជ្ឈការនិងវិសហមជ្ឈការរបស់ក្រសួងកសិកម្ម រុក្ខាប្រមាញ់ និងនេសាទ បានចូលរួមជាអធិបតីក្នុងពិធីបើកសិក្ខាសាលាស្តីពីការផ្សព្វផ្សាយលិខិតបទដ្ឋានគតិយុត្តនិងសេចក្តីណែនាំអំពីបែបបទ នីតិវិធី ពាក់ព័ន្ធនឹងការផ្តល់សេវារដ្ឋបាលក្នុងវិស័យកសិកម្មនៅរដ្ឋបាលរាជធានី ខេត្ត។

សិក្ខាសាលានេះ មានការចូលរួមពីថ្នាក់ដឹកនាំក្រសួង តំណាងអគ្គនាយកដ្ឋានរដ្ឋបាលនៃក្រសួងមហាផ្ទៃ តំណាងរដ្ឋបាលរាជធានី ខេត្ត ប្រធានអង្គភាពច្រកចេញចូលតែមួយរាជធានី ខេត្ត និងអង្គភាពជំនាញពាក់ព័ន្ធ សរុបប្រមាណ៨០រូប ដែលប្រព្រឹត្តទៅនៅភោជនីយដ្ឋានទន្លេបាសាក់២ រាជធានីភ្នំពេញ។

ថ្លែងក្នុងឱកាសនោះ ឯកឧត្តម អ៊ឹម ស៊ីថុល បានគូសបញ្ជាក់ពីសារៈសំខាន់នៃការរៀបចំសិក្ខាសាលានេះឡើង គឺដើម្បីផ្សព្វផ្សាយលិខិតបទដ្ឋានគតិយុត្តនិងសេចក្តីណែនាំអំពីបែបបទ នីតិវិធី និងពង្រឹងការផ្ដល់សេវារដ្ឋបាលពាក់ព័ន្ធនឹងវិស័យកសិកម្ម នៅរដ្ឋបាលថ្នាក់ក្រោមជាតិ ជូនប្រជាពលរដ្ឋប្រកបដោយប្រសិទ្ធភាព គណនេយ្យភាព តម្លាភាព និងឆាប់រហ័ស ស្របតាមបែបបទ និងនីតិវិធីជាធរមាន។ 

ឯកឧត្តមរដ្ឋលេខាធិកាប្រចាំការ ក៏ផ្ដល់អនុសាសន៍ដល់អង្គសិក្ខាសាលានិងអង្គភាពជំនាញពាក់ព័ន្ធ ដូចខាងក្រោម៖

១- អង្គភាពច្រកចេញចូលតែមួយនៃរដ្ឋបាលរាជធានី ខេត្ត ត្រូវបន្តអនុវត្តផ្តល់សេវារដ្ឋបាលក្នុងវិស័យកសិកម្មឱ្យបានខ្ជាប់ខ្ជួនតាមសេចក្តីណែនាំអន្តរក្រសួង៣២៧ សណន.កសក ចុះថ្ងៃទី១៤ ខែកញ្ញា ឆ្នាំ២០២១ រវាងក្រសួងកសិកម្ម រុក្ខាប្រមាញ់ និងនេសាទ និងក្រសួងមហាផ្ទៃ ស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលក្នុងវិស័យកសិកម្ម រុក្ខាប្រមាញ់ និងនេសាទនៅរដ្ឋបាលរាជធានី ខេត្ត ស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលក្នុងវិស័យកសិកម្ម រុក្ខាប្រមាញ់ និងនេសាទ។

២- អង្គភាពច្រកចេញចូលតែមួយនៃរដ្ឋបាលរាជធានី ខេត្ត ត្រូវបន្តផ្តល់របាយការណ៍ឱ្យបានទៀងទាត់រៀងរាល់ខែ ត្រីមាស ឆមាស នព្វមាស និងប្រចាំឆ្នាំពាក់ព័ន្ធនឹងការផ្តល់សេវារដ្ឋបាលលើវិស័យកសិកម្មនៅរដ្ឋបាលរាជធានី ខេត្ត ជូនក្រសួងកសិកម្ម រុក្ខាប្រមាញ់ និងនេសាទ។

៣- លេខាធិការដ្ឋានកំណែទម្រង់វិមជ្ឈការនិងវិសហមជ្ឈការនៃក្រសួងកសិកម្ម រុក្ខាប្រមាញ់ និងនេសាទ ត្រូវបន្តចុះគាំទ្របច្ចេកទេស ពិនិត្យ និងតាមដានជាប្រចាំលើមុខងារក្នុងវិស័យកសិកម្មដែលបានផ្ទេរឱ្យរដ្ឋបាលថ្នាក់ក្រោមជាតិ ដើម្បីឆ្លើយតបទៅនឹងកម្មវិធីកំណែទម្រង់វិមជ្ឈការនិងវិសហមជ្ឈការរបស់រាជរដ្ឋាភិបាលឱ្យទទួលបានប្រសិទ្ធភាពខ្ពស់។

៤- គ្រប់អង្គភាពពាក់ព័ន្ធក្រោមឱវាទក្រសួងកសិកម្ម រុក្ខាប្រមាញ់ និងនេសាទ និងមន្ទីរកសិកម្ម រុក្ខាប្រមាញ់ និងនេសាទរាជធានី ខេត្ត ត្រូវបន្តពង្រឹងកិច្ចសហប្រតិបត្តិការជាប្រចាំជាមួយរដ្ឋបាលថ្នាក់ក្រោមជាតិ ដើម្បីលើកកម្ពស់ប្រសិទ្ធភាពនៃការផ្តល់សេវាសាធារណៈ ស្របតាមច្បាប់និងលិខិតបទដ្ឋានគតិយុត្តជាធរមាន៕