ឯកឧត្តមរដ្ឋមន្ត្រី និងលោកសុខ រស់ អភិបាលរងខេត្ត និងសហការីបានអញ្ជើញមកពិនិត្យ ស្ថានីយពិសោធន៍កសិកម្មគោកត្រប់ ដែលមានទីតាំងនៅភូមិ ឃុំឈើទាល ស្រុកស្វាយជ្រុំ

ចេញ​ផ្សាយ​ ២៦ សីហា ២០១៩ 4628

-កម្មវិធីទី០៥: 
នេះជាកម្មវិធីចុងក្រោយនៃដំណើរបេសកកម្មរបស់ឯកឧត្តមរដ្ឋមន្រ្តី និងសហការីមកកាន់ខេត្ត ព្រៃវែង និងខេត្តស្វាយរៀងសម្រាប់រយ:ពេល ០២ថ្ងៃចាប់ពីថ្ងៃ២៤-២៥ ខែសីហា។ នៅរសៀលថ្ងៃនេះ ឯកឧត្តមរដ្ឋមន្ត្រី និងលោកសុខ រស់ អភិបាលរងខេត្ត និងសហការីបានអញ្ជើញមកពិនិត្យ ស្ថានីយពិសោធន៍កសិកម្មគោកត្រប់ ដែលមានទីតាំងនៅភូមិ ឃុំឈើទាល ស្រុកស្វាយជ្រុំ។

លោក យស់ គឹមសាន ប្រធានស្ថានីយបានរាយការណ៍ជូនឯកឧត្ដមរដ្ឋមន្ត្រីជ្រាបថាស្ថានីយមាន ផ្ទៃដីសរុប ១៩ហត ក្នុងនោះ ១៥ហតជាថ្នាលពិសោធន៍ និង ៤ហតទៀតសាងសង់អគាររដ្ឋបាល បណ្តុះបណ្តាល អគារស្នាក់នៅ និងឃ្លាំង។ ស្ថានីយមានតួនាទីសិក្សាស្រាវជ្រាវផលិតពូជស្រូវ ហើយនៅឆ្នាំ២០១៨ កន្លងមកស្ថានីយសហការផលិតពូជជាមួយសហគមន៍បាន ២៥តោន។

មានប្រសាសន៍សំណេះដំណាលជាមួយមន្រ្តី បុគ្គលិកស្ថាបននីយ ឯកឧត្តមរដ្ឋមន្ត្រីបានវាយតម្លៃ ខ្ពស់ចំពោះទឹកចិត្តខិតខំប្រឹងប្រែងរបស់ថ្នាក់ដឹកនាំ មន្រ្តី និងបុគ្គលិក កម្មករដែលបម្រើការនៅស្ថានីយទាំងអស់ ដែលមើលថែរក្សាបានគង់វង្ស និងអភិវឌ្ឍជាបណ្តើរៗ បើទោះបីមានចំណុចខ្វះខាតមួយចំនួនត្រូវធ្វើការកែលម្អ។ លោកបានបន្តថាស្ថានីយជាកន្លែងបណ្តុះបណ្តាល និងផ្សព្វផ្សាយបច្ចេកទេសកសិកម្មសម័យថ្មីជឿនលឿនដល់ប្រជាកសិករដូចជាស្រូវ ដំណាំ បន្លែ សត្វ និងត្រី បើដូច្នេះឯកឧត្តមរដ្ឋមន្ត្រីបានណែនាំឲ្យថ្នាក់ដឹកនាំ ក៏ដូចជាមន្រ្តីឲ្យខិតខំសិក្សាស្រាវជ្រាវបន្ថែមទៀត ដើម្បីប្រែក្លាយស្ថានីយនេះឲ្យទៅជាកន្លែងផលិតពូជស្រូវ និងដំណាំ ពិសេសបន្លែ ព្រមទាំងការប្រើប្រាស់គ្រឿងចក្រ ធានាដល់ការផ្តត់ផ្គង់ពូជដល់អ្នកផលិតក្នុងតំបន់នេះ។ មួយវិញទៀត ដើម្បីកែប្រែជីវភាព លោកបានណែនាំឲ្យមន្រ្តីគិតគូរពីការផលិតស្បៀងសម្រាប់ផ្គត់ផ្គង់ខ្លួនឯងផង និងលក់ផងតាមរយ:ការចិញ្ចឹមសត្វ ត្រី ដាំឈើហូបផ្លែ និងបន្លែ ចូរចាំថាក្នុងស្រែមានស្រូវ ក្នុងទឹកមានត្រី និងលើដីមានដំណាំ ទើបអាចកែប្រែជីវភាពរបស់មន្រ្តីយើងបានធូរធារ។