លោកជំទាវអនុរដ្ឋលេខាធិការ អ៊ឹម រចនា អញ្ជើញជួបសំណេះសំណាលជាមួយមន្ត្រីឆ្មាំទន្លេអភិរក្សសត្វផ្សោតកាំពី ខេត្តក្រចេះ

ចេញ​ផ្សាយ​ ២៨ កញ្ញា ២០២៤ 3081

នៅថ្ងៃទី២៦ ខែកញ្ញា ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក ផៃ សុម៉ានី អនុប្រធាននាយកដ្ឋានអភិរក្សជលផល នៃរដ្ឋបាលជលផល បានអញ្ជើញជួបសំណេះសំណាលជាមួយមន្ត្រីឆ្មាំទន្លេអភិរក្សសត្វផ្សោតកាំពី នៅប៉ុស្តិ៍ឆ្មាំទន្លេ ក្នុងភូមិសាស្ត្រស្រុកចិត្របុរី ខេត្តក្រចេះ។

នៅក្នុងអង្គពិធី លោក ម៉ុក ពន្លក នាយរងខណ្ឌរដ្ឋបាលជលផលក្រចេះ និងជាប្រធានឆ្មាំអភិរក្សសត្វផ្សោតទន្លេមេគង្គប្រចាំខេត្តក្រចេះ បានបង្ហាញរបាយការណ៍ អំពីការចុះបង្ក្រាបបទល្មើសនេសាទ នៅភូមិ   កាំពី ឃុំសំបុក ស្រុកចិត្របុរី ខេត្តក្រចេះ ក្នុងរយៈពេល ៩ខែ ឆ្នាំ២០២៤នេះ ដែលឆ្មាំទន្លេបង្ក្រាបបាន រួមមាន៖ ដកហូតមងចំនួន ២៧៣ ស្មើនឹងប្រវែង ១០ ៣២០ម៉ែត្រ សន្ទួចរនង ៦៤ខ្សែ ស្មើនឹងប្រវែង ៤ ៩០០ម៉ែត្រ ទូកម៉ាស៊ីនចំនួន ០៣គ្រឿង អាំងវ័កទ័រឆក់ត្រីចំនួន ០៤គ្រឿង អាគុយ ០៣គ្រឿង កន្ត្រងដងត្រី ០៤គូ ភ្ជាប់ដោយខ្សែភ្លើងចំនួន ៧០ម៉ែត្រ និងបានអប់រំអ្នកនេសាទចំនួន ៤១នាក់។

ថ្លែងទៅកាន់អង្គពិធី លោកជំទាវ អ៊ឹម រចនា បានពាំនាំនូវការសួរសុខទុក្ខ សេចក្ដីនឹករឭកពីសំណាក់ឯកឧត្តមរដ្ឋមន្ដ្រី ឌិត ទីណា ព្រមទាំងការថ្លែងអំណរគុណចំពោះឆ្មាំទន្លេចំនួន ៤៤រូប ដែលបានបំពេញភារកិច្ចអភិរក្សសត្វផ្សោតទន្លេមេគង្គ ដែលជារតនសម្បត្តិរបស់ជាតិ តាមរយៈការល្បាតចល័ត ២៤ម៉ោងលើ២៤ម៉ោង ជារៀងរាល់ថ្ងៃ។

ទន្ទឹមគ្នានេះ លោកជំទាវបានផ្ដល់អនុសាសន៍ណែនាំដល់ឆ្មាំទន្លេ ពង្រឹងនឹងពង្រីកកិច្ចសហការបន្ថែមទៀតក្នុងការចុះបង្ក្រាប បង្ការ និងទប់ស្កាត់បទល្មើសនេសាទនៅតំបន់អភិរក្សសត្វផ្សោត ដើម្បីការពារអាយុជីវិតរបស់សត្វផ្សោតផង និងធានានិរន្ដរភាពធនធានជលផលក្នុងតំបន់។ លោកជំទាវក៏បានរំឭកដល់ឆ្មាំទន្លេ រួមទាំងអាជ្ញាធរដែលពាក់ព័ន្ធទាំងអស់​ ​បង្កើនការប្រុងប្រយ័ត្នឱ្យបានខ្ពស់ក្នុងពេលចុះល្បាតនារដូវវស្សា។ រដូវវស្សាហ៍ដែលមានភ្លៀង ខ្យល់ព្យុះ និងខ្យល់កន្ត្រាក់កើតឡើងញឹកញាប់៕