ព័ត៌មានផ្សេងៗទៀត
ក្រុមការងារក្រសួងកសិកម្ម រុក្ខាប្រមាញ់ និងនេសាទ ប្រជុំត្រួតពិនិត្យវាយតម្លៃលទ្ធផលការងារ និងពិភាក្សាលេីផែនការយុទ្ធសាស្ត្រស្ដីពីការប្រយុទ្ធប្រឆាំងគ្រឿងញៀនឆ្នាំ២០២៤-២០២៨
ចេញផ្សាយ ២៧ វិច្ឆិកា ២០២៥ 1962
នៅថ្ងៃទី២៦ ខែវិច្ឆិកា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការ និងជាប្រធានក្រុមការងារផ្សព្វផ្សាយ អប់រំ បង្ការ ទប់ស្កាត់ ការប្រើប្រាស់ និងជួញដូរគ្រឿងញៀនប្រចាំក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំដេីម្បីពិនិត្យ និងវាយតម្លៃលទ្ធផលការងារដែលបានអនុវត្ត និងពិភាក្សាផែនការយុទ្ធសាស្ត្រស្ដីពីការប្រយុទ្ធប្រឆាំងគ្រឿងញៀនឆ្នាំ២០២៤-២០២៨ ដែលអាជ្ញាធរជាតិប្រយុទ្ធប្រឆាំង (អ.ជ.ប.គ.ញ) ទេីបបានដាក់ចេញកាលពីពេលថ្មីៗនេះ។
ឯកឧត្តមមានប្រសាសន៍ថា ក្រោមការដឹកនាំរបស់ឯកឧត្តមរដ្ឋមន្ត្រី ឌិត ទីណា ក្រសួងកសិកម្ម រុក្ខាប្រមាញ់ និងនេសាទ បាននិងកំពុងចូលរួមអនុវត្តការងារយ៉ាងសកម្មគ្រប់ចំណុចពាក់ព័ន្ធដែលមានចែងក្នុងផែនការយុទ្ធសាស្ត្រថ្មីនេះ ជាពិសេសការគ្រប់គ្រងសារធាតុគីមីផ្សំ, ការអប់រំផ្សព្វផ្សាយអំពីគ្រោះថ្នាក់នៃគ្រឿងញៀន និងការធ្វេីតេស្តទឹកមូត្ររកសារធាតុញៀនដេីម្បីធានាបាននូវភាពស្អាតស្អំរបស់មន្ត្រីរាជការគ្រប់លំដាប់ថ្នាក់ ស្របតាមបទបញ្ជា០១ បប របស់រាជរដ្ឋាភិបាល និងសេចក្តីណែនាំលេខ០០១ សណន អ.ជ.ប.គ.ញ របស់អាជ្ញាធរជាតិប្រយុទ្ធប្រឆាំងគ្រឿងញៀន។
ឯកឧត្តមបានកោតសរសេីរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គភាពទាំងអស់ ក្នុងការចូលរួមអនុវត្តការងារយ៉ាងសកម្មផុលផុស និងលេីកទឹកចិត្តថ្នាក់ដឹកនាំគ្រប់អង្គភាពឱ្យបន្តយកចិត្តទុកដាក់អនុវត្តការងារឱ្យកាន់តែល្អប្រសេីរ។ ឯកឧត្តមរដ្ឋលេខាធិការក៏បានលេីកឡេីងផងដែរពីទំនាក់ទំនង និងកិច្ចសហការល្អប្រសេីរជាមួយអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន ដែលជាមូលដ្ឋានដ៏រឹងមាំក្នុងការជំរុញអនុវត្តការងារផ្សព្វផ្សាយ អប់រំ បង្ការ ទប់ស្កាត់ ការប្រើប្រាស់ និងជួញដូរគ្រឿងញៀន៕
