ឯកឧត្តមរដ្ឋលេខាធិការ ចាន់ សុវុឌ្ឍ អញ្ជើញជាអធិបតីក្នុងកម្មវិធីបើកបវេសកាលឆ្នាំសិក្សា ២០២៤-២០២៥ នៅវិទ្យាស្ថានជាតិកសិកម្មព្រែកលៀប

ចេញ​ផ្សាយ​ ១៨ ធ្នូ ២០២៤ 821

នៅព្រឹកថ្ងៃទី១៨ ខែធ្នូ ឆ្នាំ២០២៤ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញជាអធិបតីក្នុងកម្មវិធីបើកបវេសកាលឆ្នាំសិក្សា ២០២៤-២០២៥ ថ្នាក់បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង នៅវិទ្យាស្ថានជាតិកសិកម្មព្រែកលៀប។

ថ្លែងទៅកាន់អង្គពិធី ឯកឧត្តមរដ្ឋលេខាធិការបានថ្លែងអំណរគុណដល់ឯកឧត្តម ឌិត ទីណា រដ្ឋមន្ត្រីក្រសួងកសិម្ម រុក្ខាប្រមាញ់ និងនេសាទ ព្រមទាំងថ្នាក់ដឹកនាំគ្រប់អង្គភាពចំណុះក្រសួង សាស្រ្តាចារ្យ លោកគ្រូ អ្នកគ្រូ និងក្មួយៗនិស្សិតទាំងអស់ដែលមានវត្តមាននាពេលនេះ ដែលជាការផ្សារភ្ជាប់នូវមនោសញ្ចេតនាយ៉ាងជិតស្និទ្ធរវាងថ្នាក់ដឹកនាំក្រសួង លោកគ្រូ អ្នកគ្រូ និងនិស្សិតទាំងអស់។

ទន្ទឹមនឹងនេះ ឯកឧត្តមរដ្ឋលេខាធិការ បានកោតសរសើរ​ និងវាយតម្លៃខ្ពស់ចំពោះថ្នាក់ដឹកនាំ​ មន្រ្តីរាជការ និងសាស្រ្តាចារ្យនៃវិទ្យាស្ថានជាតិកសិកម្មព្រែកលៀបទាំងអស់ ដែលបានខិតខំបំពេញតួនាទីភារកិច្ច​ ប្រកបដោយស្មារតីទទួលខុសត្រូវខ្ពស់​ និងសម្រេចបានលទ្ធផលគួរឱ្យកត់សម្គាល់​ក្នុងការបណ្តុះបណ្តាល​ និងផ្ទេរចំណេះដឹង​ ដេីម្បីចូលរួមកសាងធនធានមនុស្សដ៏រឹងមាំសម្រាប់សង្គមជាតិទាំងមូល។

លេីសពីនេះ​ ឯកឧត្តមរដ្ឋលេខាធិការ​ បានកោតសរសេីរដល់បណ្តាអង្គការជាតិ អន្តរជាតិ សាកលវិទ្យាល័យនានា និងស្ថាប័នផ្តល់ជំនួយផ្សេងៗ ដែលបានយកចិត្តទុកដាក់ជួយជ្រោមជ្រែងធ្វើឱ្យវិទ្យាស្ថានជាតិកសិកម្មព្រែកលៀប មានលទ្ធភាពធ្វើការងារបណ្តុះបណ្តាលធនធានមនុស្សក្នុងវិស័យកសិកម្ម និងវិស័យពាក់ព័ន្ធរហូតដល់ពេលនេះ ប្រកបដោយគុណភាពខ្ពស់​ និងបានចូលរួមចំណែកបម្រើការងារក្នុងវិស័យរដ្ឋ ឯកជន ជាតិ និងអន្តរជាតិ និងអង្គការអភិវឌ្ឍន៍នានា។

បេីតាម​ ឯកឧត្តមរដ្ឋលេខាធិការ​ វិទ្យាស្ថានជាតិកសិកម្មព្រែកលៀប​ បាននឹងកំពុងខិតខំប្រឹងប្រែងអភិវឌ្ឍន៍ខ្លួនជាបណ្តើរៗ ដើម្បីឱ្យសមស្របទៅគោលនយោបាយយុទ្ធសាស្រ្តរបស់រាជរដ្ឋាភិបាលត្រឹមឆ្នាំ២០៣០ ប្រទេសកម្ពុជានឹងមានចំណូលមធ្យមកម្រិតខ្ពស់ និងចំណូលខ្ពស់នៅឆ្នាំ២០៥០។

សូមជម្រាបថា ក្នុងឆ្នាំសិក្សា២០២៤-២០២៥ វិទ្យាស្ថានមាននិស្សិតសរុបទាំងអស់ចំនួន ១ ២៥៨នាក់ ក្នុងចំណោមនេះមាននិស្សិតចុះឈ្មោះថ្មីសម្រាប់ថ្នាក់មូលដ្ឋានមានចំនួន៣២៣នាក់ ដែលចែកចេញជា និទ្ទេសAចំនួន០២នាក់ និងនិទ្ទេសB ចំនួន៤៣នាក់៕