ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម អញ្ជើញចូលរួមពិធីសម្ពោធកម្មវិធី ស៊េរីពិព័រណ៍កម្ពុជាឆ្នាំ២០២៦
ចេញផ្សាយ ២៦ សីហា ២០២៦ 2928
នាព្រឹកថ្ងៃទី២៦ ខែសីហា ឆ្នាំ២០២៦ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមពិធីសម្ពោធកម្មវិធី ស៊េរីពិព័រណ៍កម្ពុជាឆ្នាំ២០២៦ (Cambodia Expo Series 2026) ក្រោមអធិបតីភាព ឯកឧត្តម នរ៉ាណាឬទ្ធិ អានន្ទដាយ៉ាត រដ្ឋមន្រ្តីប្រតិភូអមនាយករដ្ឋមន្រ្តី និងឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម ក្នុងគោលបំណងប្រមូលផ្តុំប្រភពផ្គត់ផ្គង់ និងការផ្គូផ្គង់ធុរកិច្ច គ្របដណ្តប់លើវិស័យសំខាន់ៗដូចជា៖ កសិកម្ម បសុសត្វ វារីវប្បកម្ម អាហារនិងភេសជ្ជៈ សុខាភិបាល ឱសថ សម្រស់ គ្រឿងបរិក្ខារ និងសត្វចិញ្ចឹម។
ថ្លែងទៅកាន់អង្គពិធី ឯកឧត្តម គី ច័ន្ទរំដួល បានសម្តែងការស្វាគមន៍យ៉ាងកក់ក្តៅ និងបានពាំនាំនូវការសួរសុខទុក្ខពីសំណាក់ ឯកឧត្តមរដ្ឋមន្ត្រី ឌិត ទីណា ព្រមទាំងបានលើកឡើងពីគោលនយោបាយអាទិភាពទី៥ និងទី៦ ក្នុងការរក្សាលំនឹងថ្លៃកសិផល ការដាក់ពង្រាយមន្រ្តីកសិកម្មឃុំ និងការកសាងសហគមន៍កសិកម្មទំនើប ដែលជាត្រីវិស័យមួយដើម្បីសម្រេចឱ្យប្រជាពលរដ្ឋ "មានហូប មានប្រើ មានបាន និងមានរហូត" ពោលគឺធានាបានទាំងស្រុងនូវសន្តិសុខស្បៀង និងនិរន្តរសេដ្ឋកិច្ច និងបរិស្ថាន។
ឯកឧត្តម គី ច័ន្ទរំដួល បានបន្ថែមថាក្រោមការដឹកនាំប្រកបដោយគិតបណ្ឌិត និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ចាត់ទុកវិស័យកសិកម្ម ជាសសរស្តម្ភយុទ្ធសាស្រ្តស្នូលមួយដែលមិនអាចខ្វះបាន ហេីយសហគមន៍កសិកម្មទំនើប បានដើរតួនាទីសំខាន់ដើម្បីជំរុញឱ្យប្រជាពលរដ្ឋបង្កើនប្រាក់ចំណូល មានសេដ្ឋកិច្ចមាត្រដ្ឋាននិងប្រសិទ្ធភាពសេដ្ឋកិច្ច ធានាបានទាំងគុណភាពនិងបរិមាណ ក្នុងគោលដៅតភ្ជាប់ទៅកាន់ទីផ្សារ មានទុនគ្រប់គ្រាន់ បច្ចេកទេស និងមានប្រព័ន្ធគ្រប់គ្រងច្បាស់លាស់។
ជាទីបញ្ចប់ ឯកឧត្តម គី ច័ន្ទរំដួល បានសង្កត់ធ្ងន់ថា "ពេលវេលានេះ គឺជាឱកាសដ៏ស័ក្តិសមបំផុត ក្នុងការបណ្តាក់ទុននៅកម្ពុជា" និងលើកទឹកចិត្តដល់វិនិយោគិនក្នុងស្រុក និងបរទេសបង្កើនការវិនិយោគ ជាមួយនឹងកសិផលសក្កានុពលជាច្រើនប្រភេទ និងច្បាប់ស្តីពីការវិនិយោគថ្មី ដែលផ្តល់នូវការលើកទឹកចិត្តជាអតិបរមា ភាពបត់បែន និងធានាបាននូវបរិយាកាសធុរកិច្ចប្រកបដោយតម្លាភាព៕
