ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន អញ្ជើញចុះជួបសំណេះសំណាល និងពិនិត្យសក្តានុពល រួមគ្នាជួយលើកកម្ពស់សមត្ថភាពសហគមន៍កសិកម្មទំនើបកោះខ្សាច់ទន្លា ក្រោមកិច្ចអន្តរាគមន៍អន្តរវិស័យកសិកម្ម-ទឹក-ជនបទ

ចេញ​ផ្សាយ​ ២០ តុលា ២០២៥ 1076

នៅថ្ងៃទី២០ ខែតុលា ឆ្នាំ២០២៥ សហប្រធានទាំង៣រូប នៃក្រុមការងារត្រី-វិស័យ មានឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និងឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ រួមនឹងឯកឧត្ដម ឃឹម ហ្វីណង់ អនុរដ្ឋលេខាធិការ និងសមាជិកអចិន្រ្ដៃយ៍ សមាជិកក្រុមការងារត្រី-វិស័យ និងក្រុមលេខាធិការដ្ឋានអន្តរក្រសួងទាំងបី បានអញ្ជើញចុះជួបប្រជុំពិភាក្សាជាមួយប្រធាន អនុប្រធាន សមាជិកសមាជិកា សហគមន៍កសិកម្មទំនើបបន្លែសុវត្ថិភាពកោះខ្សាច់ទន្លាស្ថិតនៅឃុំកោះខ្សាច់ទន្លា ស្រុកស្អាង ខេត្តកណ្ដាល ក្នុងក្របខណ្ឌត្រីវិស័យ និងគម្រោង CASDP។  
នាឱកាសនេះ ឯកឧត្តមបណ្ឌិត បានគូសបញ្ជាក់ថា ដោយមានការយកចិត្តទុកដាក់ដ៏ខ្ពង់ខ្ពស់ពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តាមរយៈឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និង នេសាទ ឯកឧត្តម លោកជំទាវ លោក លោកស្រីមកពីក្រសួង មន្ទីរ រួមជាមួយរដ្ឋបាលខេត្ត រដ្ឋបាលស្រុក រដ្ឋបាលឃុំ បានចុះពិនិត្យផ្សព្វផ្សាយចងក្រងរៀបចំបង្កើតជាសហគមន៍កសិកម្មទំនើប ដែលទទួលបានការឧបត្ថម្ភគាំទ្រ របស់កម្មវិធី ASPIRE-AT នៃក្រសួងកសិកម្ម រុក្ខាប្រមាញ់ និងនេសាទ។
ជាមួយគ្នានេះ ឯកឧត្តមបណ្ឌិត បានឱ្យដឹងថា ក្រោមការជ្រោមជ្រែងគាំទ្រពីក្រសួងកសិកម្ម មហាសន្និបាតលើកដំបូង របស់សហគមន៍កសិកម្មទំនើបបន្លែសុវត្ថិភាពកោះខ្សាច់ទន្លា បានធ្វើឡើងនៅថ្ងៃទី៩ ខែសីហា ឆ្នាំ២០២៤ ព្រមទាំងមានការចេញវិញ្ញាបនបត្របញ្ជាក់ការចុះបញ្ជីសហគមន៍កសិកម្មទំនើបបន្លែសុវត្ថិភាពកោះខ្សាច់ទន្លា នៅថ្ងៃទី៣០ ខែសីហា ឆ្នាំ២០២៤ កន្លងទៅនេះផងដែរ៕