ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញបើកបវេសនកាល និងសំណេះ សំណាលសួរសុខទុក្ខយុវតី និងកុមារីឥស្លាមចំនួន៧០០នាក់ នៅមជ្ឈមណ្ឌលព្រែកជរ ស្ថិតក្នុងខេត្តត្បូងឃ្មុំ

ចេញ​ផ្សាយ​ ១៦ កុម្ភៈ ២០១៨ 4634

នៅវេលាម៉ោង៨:០០ព្រឹក ថ្ងៃទី ០៩ ខែវិច្ឆិកា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញបើកបវេសនកាល និងសំណេះ សំណាលសួរសុខទុក្ខយុវតី និងកុមារីឥស្លាមចំនួន៧០០នាក់ នៅមជ្ឈមណ្ឌលព្រែកជរ ស្ថិតក្នុងភូមិព្រែកជរ ឃុំសេដា ស្រុកតំបែរ ខេត្តត្បូងឃ្មុំ។ ចូលរួមក្នុងពិធីនោះដែរមាន លោកជំទាវ ម៉ាត់ ម៉ារ៉ា រដ្ឋលេខាធិការក្រសួងអភិវឌ្ឍន៏ជនបទ ឯកឧត្ដមសុះ មហាម៉ាត់ ទីប្រឹក្សាសម្ដេចអគ្គមហាពញាចក្រីប្រធានរដ្ឋសភាជាតិ និងជាប្រធានអង្គការប្រភពល្អ(អ្នកឧបត្ថម្ភមជ្ឈមណ្ឌល) ហើយនិងសហការី។ មានប្រសាសន៏ក្នុងអង្គពិធីនោះ ឯកឧត្តមរដ្ឋមន្ត្រីបានគូសបញ្ជាក់ថា: មិននឹកស្មានទីកន្លែងនេះ ដែលពីមុនជាព្រៃស្រោង ឬអ្នកស្រុកហៅថាជាព្រៃងងុយ បច្ចុប្បន្ន មានការអភិវឌ្ឍន៍ដ៏ល្អបែបនេះ ដោយមានមជ្ឈមណ្ឌល សាលារៀន បំពាក់ដោយសំភារៈ ឧបករណ៍សិក្សា ព្រមទាំងមានអ៊ីនធើណែត wifi ប្រើប្រាស់សម្រាប់ការសិក្សា ស្រាវជ្រាវផង។ ទាំងអស់នេះកើតមានបានដោយមិនអាចកាត់ផ្តាច់ពីនយោបាយឈ្នះ ឈ្នះ របស់សម្ដេចតេជោសែន ដែលនាំមកនូវសន្តិភាព ស្ថេរភាពសង្គមនិងការអភិវឌ្ឍលើគ្រប់វិស័យ។ ក្មួយៗ ពិតជាមានភ័ព្វវាសនា ដែលបានកើតនៅសម័យតេជោសែន មានឱកាសរៀនសូត្រ មានសាលាស្អាត ព្រមទាំងថ្លែងអំណរគុណដល់ម្ចាស់ជំនួយជាអ្នកកសាង និងឧបត្ថម្ភដល់មជ្ឈមណ្ឌល ដែលរួមទាំងមជ្ឈមណ្ឌលនេះផង មានចំនួន ២៣ ទូទាំងប្រទេស។ ឯកឧត្ថមរដ្ឋមន្ត្រីក្រើនរំលឹកដល់អ្នកគ្រូបង្រៀនឲ្យណែនាំសិស្សឲ្យយល់ច្បាស់ពីសច្ចភាព សភាពការណ៍ពិត សមិទ្ធិផលសន្ធឹកសន្ធាប់ របស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្ដេចតេជោសែន ហើយចៀសវាងបាននូវការញុះញង់ បោកបញ្ឆោតពីសំណាក់ជនអគតិត្រូវបង្រៀនមិនត្រឹមតែចំណេះដឹង និងក្រមសីលធ៌ម តែត្រូវសិក្សាស្រាវជ្រាវ ជាពិសេសតាមរយៈការប្រើប្រាស់អ៊ីនធើណែត Wifi របស់មជ្ឈមណ្ឌល នូវចំណេះដឹងទូលំទូលាយ ព័ត៌មាន និងទិន្នន័យ ដើម្បីបង្រៀននិងចែករំលែកដល់សិស្ស។ ម្យ៉ាងទៀត ត្រូវចេះប្រើប្រាស់សិទ្ធិសេរីភាព ដោយប្រកាន់ខ្ជាប់នូវក្រមសីលធម៌ ដោយមិនឈ្លក់វង្វេងឈានដល់ភាពអនាធិបតេយ្យ។ ឯកឧត្តមរដ្ឋមន្ត្រីបានសំណូមពរដល់អ្នកគ្រូ យុវតីជាសិស្សខិតខំស្រវាស្រទេញរៀនសូត្របន្ថែមដើម្បីបង្កើនសមត្ថភាព ព្រោះស្ត្រីនឹងមានឱកាសធ្វើជាថ្នាក់ដឹកនាំនៅគ្រប់កម្រិត ស្របតាមគោលនយោបាយលើកស្ទួយយិនឌ័ររបស់រាជរដ្ឋាភិបាល។ ម្យ៉ាងទៀត ត្រូវរៀនសង្កេតពីជីវភាពសង្គម និងប្រមើលពីបញ្ហាប្រឈមនាអនាគត ដើម្បីត្រៀមខ្លួនរកដំណោះស្រាយ ឬមធ្យោបាយ ជួយដល់ប្រទេសជាតិ។ កុំគិតថា ស្ត្រី មិនអាចធ្វើអ្វីបាន ត្រូវពុះពារធ្វើនូវការងារត្រឹមត្រូវដែលខ្លូនចង់ធ្វើ។ ឯកឧត្តមរដ្ឋមន្ត្រី ក៏បានឆ្លៀតឱកាសអំពាវនាវដល់អ្នកគ្រូ យុវតីដែលមិនទាន់ចុះឈ្មោះបោះឆ្នោត សូមរួសរាន់ទៅចុះឈ្មោះបោះឆ្នោត ឲ្យទាន់ពេលវេលា។ ចូលរួមចំណែកក្នុងពិធីនេះ ឯកឧត្តមរដ្ឋមន្ត្រីបានផ្តល់ថវិកាជូនអ្នកគ្រូនៃមជ្ឈមណ្ឌល ចំនួន៤០នាក់ ក្នុងម្នាក់ៗ ៣ម៉ឺនរៀល (សរុប ១លាន២សែន រៀល) និងសិស្ស ៧០០នាក់ ក្នុងម្នាក់ៗ ចំនួន ១០ ០០០រៀល (សរុប ៧លានរៀល)។