ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញចុះជួបមន្ត្រីកសិកម្មឃុំនិងប្រជាកសិករ នៅស្រុកក្រគរ ខេត្តពោធិ៍សាត់ ដើម្បីពិភាក្សាការសហការ ផលិតស្រូវពូជផ្ការំដួល
ចេញផ្សាយ ២៧ មិថុនា ២០២៥ 2177
នារសៀលថ្ងៃទី២៧ ខែមិថុនា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ រួមដំណើរដោយឯកឧត្តម ខាត់ សុធី អនុរដ្ឋលេខាធិការ បានចុះជួបជាមួយមន្រ្តីកសិកម្មឃុំ ស្រុកក្រគរទាំង១១រូប និងប្រជាកសិករនៅឃុំត្នោតជុំ ស្រុកក្រគរ ខេត្តពោធិ៍សាត់ ដើម្បីជជែកពិភាក្សា ពីការសហការផលិតគ្រាប់ពូជស្រូវផ្ការំដួល។
កម្មវិធីនេះ គឺជាកិច្ចសហការរវាងក្រសួងកសិកម្ម រុក្ខាប្រមាញ់ និងនេសាទជាមួយនឹងគម្រោង PCRL ធ្វើឡើងនៅក្នុងឃុំត្នោតជុំ ស្រុកក្រគរ ខេត្តពោធិ៍សាត់។ ដោយការចាប់ផ្តើមនៅរដូវនេះ មានកសិករចំនួន១១គ្រួសារ បានសហការផលិតគ្រាប់ពូជស្រូវផ្ការំដួល ធ្វើនៅលើផ្ទៃដីចំនួន១៤ហិកតា ដែលអាចផ្គត់ផ្គង់ពូជបានប្រមាណ ៣០តោនសម្រាប់រដូវកាលក្រោយ។
នាឱកាសនៃជំនួបនោះ ឯកឧត្តមបណ្ឌិតរដ្ឋលេខាធិការ បានគូសបញ្ជាក់ថា ភាពជោគជ័យរបស់កសិករទាំង១១គ្រួសារ នឹងនាំឱ្យកសិករកាន់តែច្រើនថែមទៀត អាចចូលរួមក្នុងការផលិតគ្រាប់ពូជ និងប្រើគ្រាប់ពូជសុទ្ធសម្រាប់ផលិតស្រូវប្រកបដោយគុណភាព ដើម្បីឆ្លើយតបទៅនឹងតម្រូវការទីផ្សារ។ ឯកឧត្តមបណ្ឌិត ក៏បានណែនាំឱ្យមន្រ្តីកសិកម្មឃុំបង្កើនការយកចិត្តទុកដាក់ ក្នុងការធ្វើការជាមួយកសិករ អ្នកផលិតពូជ ដើម្បីធានាបាននូវពូជស្រូវដែលមានគុណភាពល្អ សម្រាប់ផ្គត់ផ្គង់ដល់កសិករដទៃទៀតនៅក្នុងឃុំ នារដូវកាលខាងមុខ ប្រមាណជាង២០០គ្រួសារទៀត។
ទន្ទឹមនឹងនេះ ឯកឧត្តមបណ្ឌិតរដ្ឋលេខាធិការ បានលើកឡើងទៀតថា គោលដៅរបស់ក្រសួងកសិកម្ម គឺជួយឱ្យកសិករគ្រប់រូបទទួលបានគ្រាប់ពូជសុទ្ធល្អប្រើប្រាស់សម្រាប់ផលិតស្រូវមានគុណភាព ដើម្បីបង្កើនប្រាក់ចំណូលពីផលិតកម្មដំណាំស្រូវផ្សារភ្ជាប់ទីផ្សារ។ ជាមួយគ្នានោះមន្រ្តីកសិកម្មឃុំ និងកសិករត្រូវបង្កើនការសហការធ្វើស្រែបង្ហាញឱ្យបានត្រឹមត្រូវ ដើម្បីងាយស្រួលវាយតម្លៃលើបង្គុំបច្ចេកទេស នាំមកនូវផលចំណេញខ្ពស់ទាំងសេដ្ឋកិច្ច និងបរិស្ថាន៕
