ព័ត៌មានផ្សេងៗទៀត
ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញបើកវគ្គបណ្តុះបណ្តាលសម្រាប់អាជីវករជី-ថ្នាំកសិកម្ម ក្នុងខេត្តសៀមរាប
ចេញផ្សាយ ១០ កុម្ភៈ ២០២៦ 2613
នាព្រឹកថ្ងៃទី១០ ខែកុម្ភៈ ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលសមត្ថភាពវិជ្ជាជីវៈសម្រាប់អាជីវករជី-ថ្នាំកសិកម្ម ចំនួន ១១៧នាក់ នៅខេត្តសៀមរាប ដោយមានការចូលរួមពីថ្នាក់ដឹកនាំក្រសួង រដ្ឋបាលខេត្ត អគ្គនាយកដ្ឋានកសិកម្ម និងមន្ទីរកសិកម្មខេត្ត។
ឯកឧត្តមរដ្ឋលេខាធិការបានជម្រាបជូនបងប្អូនអាជីវករអំពីវឌ្ឍនភាពថ្មីៗនៃវិស័យកសិកម្ម និងការបន្តយកចិត្តទុកដាក់ខ្ពស់របស់ក្រសួងកសិកម្ម រុក្ខាប្រមាញ់ និងនេសាទ ចំពោះវិស័យកសិកម្ម និងប្រជាកសិករ ក្រោមការដឹកនាំរបស់ឯកឧត្តមរដ្ឋមន្រ្តី ឌិត ទីណា តាមរយៈការដាក់ចេញនូវគោលនយោបាយ “មានហូប មានប្រើ មានបាន និងមានរហូត” និងរបស់រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំដ៏មោះមុត និងឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តាមរយៈកម្មវិធីគោលនយោបាយអាទិភាពទី៥ និងទី៦ ដែលរួមមាន “យន្តការរក្សាលំនឹងថ្លៃកសិផល, ការដាក់ពង្រាយមន្ត្រីកសិកម្មឃុំនៅទូទាំងប្រទេស និងការអភិវឌ្ឍសហគមន៍កសិកម្មទំនើប” សំដៅបម្រើផលប្រយោជន៍បងប្អូនកសិករឱ្យកាន់តែសកម្មថែមទៀត និងបង្កើនល្បឿននៃការអភិវឌ្ឍវិស័យកសិកម្មកម្ពុជា។
ពាក់ព័ន្ធនឹងការធ្វើអាជីវកម្មជី-ថ្នាំកសិកម្ម ឯកឧត្តមបានលើកទឹកចិត្តឱ្យបងប្អូនអាជីវករយកចិត្តទុកដាក់ចំពោះមេរៀនរបស់គ្រូឧទ្ទេស ដើម្បីទទួលបានចំណេះដឹងជាមូលដ្ឋានអំពីការប្រើប្រាស់ និងធ្វើអាជីវកម្មជី-ថ្នាំកសិកម្ម និងលក់ដូរតែផលិតផលស្របច្បាប់មានចុះបញ្ជិកាត្រឹមត្រូវដែលឆ្លងកាត់ការត្រួតពិនិត្យដោយមន្ទីរពិសោធន៍របស់ក្រសួង និងធានាបាននូវគុណភាពសម្រាប់បងប្អូនកសិករ។
ឯកឧត្តមបានគូសបញ្ជាក់ថា បងប្អូនអាជីវករ គឺជាដៃគូដ៏ល្អរបស់ប្រជាកសិករ មន្ទីរកសិកម្មខេត្ត និងក្រសួងកសិកម្ម តាមរយៈការជួយផ្គត់ផ្គង់ជី-ថ្នាំកសិកម្មដល់ប្រជាកសិករសម្រាប់ការដាំដុះ និងត្រូវចេះរក្សាទុកជី-ថ្នាំកសិកម្មឱ្យមានសុវត្ថិភាព និងភាតរភាពបរិស្ថាន។ ទន្ទឹមនេះ ឯកឧត្តមរដ្ឋលេខាធិការបានអំពាវនាវដល់បងប្អូនអាជីវករឱ្យចូលរួមពន្យល់ដល់កសិករអំពីការប្រើប្រាស់ជី និងថ្នាំកសិកម្មឱ្យបានត្រឹមត្រូវតាមបច្ចេកទេស សំដៅកាត់បន្ថយថ្លៃដើមផលិត និងទទួលបានប្រាក់ចំណេញ ដោយមិនផ្តោតតែទៅលើការបង្កើនបរិមាណផលតែមួយមុខនោះទេ៕
