ឯកឧត្តមរដ្ឋលេខាធិការ ប្រាក់ ដាវីដ អញ្ជើញដឹកនាំមន្រ្តីជំនាញនៃអគ្គនាយកដ្ឋានកៅស៊ូ ចូលរួមសន្និសីទអន្តរជាតិស្ដីពីសេដ្ឋកិច្ចកៅស៊ូ នៅប្រទេសម៉ាឡេស៊ី

ចេញ​ផ្សាយ​ ៩ តុលា ២០២៥ 753

សន្និសីទនេះ ត្រូវបានរៀបចំឡើងដោយផ្សារភ្ជាប់នឹងខួប១០០ឆ្នាំ នៃការស្រាវជ្រាវកៅស៊ូម៉ាឡេស៊ី ក្រោមប្រធានបទ គំនិតផ្ដួចផ្ដើមនិរន្តរភាពកៅស៊ូធម្មជាតិសម្រួចឆ្ពោះទៅកាន់អនាគតទាំងអស់គ្នា (Sustainable Natural Rubber Initiatives: Sharping the Future Together) និងប្រកាសបើកដោយ ឯកឧត្តម YB Datuk Seri Johari Abdul Ghani រដ្ឋមន្ត្រីក្រសួងចម្ការ និង មុខទំនិញ (Ministry of Plantations and Commodities) ។
ឯកឧត្តមរដ្ឋលេខាធិការ បានគូសបញ្ជាក់ថា សន្និសីទធ្វើឡើងក្នុងគោលបំណង ផ្ដល់ជាវេទិកាដល់អ្នកធ្វើគោលនយោបាយ ធុរកិច្ចជន អ្នកផលិត និងអ្នកស្រាវជ្រាវមកជួបជុំពិភាក្សា និងចែករំលែកបទពិសោធន៍លើបញ្ហាប្រឈម ឱកាស និងដំណោះស្រាយសម្រាប់ឧស្សាហកម្មកៅស៊ូធម្មជាតិ ជាពិសេសនិន្នាការទីផ្សារកៅស៊ូ ការស្រាវជ្រាវ និរន្តរភាព និងអនុវត្តបទប្បញ្ញតិ EUDR ដែលនឹងមកដល់នាពេលខាងមុខ។
ឆ្លៀតក្នុងឱកាសនេះ ឯកឧត្តមរដ្ឋលេខាធិការក៏បានជួបពិភាក្សាជាមួយ លោក Li Jihua អនុប្រធានបណ្ឌិតសភាវិទ្យាសាស្ត្រកសិកម្មតំបន់ត្រូពិចប្រទេសចិន (CATAS) ដើម្បីពិភាក្សា ស្វែងយល់ និងរកឱកាសពង្រីកកិច្ចសហការបន្ថែម ជាពិសេសការងារកែច្នៃគុណភាពជ័រកៅស៊ូដែលមានប្រភពពីកៅស៊ូគ្រួសារ ឱ្យឆ្លើយតបទៅនឹងលក្ខខ័ណ្ឌតម្រូវរបស់រោងចក្រផលិតសំបកកង់រថយន្ត និងជួបពិភាក្សាជាមួយលោក Toh Heng Guan អគ្គលេខាធិការ នៃសមាគមនៃបណ្ដាប្រទេសផលិតកៅស៊ូធម្មជាតិ (ANRPC) ដើម្បីពង្រឹងកិច្ចសហការក្នុងនាមកម្ពុជាជាសមាជិកពេញសិទ្ធិ និងឈ្វេងយល់អំពីការរៀបចំគោលការណ៍និរន្តរភាពកៅស៊ូធម្មជាតិ និងលក្ខខ័ណ្ឌនានាឆ្លើយតបនឹងបទប្បញ្ញតិ EUDR ៕