ឯកឧត្តមរដ្ឋមន្ត្រី វេង សាខុន បានអញ្ជើញជាអធិបតីភាពចូលរួម ពិធីបិទកិច្ចប្រជុំបូកសរុបលទ្ធ ផលការងារវិស័យព្រៃឈើឆ្នាំ២០១៦ និងទិសដៅអនុវត្តបន្តឆ្នាំ២០១៧

ចេញ​ផ្សាយ​ ២១ កុម្ភៈ ២០១៨ 3411

នៅរសៀលថ្ងៃទី២៥ ខែមករា ឆ្នាំ២០១៧ នៅវិទ្យាស្ថានស្រាវជ្រាវអភិវឌ្ឍន៍ព្រៃឈើ-សត្វព្រៃ ភ្នំពេញថ្មី មានពិធីបិទកិច្ចប្រជុំបូកសរុបលទ្ធផលការងារវិស័យព្រៃឈើឆ្នាំ២០១៦ និងទិសដៅអនុវត្តបន្តឆ្នាំ២០១៧ ក្រោមអធិបតីភាព ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ដោយមានការចូលរួមពីឯកឧត្តមថ្នាក់ដឹកនាំក្រសួង ឯកឧត្ដមប្រធានរដ្ឋបាលព្រៃឈើ ឯកឧត្ដម អស់លោក លោកស្រីជា​ថ្នាក់ដឹកនាំអង្គភាពក្រោមឱវាទក្រសួង ថ្នាក់ដឹកនាំនិងមន្ត្រីរដ្ឋបាលព្រៃឈើ យ៉ាងច្រើនកុះករ។ ក្រោយពីបានស្តាប់នូវរបាយការណ៍បូកសរុបលទ្ធផលឆ្នាំ២០១៦ និងលើកទិសដៅអនុវត្តបន្តឆ្នាំ២០១៧ ពីឯកឧត្តមប្រធានរដ្ឋបាលព្រៃឈើ ដែលបង្ហាញពីវឌ្ឍនភាពនៃការអនុវត្តកម្មវិធី និងអនុកម្មវិធី ស្របតាមគោលនយោបាយកំណែទំរង់ជម្រៅរបស់រាជរដ្ឋាភិបាលរួចមក ឯកឧត្ដមរដ្ឋមន្ត្រីបានផ្តល់នូវការ​ណែនាំដល់រដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់និងនេសាទរាជធានី ខេត្ត នូវការងារដូចខាងក្រោម៖

១-បង្កើនសាមគ្គីភាពផ្ទៃក្នុងឲ្យបានតែល្អប្រសើរ

២-បន្តការផ្សព្វផ្សាយច្បាប់ស្តីពីព្រៃឈើដល់សាធារណជន ឲ្យបានកាន់តែទូលំទូលាយ តាមគ្រប់រូបភាព

៣-ពង្រឹងកិច្ចសហការឲ្យកាន់តែជិតស្និទ្ធ និងខ្លាំងក្លា ជាមួយអ្នកពាក់ព័ន្ឋ ជាពិសេសគណៈបញ្ជាការឯកភាពរាជធានី ខេត្ត

៤-ខិតខំស្រាវជ្រាវបទល្មើសនានា ក្នុងនោះមន្ទីរកសិកម្ម រុក្ខាប្រមាញ់និងនេសាទរាជធានី ខេត្ត ត្រូវខ្នះខ្នែងទៅតាមប្រភពព័ត៌មាននានា

៥-ត្រូវជំរុញល្បឿនការងារបោះបង្គោលសម្បត្តិព្រៃឈើអចិន្ត្រៃយ៍ និងរៀបចំឈានទៅចុះបញ្ជីដីរដ្ឋ

៦-ត្រូវពិចារណាប្រើប្រាស់ដីសម្បទានសេដ្ឋកិច្ចដែលបានដកហូត ដូចជាធ្វើការដាំដុះព្រៃឈើឡើងវិញតាមរយៈដៃគូ

៧-មន្ទីរកសិកម្ម រុក្ខាប្រមាញ់និងនេសាទត្រូវក្ដាប់និងគ្រប់គ្រងឲ្យបានម៉ត់ចត់ដីសម្បទានសេដ្ឋកិច្ច នៅក្នុងមូលដ្ឋានរបស់ខ្លួន

៨-ត្រូវធ្វើការត្រួតពិនិត្យឲ្យបានម៉ត់ចត់នូវត្រាដែលបោះលើឈើដែលបានពីការឈូសឆាយដីសម្បទានដែលបានអនុញ្ញាត

៩-ត្រូវធ្វើការពិភាក្សានិងរិះរកជម្រើសវិធានការដើម្បីជួយដល់សហគមន៍ព្រៃឈើទទួលបានចំណូលក្រៅពីព្រៃឈើ ដូចជារកសម្ព័ន្ធភាពដៃគូសហការចិញ្ចឹមគោ ក្របីក្នុងព្រៃសហគមន៍ ដែលជាជម្រើសប្រសើរមួយ។