ព័ត៌មានផ្សេងៗទៀត
ឯកឧត្តម គង់ ច័ន្ទវាសនា អញ្ជើញចូលរួមកិច្ចប្រជុំពិភាក្សាស្តីពីការស្តារប្រឡាយ ព្រែក និងស្រះ ក្នុងភូមិសាស្រ្តខេត្តព្រះសីហនុ ខេត្តកំពត និងខេត្តកែប
ចេញផ្សាយ ២៧ កុម្ភៈ ២០២៦ 3352
នាព្រឹកថ្ងៃទី២៦ ខែកុម្ភៈ ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារអគ្គនាយកដ្ឋានជលផល ចូលរួមកិច្ចប្រជុំពិភាក្សាស្តីពីការស្តារ ប្រឡាយ ព្រែក និងស្រះ ក្នុងភូមិសាស្រ្តខេត្តព្រះសីហនុ ខេត្តកំពត និងខេត្តកែប នៅទីស្តីការក្រសួងរៀបចំដែនដី នគរូបនីយកម្ម និងសំណង់ ក្រោមអធិបតីភាព ឯកឧត្តម តឹករ៉េត សំរេច រដ្ឋលេខាធិការប្រចាំការក្រសួងរៀបចំដែនដី។ កិច្ចប្រជុំនេះមានការចូលរួមពីថ្នាក់ដឹកនាំក្រសួង-ស្ថាប័ន និងប្រធានក្រុមការងារចុះមូលដ្ឋានក្រុង-ស្រុកពាក់ព័ន្ធ រដ្ឋបាលខេត្ត និងមន្ទីរជំនាញនៃខេត្តព្រះសីហនុ កំពត និងខេត្តកែប។
ឯកឧត្តម តឹករ៉េត សំរេច ប្រធានអង្គប្រជុំ បានបញ្ជាក់ថា គោលបំណងនៃកិច្ចប្រជុំ គឺដើម្បីពិភាក្សាលើការងារស្តារអាងទឹក ប្រឡាយ បឹង និងព្រែក ដែលមានស្រាប់ ក្នុងគោលដៅដោះស្រាយបញ្ហាការផ្គត់ផ្គង់ទឹកសម្រាប់ប្រើប្រាស់ក្នុងវិស័យកសិកម្ម សិប្បកម្ម ឧស្សាហកម្ម និងទេសចរណ៍ជាដើម ដើម្បីជួយលើកកម្ពស់ជីវភាពប្រជាពលរដ្ឋ និងគាំទ្រការអភិវឌ្ឍមូលដ្ឋាន។
ឯកឧត្តមរដ្ឋលេខាធិការ គង់ ច័ន្ទវាសនា បានចូលរួមគាំទ្រការងារនេះ ដោយលើកឡើងថា សម្រាប់ប្រជាពលរដ្ឋ ទឹកគឺជាជីវិត និងជីវភាព ហើយការដោះស្រាយបញ្ហាទឹក ទាំងទឹកស្អាត និងទឹកប្រេីប្រាស់ គឺជាអាទិភាពរបស់រាជរដ្ឋាភិបាលជាច្រើនអាណត្តិមកហេីយ។
តំណាងក្រសួង-ស្ថានប័ន និងរដ្ឋបាលខេត្តពាក់ព័ន្ធ សុទ្ធតែបានផ្តល់ការគាំទ្រយ៉ាងពេញលេញចំពោះការងារនេះ៕
