ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត បន្តដឹកនាំកិច្ចប្រជុំគណៈកម្មការតម្រង់ទិស កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន៖ ផ្នែកវារីវប្បកម្ម (CaPFish Aquaculture) លើកទី១០
ចេញផ្សាយ ២០ មិថុនា ២០២៥ 813
នៅរសៀលថ្ងៃទី១៩ ខែមិថុនា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោកឃុន អេវើរ៉ាត អនុប្រធានផ្នែកសហប្រតិបត្តិការនៃសហភាពអឺរ៉ុប បានបន្តដឹកនាំកិច្ចប្រជុំគណៈកម្មការតម្រង់ទិសកម្មវិធី ជំរុញកំណើនវិស័យជលផលប្រកបដោយចីរភាព និងបរិយាបន្ន៖ ផ្នែកវារីវប្បកម្ម (CaPFish Aquaculture) លើកទី១០។ កម្មវិធីនេះបាននឹងកំពុងអនុវត្តដោយរដ្ឋបាលជលផល ក្រោមការគ្រប់គ្រងហិរញ្ញប្បទានដោយទីភ្នាក់ងារអភិវឌ្ឍន៍បារាំង(AFD)។
នៅក្នុងកិច្ចប្រជុំ ឯកឧត្តម ហាស់ សារ៉េត បានថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ដែលបានជួយគាំទ្រថវិកា សម្រាប់ការអនុវត្តកម្មវិធី CaPFish Aquaculture ដ៏មានសារៈសំខាន់ ដើម្បីជួយលើកស្ទួយការធ្វើវារីវប្បកម្ម និងសេដ្ឋកិច្ចជាតិផងដែរ។ ឯកឧត្តម ក៏បានលើកសសើរដល់ក្រុមការងារគម្រោង ដែលបានខិតខំអនុវត្តសកម្មភាពសម្រេចបានគួរឱ្យកត់សម្គាល់។
ទន្ទឹមនឹងនោះ ឯកឧត្តម រដ្ឋលេខាធិការ បានគូសបញ្ជាក់នូវចំណុចជួយតម្រង់ទិស ដោយលើកជាអនុសាសន៍ល្អៗមួយចំនួនរួមមាន៖ ១.ណែនាំដល់ក្រុមការងារគម្រោង និងក្រុមហ៊ុន ដែលទទួលបានកិច្ចសន្យាក្នុងការអនុវត្តន៍សកម្មភាពគម្រោង សហការអនុវត្តសកម្មភាព ដែលនៅសល់ ដោយសង្កត់ធ្ងន់ទៅលើការដោះស្រាយបញ្ហាកំពុងជួបប្រទេះ ២.បន្តការយកទុកដាក់ទៅលើការបង្កើនសមត្ថភាពតាមរយៈការបណ្តុះបណ្តាលស្តីពី បច្ចេកទេសបង្កាត់កូនត្រីពូជចំនួន ៨ប្រភេទ ដូចជា៖ ត្រីប្រា បង្កង គ្រំ ឆ្ពិន អណ្តែង ប្រលូង ពោ និងខ្យា ដើម្បីបង្កើនសមត្ថភាពផលិតកូនត្រីពូជ និងផ្គត់ផ្គង់ដល់វារីវប្បករក្នុងស្រុក។
៣.បង្កើតកសិដ្ឋានបង្ហាញតាមខេត្តគោលដៅឱ្យបានយ៉ាងតិច ២ ទៅ ៣កសិដ្ឋានក្នុងមួយខេត្ត ដើម្បីផ្សព្វផ្សាយពីបច្ចេកទេសវារីវប្បកម្មដល់ប្រជាកសិករ ៤. ភាគីពាក់ព័ន្ធគួរតែមានភាពបត់បែនក្នុងការអនុវត្តន៍កិច្ចលទ្ធកម្មតាមស្ថានភាពជាក់ស្តែងនៃគម្រោង ដើម្បីឱ្យគម្រោងទទួលបានលទ្ធផលជោគជ័យតាមការរំពឹងទុក។ ចុងក្រោយឯកឧត្តមរដ្ឋលេខាធិការ បានលើកទឹកចិត្តដល់ក្រុមការងារ ត្រូវជំរុញការងារនេះបន្ថែមទៀត ធ្វើយ៉ាងណាឱ្យមានលទ្ធផលផ្លែផ្កា និងជាសក្ខីភាពមួយបង្ហាញពីកិច្ចសហប្រតិបត្តិការ នៃការរួមគ្នាជួយគាំទ្រដល់ការអភិវឌ្ឍន៍វារីវប្បកម្មកម្ពុជា៕
