លោកជំទាវអនុរដ្ឋលេខាធិការ អ៊ឹម រចនា អញ្ជើញជួបប្រជុំជាមួយ​មន្រ្តីជំនាញជលផលខេត្តក្រចេះ ដើម្បីពង្រឹងកិច្ចការអភិរក្ស​ផ្សោតទន្លេមេគង្គ និងផ្សព្វផ្សាយឱ្យបានទូលំទូលាយ

ចេញ​ផ្សាយ​ ៥ កញ្ញា ២០២៤ 2380

ដោយបានទទួលការអនុញ្ញាតពីឯកឧត្តមរដ្ឋមន្ដ្រី​ ឌិត ទីណា នៅថ្ងៃទី២ ខែកញ្ញា ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបប្រជុំ និងពិភាក្សាជាមួយមន្រ្តីខណ្ឌរដ្ឋបាលជលផលខេត្តក្រចេះ និងឆ្មាំទន្លេ ដើម្បីពង្រឹងវិធានការការពារនិងអភិរក្សសត្វផ្សោតទន្លេមេគង្គឱ្យកាន់តែមានប្រសិទ្ធភាពខ្ពស់ សម្រាប់ការផ្សព្វផ្សាយបន្តទៅកាន់សាធារណជន ទាំងជាតិនិងអន្ដរជាតិ។​ កម្មវិធីជួបសំណេះសំណាលនេះ មានការ​ចូលរួម​​ពី​​ឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុកជា​ប្រធានរដ្ឋបាលជលផល លោក អ៊ុក វិបុល ប្រធាននាយកដ្ឋានអភិរក្ស​ជលផល និងមន្រ្តីពាក់ព័ន្ធមួយចំនួនទៀត។

នៅចំពោះមុខឆ្មាំទន្លេមេគង្គ ក្នុងខេត្តក្រចេះ ចំនួន៤៤រូប លោកជំទាវ​អនុរដ្ឋលេខាធិការ បានសម្ដែងការកោតសរសើរ និងថ្លែងអំណរគុណ​ចំពោះមន្រ្តីឆ្មាំទន្លេ ដែលបានខិតខំលះបង់អស់កម្លាំងកាយចិត្ត ដើម្បីបំពេញភារកិច្ចដោយមិនខ្លាចការនឿយហត់ ឆ្លាស់វេនគ្នាការពារ និងទប់ស្កាត់បទល្មើសនេសាទនៅតំបន់ការពារ ២៤ម៉ោងលើ២៤ម៉ោង ជារៀងរាល់ថ្ងៃ។ យ៉ាងណាកឰ៏ដោយ ការនេសាទដោយប្រើមងក្រឡាធំ និងឧបករណ៍ឆក់ នៅក្នុងភូមិសាស្ត្រខេត្តក្រចេះ នៅតែមាន និងអាចបង្កហានិភ័យដល់អាយុជីវិតសត្វផ្សោត។

លោកជំទាវ អ៊ឹម រចនា បានលើកទឹកចិត្ត និងសង្ឃឹមយ៉ាងមុតមាំថា រដ្ឋបាលខេត្ត អាជ្ញាធរមូលដ្ឋាន និងមន្ត្រីឆ្មាំទន្លេទាំងអស់ នឹងរួមសហការ​គ្នាដើម្បីពង្រឹងវិធានការការពារ និងអភិរក្សសត្វ​ផ្សោតទន្លេមេគង្គ ឱ្យកាន់តែមានប្រសិទ្ធភាពខ្ពស់បន្ថែមទៀត ដើម្បីធានានិរន្តរភាពសត្វផ្សោតដែល់ជារតនសម្បត្តិរបស់ជាតិ សម្រាប់ទាក់​ទាញភ្ញៀវទេសចរណ៍ និងបង្កើនចំណូល​ដល់ប្រជាជននៅក្នុងមូលដ្ឋាន។

លោកជំទាវបញ្ជាក់បន្ថែមថា ជោគជ័យដ៏ធំដែលកម្ពុជា​សម្រេចបានក្នុងការអភិរក្សផ្សោត គឺកំណើនសត្វផ្សោតពីចំនួន ៩២ក្បាល ដល់ ១០៥ក្បាល ក្នុងរយៈពេល២ឆ្នាំចុងក្រោយ ដែលនេះ គឺជាសមិទ្ធផលជាទីមោទនៈសម្រាប់កម្ពុជា ដែលកើតចេញ​ពីកិច្ចខំប្រឹងប្រែងរបស់មន្រ្តីឆ្មាំទន្លេអភិរក្ស។ លោកជំទាវនឹងប្រឹងប្រែង​ឱ្យអស់ពីលទ្ធភាពនិងសមត្ថភាព ផ្សព្វផ្សាយពីការងារអភិរក្ស​សត្វផ្សោតនេះ ឱ្យបានទូលំទូលាយថែមទៀតទៅកាន់​សាធារណ​ជនឱ្យបានជ្រាបកាន់តែច្បាស់ ជាពិសេសអំពីតម្លៃនៃការលះបង់របស់​បងប្អូនឆ្មាំទន្លេនៅក្នុងការងារអភិរក្សសត្វផ្សោតទន្លេមេគង្គ៕