ព័ត៌មានផ្សេងៗទៀត
ឯកឧត្តមរដ្ឋលេខាធិការ អ៊ឺម ស៊ីថុល អញ្ជេីញទទួលអំណោយសម្រាប់ចែកជូនជនភៀសសឹកពីក្រុមហ៊ុន អាយសេវេន រ៉េនច៍ ខេមបូឌា
ចេញផ្សាយ ១២ ធ្នូ ២០២៥ 1479
នាព្រឹកថ្ងៃទី១២ ខែធ្នូ ឆ្នាំ២០២៥ ឯកឧត្តម អ៊ឺម ស៊ីថុល រដ្ឋលេខាធិការប្រចាំការ និងជាតំណាងដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញទទួលអំណោយសម្រាប់ចែកជូនពុកម៉ែបងប្អូនជនភៀសសឹក ពីលោកឧកញ៉ា ស្រី ចន្ធូ ស្ថាបនិកក្រុមហ៊ុន អាយសេវេន រ៉េនច៍ ខេមបូឌា (i7 Ranch) និងក្រុមគ្រួសារ ព្រមទាំងក្រុមការងារក្រុមហ៊ុនទាំងអស់។
ឯកឧត្តមរដ្ឋលេខាធិការប្រចាំការ បានថ្លែងអំណរគុណដល់លោកឧកញ៉ា ដែលបានឧបត្ថម្ភថវិកាចំនួន ២៥លានរៀល និងអង្ករចំនួន២៥តោន ដើម្បីចូលរួមជួយដល់ជនភៀសសឹក តាមរយៈ ឯកឧត្តម គី ច័ន្ទរំដួល សម្រាប់រៀបចំជាស្បៀងអាហារផ្គត់ផ្គង់ប្រជាពលរដ្ឋភៀសសឹកដែលកំពុងស្នាក់នៅក្នុងខេត្តបន្ទាយមានជ័យ។
ឯកឧត្តមរដ្ឋលេខាធិការប្រចាំការ បានបន្ថែមថាទឹកចិត្តដ៏សប្បុរសនេះសបញ្ជាក់អំពីមនសិការស្នេហាជាតិដ៏ឧត្តុង្គឧត្តម រួមគ្នាជាធ្លុងមហាគ្រួសារខ្មែរតែមួយ។ តាងនាមក្រុមការងារក្រសួងកសិកម្ម រុក្ខាប្រមាញ់ និងនេសាទ និងអាជ្ញាធរខេត្ត ឯកឧត្តមរដ្ឋលេខាធិការ នឹងចាត់ចែងអំណោយដ៏មានតម្លៃនេះឱ្យបានដល់ជនភៀសសឹកគ្រប់ៗគ្នា៕
