ព័ត៌មានផ្សេងៗទៀត
លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញជាអធិបតីភាពក្នុងពិធី សម្ពោធគម្រោង «ពង្រឹងបច្ចេកវិទ្យា និងធនធាន សម្រាប់ស្រ្តីជនជាតិដើមភាគតិចក្នុងវិស័យកសិកម្ម (STRIVE Project)»
ចេញផ្សាយ ៤ កញ្ញា ២០២៥ 709
នៅព្រឹកថ្ងៃទី៤ ខែកញ្ញា ឆ្នាំ២០២៥ លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញជាអធិបតីភាពក្នុងពិធីសម្ពោធគម្រោង «ពង្រឹងបច្ចេកវិទ្យា និងធនធាន សម្រាប់ស្រ្តីជនជាតិដើមភាគតិចក្នុងវិស័យកសិកម្ម (STRIVE Project)» ដែលគោលបំណងនៃគម្រោង ដើម្បីផ្សព្វផ្សាយក្របខ័ណ្ឌគម្រោង និងបង្កើនកិច្ចសហការអនុវត្តគម្រោងឱ្យមានប្រសិទ្ធភាពដើម្បីទទួលបានផលជះជាវិជ្ជមានទៅដល់ក្រុមគោលដៅ នៅក្នុងខេត្តរតនគីរី និងខេត្ត ស្ទឹងត្រែង។
កម្មវិធីធ្វើឡើងនៅសណ្ឋាគារកាំបូឌីយ៉ាណា រាជធានីភ្នំពេញ មានការចូលរួមពី លោក Bryan FORNARI ប្រធានកិច្ចសហប្រតិបត្តិការសហភាពអឺរ៉ុបប្រចាំកម្ពុជា EU, Dr. Gidon WINDECKER អនុប្រធានការិយាល័យសហប្រតិបត្តិការអភិវឌ្ឍន៍ នៃស្ថានទូតអាល្លឺម៉ង់នៅកម្ពុជា លោកស្រី Anette Müller ប្រធានតំបន់បែកខាងអាស៊ី ជាតំណាងអង្គការយូហានីធឺ (Johanniter)។
ក្នុងឱកាសនោះ លោកជំទាវអនុរដ្ឋលេខាធិការ បានគូសបញ្ជាក់ថាគម្រោងនេះបង្ហាញយ៉ាងច្បាស់ពីចក្ខុវិស័យ ការចូលរួមជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការជំរុញគោលនយោបាយជាតិ ស្តីពីស្វាយចន្ទី ប្រកបដោយប្រសិទ្ធភាពខ្ពស់ និងចីរភាព តាមរយៈការអនុវត្តន៍គម្រោងរយៈពេល ៤ឆ្នាំនេះ ដែលនឹងចូលរួមពង្រឹងយុទ្ធសាស្រ្តនៃការផលិតដោយប្រើប្រាស់បច្ចេកវិទ្យាថ្មីៗ ការអនុវត្តន៍កសិកម្មល្អ រៀបចំផែនការដាំដុះ និងការគ្រប់គ្រងការប្រមូលផលឆ្លើយតបទៅនឹងតម្រូវការទីផ្សារក្នុងស្រុក និងក្រៅប្រទេស។
បន្ថែមពីនេះ លោកជំទាវក៏បានស្នើដល់អង្គការ JOHANNITER ឱ្យមានកិច្ចសហការកាន់តែជិតស្និទ្ធ ជាមួយក្រសួងកសិកម្ម តាមរយៈ Memorandum of Understanding ឬ Project Agreement និងអំពាវនាវដល់ ស្ថាប័នពាក់ពន្ធ័ ជាពិសេសមន្ទីរកសិកម្ម រុក្ខាប្រមាញ់ និងនេសាទនៅក្នុងខេត្តគោលដៅទាំងពីរ អាជ្ញាធរមូលដ្ឋាន អង្គការសង្គមស៊ីវិល ដៃគូអភិវឌ្ឍន៍ និងវិស័យឯកជន រួមគ្នា ដើម្បីធ្វើឱ្យគម្រោងនេះទទួលបានជោគជ័យ។ លោកជំទាវសូមលើកទឹកចិត្តដល់ស្ត្រីជនជាតិដើមភាគតិចចូលរួមសហការរួមគ្នា ជាគន្លឹះដ៏សំខាន់ក្នុងការធានាទទួលបានឱកាស និងធនធានដើម្បីឆ្ពោះទៅរកភាពរីកចម្រើនរួមគ្នា៕
