ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទបានធ្វើទស្សនកិច្ចសិក្សា ពិនិត្យបច្ចេកវិទ្យា និងខ្សែច្រវាក់ផលិតកម្មគ្រឿងយន្តកសិកម្មនៅសាធារណរដ្ឋប្រជាមានិតចិន
ចេញផ្សាយ ២១ កញ្ញា ២០២៦ 1961
ពីថ្ងៃទី១៧ ដល់ថ្ងៃទី២១ ខែកញ្ញា ឆ្នាំ២០២៦ ឯកឧត្តមរដ្ឋលេខាធិការ មាស ពិសិដ្ឋ ប្រធានអង្គភាពសម្របសម្រួលគម្រោងអភិវឌ្ឍន៍ ឯកឧត្តមរដ្ឋលេខាធិការ ចាន់ ចេស្តា ប្រធានគណៈកម្មាធិការតម្រង់ទិសនៃគម្រោងខ្សែច្រវាក់ផលិតកម្មដោយភាតរៈបរិស្ថាន (CFAVC) និងឯកឧត្តមអនុរដ្ឋលេខាធិការ សៀក ឡេង នាយកគម្រោង CFAVC រួមដំណើរដោយក្រុមហ៊ុន Seeds and Feed បានធ្វើទស្សនកិច្ចសិក្សាខាងលើ។
នៅក្នុងដំណើរទស្សនកិច្ចនេះ ក្រុមការងារបានសិក្សា និងស្វែងយល់អំពីបច្ចេកវិទ្យា និងគ្រឿងយន្តសម្រាប់បម្រើក្នុងវិស័យកសិកម្ម ជាពិសេសសម្រាប់អនុវិស័យធញ្ញជាតិ ដូចជាត្រាក់ទ័រ ម៉ាស៊ីនដាំ ម៉ាស៊ីនស្ទូង ម៉ាស៊ីនច្រូត ម៉ាស៊ីនបូម និងបញ្ជូនគ្រាប់ធញ្ញជាតិ ម៉ាស៊ីនកិនស្រូវ ម៉ាស៊ីនសម្ងួត ។ល។
គួរបញ្ជាក់ថាប្រទេសចិនកំពុងផលិតគ្រឿងយន្តកសិកម្ម និងផលិតផលផ្សេងទៀតជាច្រើន ដែលមានគុណភាពខ្ពស់ និងថ្លៃសមស្រប ដែលធ្វើឱ្យមានការបញ្ជាទិញពីប្រទេសជាច្រើននៅក្នុងពិភពលោក ។
ទស្សនកិច្ចសិក្សានេះបានផ្តល់នូវព័ត៌មាន ចំណេះដឹង និងបទពិសោធន៍ល្អៗជាច្រើនសម្រាប់យកមករួមចំណែកអភិវឌ្ឍវិស័យកសិកម្មនៅកម្ពុជា ជាពិសេសដើម្បីកែលម្អផលិតកម្ម និងការគ្រប់គ្រងកសិផល បន្ទាប់ពីប្រមូលផល សំដៅធ្វើឱ្យថយការចំណាយ ប៉ុន្តែកើនផលិតភាព និងគុណភាព ពោលគឺកាន់តែត្រូវនឹងតម្រូវការរបស់កសិករ សហគមន៍កសិកម្ម អ្នកបរិភោគ និងអ្នកទិញ ឬ ទីផ្សារ៕
