ព័ត៌មានផ្សេងៗទៀត
ឯកឧត្តម ហ៊ួត ប៊ុនណារី រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមជាអធិបតី ក្នុងពិធីបូកសរុបលទ្ធផលការងារប្រចាំឆ្នាំ២០២៣របស់នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងលើកទិសដៅឆ្នាំ២០២៤
ចេញផ្សាយ ២៨ ធ្នូ ២០២៣ 3234
នៅថ្ងៃទី២៦ ខែធ្នូ ឆ្នាំ២០២៣ ឯកឧត្តម ហ៊ួត ប៊ុនណារី រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាអធិបតី ក្នុងពិធីបូកសរុបលទ្ធផលការងារប្រចាំឆ្នាំ២០២៣របស់នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងលើកទិសដៅឆ្នាំ២០២៤ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ក្នុងពិធីបូកសរុបនេះដែរ ឯកឧត្តមរដ្ឋលេខាធិការ បានផ្តល់នូវអនុសាសន៍គន្លឹះ៣ចំណុចដល់ថ្នាក់ដឹកនាំ និងអង្គពិធី ពិភាក្សាដោយយកចិត្តទុកដាក់ឆ្លុះបញ្ចាំងលើការអនុវត្តការងារ និងលទ្ធផលសម្រេចបានរបស់នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទឆ្នាំ២០២៣ និងយុទ្ធសាស្ត្រការងារនៃការដាក់ពង្រាយមន្ត្រីផ្សព្វផ្សាយកសិកម្មឃុំ ព្រមទាំងទស្សនាទានដែលបានដាក់ចេញកាលពីពេលកន្លងទៅ។
ជាមួយគ្នានេះដែរ ឯកឧត្តម បានគូសបញ្ជាក់ថា មន្ត្រីផ្សព្វផ្សាយកសិកម្មឃុំ ត្រូវក្តាប់ឱ្យបានច្បាស់នូវទិន្នន័យភូមិសាស្ត្រ និងស្ថានភាពកសិកម្មភូមិឃុំ ដែលទទួលខុសត្រូវ បញ្ហាទីផ្សារ ទំហំផលិតកម្មនិងខ្សែច្រវាក់តម្លៃ ការធ្វើផលិតកម្មដែលកាត់បន្ថយថ្លៃដើមដើម្បីបង្កើនចំណូលដល់កសិករ ព្រមទាំងជំរុញការចងក្រងសហគមន៍កសិកម្មទំនើប។
សូមជម្រាបជូនថា ក្នុងពិធីបូកសរុបលទ្ធផលការងាររបស់នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទនេះ បានប្រកាសអំពីការធ្វើបច្ចុប្បន្នភាពអង្គការលេខរបស់នាយកដ្ឋាន ផ្តោតសំខាន់លើការគ្រប់គ្រងមន្ត្រីផ្សព្វផ្សាយកសិកម្មឃុំ ដោយក្នុងការមានការិយាល័យចំនួន៥ គឺការិយាល័យគ្រប់គ្រងកិច្ចការទូទៅ និងការិយាល័យគ្រប់គ្រងនិងផ្សព្វផ្សាយកសិកម្មតាមតំបន់ទាំង៤ មានការិយាល័យផ្សព្វផ្សាយតំបន់ទំនាបកណ្តាល ការិយាល័យផ្សព្វផ្សាយតំបន់ខ្ពង់រាបនិងភ្នំ ការិយាល័យផ្សព្វផ្សាយតំបន់សមុទ្រ និងការិយាល័យផ្សព្វផ្សាយតំបន់បឹងទន្លេសាប។
ទន្ទឹមនឹងនេះដែរ អង្គពិធីបានពិភាក្សាលើសំណួរសំខាន់ៗចំនួន២លើការងារផ្សព្វផ្សាយ ដើម្បីជាធាតុចូល សម្រាប់ដាក់បញ្ចូលក្នុងរបាយការណ៍សន្និបាតឆ្នាំ២០២៣ គឺទី១ សក្តានុពលនិងប្រសិទ្ធភាពការងារផ្សព្វផ្សាយកសិកម្ម និងទី២ យន្តការគាំទ្រមន្ត្រីផ្សព្វផ្សាយកសិកម្មឃុំ៕
