ឯកឧត្តមរដ្ឋលេខាធិការ ហ៊ាន វណ្ណហន អញ្ជើញចូលរួមជាគណអធិបតីក្នុងពិធីចាប់ឆ្នោតជ្រើសរើសយកដីឡូត៍លំនៅឋាន និងដីឡូត៍កសិកម្មនៃកម្មវិធីសម្បទានដីសង្គមកិច្ចថ្នាក់មូលដ្ឋានគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ខេត្តបាត់ដំបង

ចេញ​ផ្សាយ​ ១២ កុម្ភៈ ២០២៦ 2589

នៅថ្ងៃទី១២ ខែកុម្ភៈ ឆ្នាំ២០២៦ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  និងជាអនុប្រធានគណៈកម្មការដឹកនាំគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) រួមនឹងឯកឧត្ដម ឃី កុសល អនុរដ្ឋលេខាធិការ និងជានាយកផ្នែកកសិកម្មគម្រោង LASED III បានដឹកនាំក្រុមការងារអនុវត្ដគម្រោង LASED III នៃក្រសួងកសិកម្ម ចូលរួមពិធីចាប់ឆ្នោតជ្រើសរើសយកដីឡូត៍លំនៅឋាន និងដីឡូត៍កសិកម្ម នៃកម្មវិធីសម្បទានដីសង្គមកិច្ចថ្នាក់មូលដ្ឋានគម្រោង LASED III ប្រព្រឹត្ដទៅនៅបរិវេណសាលាបឋមសិក្សាព្រះផុស ភូមិព្រៃផ្តៅ ឃុំព្រះផុស ស្រុកគាស់ក្រឡ ខេត្តបាត់ដំបង។ 
កម្មវិធីចាប់ឆ្នោតនេះ ប្រព្រឹត្តិទៅក្រោមអធិបតីភាព ឯកឧត្តម សូខន ឬទ្ធីគុណ រដ្ឋលេខាធិការ និងជាប្រធានគណៈកម្មការដឹកនាំគម្រោង LASED III តំណាងដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដោយមានការអញ្ជើញចូលរួមពីតំណាងក្រសួង ស្ថាប័នពាក់ព័ន្ធដែលជាអនុប្រធាន និងសមាជិកនៃគណៈកម្មការដឹកនាំគម្រោង ឯកឧត្តម ពិន ប្រាកដ អភិបាលរងខេត្តបាត់ដំបង តំណាងធនាគារពិភពលោកក្រុមការងារអនុវត្តគម្រោងថ្នាក់ជាតិ-ខេត្ដ មន្រ្តីពាក់ព័ន្ធ និងសម្បទានិកចំនួន ៥០៨រូប។ 
ថ្លែងក្នុងកម្មវិធី ឯកឧត្ដមបណ្ឌិត បានគូសបញ្ជាក់ថា ការផ្តល់ដីតាមរយៈការចាប់ឆ្នោតជ្រើសរើសយកដីឡូត៍លំនៅឋាន និងដីឡូត៍កសិកម្ម LASED III គឺជាផ្នែកមួយនៃកម្មវិធីបែងចែកដីសម្បទានសង្គមកិច្ចរបស់រាជរដ្ឋាភិបាលកម្ពុជាជូនដល់ប្រជាពលរដ្ឋក្រីក្រ គ្មានដី ហើយត្រូវការដីពិតប្រាកដតាមគោលការណ៍សមធម៌ តម្លាភាព ស្ថេរភាព និរន្តរភាព និងការអនុវត្តគោលនយោបាយ កំណែរទម្រង់ដីធ្លី និងប្រែក្លាយជីវភាពប្រជាពលរដ្ឋដែលមករស់នៅក្នុងតំបន់ថ្មីនេះ ឲ្យមានជីវភាពធូធារ និងរៀបចំតំបន់នេះឲ្យក្លាយជាបុរីជនបទ ដែលមានផ្លូវ ទឹក ភ្លើង សាលារៀន ប៉ុស្តិ៍សុខភាព ផ្សារ សួនកំសាន្ត វត្ត និងផ្តល់សេវាកម្មសង្គមគ្រប់ប្រភេទ។ 
ឯកឧត្ដមបណ្ឌិត បន្ថែមទៀតថា ការចាប់ឆ្នោតផ្ដល់ដីជូនសម្បទានិកចំនួនទាំង ៤២១គ្រួសារនាថ្ងៃនេះនឹងប្រព្រឹត្តទៅដោយតម្លាភាព ដោយក្នុងនោះ ដីឡូត៍លំនៅឋាន (៣០មx៤០ម) ចំនួន ៤២៦ឡូត៍ និងដីឡូត៍កសិកម្ម (២ហិកតា) ចំនួន ៣១៣ ឡូត៍ (ដីឡូត៍ទាំងពីរប្រភេទ ២៤៩គ្រួសារ, ដីឡូត៍លំនៅឋាន ១១៣គ្រួសារ និងដីកសិកម្ម ៥៩គ្រួសារ)។ ក្រោយសម្បទានិកបានចាប់ឆ្នោតទទួលបានដីរួចហើយ ក្រុមការងារគម្រោងនឹងជំរុញគាំទ្រសម្បទានិកបន្ថែមនូវ (១).ចុះប្រមូលទិន្នន័យពីស្ថានភាពមុនពេលចូលតាំងទីលំនៅ ដើម្បីសិក្សាអំពីផែនការដាំដុះ (២).ការចងក្រងជាក្រុមផលិតទៅតាមប្រភេទដំណាំដែលមានសក្តានុពលនៅក្នុងភូមិសាស្ត្រដីសម្បទាន និងដោយផ្អែកលើតម្រូវការ (៣).ផ្ដល់សម្ភារៈកសិកម្ម និងធាតុចូលកសិកម្ម (៤).ពិនិត្យផ្តល់ផ្ទះសំណាញ់ និងជីកស្រះ និង(៥).ផ្តល់វគ្គបណ្តុះបណ្តាលសាលារៀនស្រែកសិករស្តីពីបច្ចេកទេសកសិកម្មគាំទ្រដល់ផលិតកម្មកសិកម្ម ជាដើម។ ចំពោះ បងប្អូនសម្បទានិក ត្រូវទៅចូលតាំងទីលំនៅឲ្យបានឆាប់ និងគ្រប់ៗគ្នា ហើយសាងសង់ជម្រក និងសង់ផ្ទះក្រោយពេលបងប្អូនទទួលបានដីពីគម្រោង និងសម្ភារសម្រាប់សាងសង់ លំនៅឋាន គម្រោងនឹងផ្តល់ជូន គ្រឿងបង្គំផ្ទះ ឈុតបង្គន់ មុង ភួយ កន្ទេល សូឡា ធុងទឹក ១០០០ លីត្រ ធុងចម្រោះ កៅស៊ូតង់ និងអង្ករពលកម្ម។