ឯកឧត្តមអនុរដ្ឋលេខាធិការ ឃឹម ហ្វីណង់ បន្តអញ្ជើញជាអធិបតីក្នុងពិធីចុះកិច្ចសន្យាផលិតកម្មស្រូវស្រងែស្រាល រវាងក្រុមហ៊ុន វិរៈ ប៊ុនថាំ គ្រុប និងសហគមន៍កសិកម្មទំនើបចំនួន៥ នៅខេត្តបាត់ដំបង

ចេញ​ផ្សាយ​ ៩ តុលា ២០២៥ 930

នៅថ្ងៃទី៦ និង៧ ខែតុលា ឆ្នាំ២០២៥ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាអធិបតីក្នុងពិធីចុះកិច្ចសន្យាផលិតកម្មស្រូវស្រងែស្រាល រវាងសហគមន៍កសិកម្មទំនើបចំនួន៥បន្ថែមទៀត ជាមួយក្រុមហ៊ុនវីរៈ ប៊ុនថាំគ្រុប របស់អ្នកឧកញ្ញា សូរ វីរៈ នៅក្នុងស្រុកថ្មគោល ស្រុកឯកភ្នំ ស្រុកបាណន់ ស្រុកសង្កែ និងស្រុងមោងឫស្សី ខេត្តបាត់ដំបង។ សហគមន៍កសិកម្មទំនើបទាំង៥ ដែលត្រូវចុះកិច្ចសន្យានៅពេលនេះរួមមាន៖ សហគមន៍កសិកម្មទំនើបស្រូវរូងជ្រៃមានជ័យ នៅស្រុកថ្មគោល សហគមន៍កសិកម្មទំនើបស្រូវ-អង្ករសុវត្ថិភាពស្រុកឯកភ្នំ នៅស្រុកឯកភ្នំ សហគមន៍កសិកម្មទំនើបស្រូវស្រុកបាណន់ នៅស្រុកបាណន់ សហគមន៍កសិកម្មទំនើបស្រូវប្រព័ន្ធធារាសាស្រ្តកង្ហត នៅស្រុកសង្កែ និងសហគមន៍កសិកម្មទំនើបស្រូវ-អង្ករគុណភាពមោងឫស្សី នៅស្រុកមោងឫស្សី។ ឯកឧត្តមអនុរដ្ឋលេខាធិការបានលើកឡើងថា តាមរយៈកិច្ចសន្យាទាំងនេះ ក្រុមហ៊ុនវីរៈ ប៊ុនថាំ គ្រុប នឹងប្រមូលទិញស្រូវស្រងែស្រាលពីប្រជាកសិករទាំង៥សហគមន៍ ដែលដំណាក់កាលទី១នេះក្នុងបរិមាណ ៣០៦០៧ តោន លើផ្ទៃដីទំហំ ៥៣២៧ ហិកតា ដោយមានរយៈពេលនៃការអនុវត្តកិច្ចសន្យាចាប់ពីខែវិច្ឆិកា ឆ្នាំ២០២៥ រហូតដល់ខែមីនា ឆ្នាំ២០២៦។ ទន្ទឹមនឹងនេះ ឯកឧត្តមអនុរដ្ឋលេខាធិការ ក៏បានសម្ដែងក្ដីរីករាយ និងអបអរសាទរចំពោះបងប្អូនប្រជាសិករដែលជាសមាជិកសហគមន៍កសិកម្មទំនើបទាំង៥ ដែលបានចុះកិច្ចសន្យាផលិតកម្ម ស្ដីពីការផលិត និងផ្គត់ផ្គង់ស្រូវស្រងែស្រាល ជាមួយក្រុមហ៊ុនវីរៈ ប៊ុនថាំ គ្រុប ដោយឯកឧត្តមថានេះ ជាឱកាសដ៏ល្អ និងជាក្ដីសង្ឃឹមដ៏ប្រាកដប្រជាមួយ សម្រាប់បងប្អូនប្រជាកសិករក្នុងការបង្កបង្កើនផលស្រូវស្រង៉ែ ដោយក្រុមហ៊ុនរង់ចាំទិញតាមកិច្ចសន្យា ក្នុងតម្លៃសមរម្យអាចទទួលយក និងផ្តល់ផលចំណេញច្រើន។ ជាចុងបញ្ជប់ ឯកឧត្តមអនុរដ្ឋលេខាធិការ បានផ្ដាំផ្ញើរឱ្យបងប្អូនប្រជាកសិករសមាជិកសហគមន៍ទាំង៥ ត្រូវខិតខំប្រឹងប្រែង និងយកចិត្តទុកដាក់គោរព និងអនុវត្តឱ្យបានខ្ជាប់ខ្ជួនទៅតាមលក្ខខណ្ឌនៃកិច្ចសន្យា៕