ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម និងដៃគូអភិវឌ្ឍន៍ បើកកិច្ចប្រជុំភាគីពាក់ព័ន្ធក្នុងខ្សែច្រវាក់តម្លៃស្រូវ និងដាក់ឱ្យអនុវត្តសាកល្បងសេវាច្រកចេញចូលតែមួយ (One-Stop Service)សម្រាប់ស្រូវផ្ការំដួល ឆ្នាំ២០២៦
ចេញផ្សាយ ២៤ កញ្ញា ២០២៦ 2207
នៅថ្ងៃទី២៣ ខែកញ្ញា ឆ្នាំ២០២៦ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការតម្រង់ទិសគម្រោង PCRL បានដឹកនាំជំនួបផ្លូវការលើកដំបូងនៃភាគីពាក់ព័ន្ធក្នុងខ្សែច្រវាក់តម្លៃស្រូវ ក្នុងស្មារតីលើកកម្ពស់ជីវភាពកសិករ និងពង្រឹងគុណភាពស្រូវកម្ពុជា។ កិច្ចប្រជុំរៀបចំធ្វើនៅស្រុកសូទ្រនិគម មានការគាំទ្រពីគម្រោង PCRL-MAFF/FAO ដែលបានប្រមូលផ្តុំតួអង្គគន្លឹះចំនួន៧០នាក់ រួមមាន៖ កសិករ អាជីវករប្រមូលទិញ អ្នកផ្គត់ផ្គង់ធាតុចូល អ្នកផ្តល់សេវាដ្រូន និងច្រូតកាត់ ព្រមទាំងតំណាងរោងម៉ាស៊ីនកិនស្រូវ ដើម្បីបង្កើតប្រព័ន្ធទំនាក់ទំនងការងាររួមមួយ។
សម្រាប់រដូវបង្កបង្កើនផលឆ្នាំ២០២៦ ការអនុវត្តសាកល្បងសេវាច្រកចេញចូលតែមួយ (One-Stop Service) នឹងផ្តោតលើការផលិត «ស្រូវផ្ការំដួល» ប្រកបដោយគុណភាព និងសុវត្ថិភាព ដោយផ្តល់អាទិភាពដល់កសិករដែលផលិតស្រូវដោយមិនប្រើប្រាស់ថ្នាំកសិកម្ម ប្រើប្រាស់ជីសរីរាង្គ និងទឹកខ្មេះធ្យូងជីវៈ ដើម្បីកែលម្អដី និងការពារដំណាំ ព្រមទាំងអនុវត្តប្រព័ន្ធតាមដានស្វែងរកប្រភព ដើម្បីធានាបាននូវប្រភពផលិតកម្មច្បាស់លាស់។ គម្រោងនេះនឹងរួមចំណែកជួយកសិករបង្កើនទិន្នផល និងគុណភាព កាត់បន្ថយថ្លៃដើម និងទទួលបានទីផ្សារច្បាស់លាស់ជាមួយតម្លៃសមរម្យ ខណៈរោងម៉ាស៊ីនកិនស្រូវ និងអ្នកនាំចេញអាចទទួលបានស្រូវមានគុណភាព និងប្រភពច្បាស់លាស់ ស្របតាមតម្រូវការ និងស្តង់ដារទីផ្សារអន្តរជាតិ។
កិច្ចសហការនេះត្រូវបានពង្រឹង តាមរយៈការបែងចែកភារកិច្ចច្បាស់លាស់រវាងវិស័យរដ្ឋ និងឯកជន ដោយក្នុងនោះ ក្រុមហ៊ុន Pisak Agri ទទួលបន្ទុកសម្របសម្រួលសេវាកម្ម រោងម៉ាស៊ីនកិនស្រូវ ញ៉ឹក សារិទ្ធ ធានាទីផ្សារទទួលទិញ ក្រុមហ៊ុន Penta Angkor ផ្គត់ផ្គង់ធាតុចូលជីសរីរាង្គ ហើយមន្ត្រីកសិកម្មឃុំ និងក្រុមការងារ PCRL ជាអ្នកបច្ចេកទេសគាំទ្រផ្ទាល់ដល់កសិករ។ ជំនួបនេះមិនត្រឹមតែជាកាតាលីករជំរុញសេដ្ឋកិច្ចមូលដ្ឋាន នៅស្រុកសូទ្រនិគមប៉ុណ្ណោះទេ ប៉ុន្តែថែមទាំងជាគំរូអភិវឌ្ឍន៍ប្រកបដោយចីរភាព សម្រាប់ពង្រីកទៅកាន់តំបន់ផ្សេងទៀតនាពេលអនាគត៕
