ព័ត៌មានផ្សេងៗទៀត
ឯកឧត្ដមអនុរដ្ឋលេខាធិការ ប៉ែន ផល្លីកា អញ្ជើញដឹកនាំក្រុមការងារជំនាញ ចុះពិនិត្យការប្រើឧបករណ៍នេសាទ ក្នុងរដូវបើកនេសាទ ស្ថិតក្នុងភូមិសាស្ត្រខេត្តកំពង់ឆ្នាំង
ចេញផ្សាយ ១ មីនា ២០២៦ 1253
នៅថ្ងៃទី១ ខែមីនា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្រ្តី ឌិត ទីណា បានអញ្ជើញដឹកនាំក្រុមការងារជំនាញចុះត្រួតពិនិត្យការនេសាទ នៅចំណុចភូមិវាលស្បូវ និងភូមិគៀនឃ្លាំង ឃុំអំពិលទឹក ក្នុងស្រុកកំពង់ត្រឡាច ខេត្តកំពង់ឆ្នាំង។
ដំណើរបេសកកម្ម មានការអមដំណើរដោយ ក្រុមការងារខណ្ឌរដ្ឋបាលជលផលកំពង់ឆ្នាំង សហការជាមួយអធិការដ្ឋានរដ្ឋបាលជលផលខាងត្បូងបឹងទន្លេសាប ប្រចាំការកន្លែងឡូត៌អភិរក្សជ្រោយស្តីស្រុកក្រគរខេត្តពោធិសាត់ ប៉ុស្តិ៍នគរបាលរដ្ឋបាលកំពង់ត្រឡាច សហគមន៍នេសាទព្រែកកន្លង ដោយប្រើប្រាស់មធ្យោបាយ កាណូត ១គ្រឿង កំលាំងសរុបចំនួន៨នាក់។
ប្រតិបត្តិការនេះ ជាលទ្ធផលសម្រេចបានរួមមាន៖ ធ្វើការអប់រំណែនាំដល់អ្នកដាក់សម្រាស់ ១ករណី និងឱ្យធ្វើការរុះរើចេញ។ រុះរើបំផ្លាញចោល របាំងសាច់អួនក្រឡាញឹក១ករណី ស្មើ១កន្លែង ប្រវែង៤០ម៉ែត្រ លបលូ១គ្រឿង។ រុះរើបំផ្លាញចោលរបាំងស្បៃមុង ១ករណី ស្មើ៦កន្លែង ប្រវែង១៨០ម៉ែត្រ លបលូ៦គ្រឿង និងបានចាក់ត្រីលែងចូលបឹងធម្មជាតិប្រមាណ១៥គីឡូក្រាម។
ក្នុងឱកាសនោះដែរ ឯកឧត្តម ប៉ែន ផល្លីកា បានណែនាំឱ្យប្រជានេសាទអនុវត្តន៍ឱ្យបានត្រឹមត្រូវតាមច្បាប់ជលផលបានកំណត់ សូមចូលរួមទាំងអស់គ្នាក្នុងកិច្ចការការពារ និងអភិរក្សធនធានជលផលបន្តទៀត ។ ជាចុងបញ្ចប់ ឯកឧត្តមបានកោតសរសើរ ថ្លែងអំណរគុណ និងសំណូមពរដល់ក្រុមការងារចម្រុះ ខិតខំជួយបន្តណែនាំ និងផ្សព្វផ្សាយបន្ថែម ដើម្បីឱ្យប្រជានេសាទគោរពគោលការណ៍នេះឱ្យបានគ្រប់ៗគ្នាជៀសវាងមានការរុះរើដោយកម្លាំងចម្រុះ ដែលនាំឱ្យមានការខាតបង់ថវិការបស់ពួកគាត់៕
