ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំកិច្ចប្រជុំស្ដីពីការរៀបចំពិធីប្រគល់សញ្ញាបត្រដល់និស្សិតនៃគ្រឹះស្ថានឧត្តមសិក្សាទាំង៣ របស់ក្រសួងកសិកម្ម រុក្ខាប្រមាញ់ និងនេសាទ

ចេញ​ផ្សាយ​ ២៤ មេសា ២០២៣ 2687

ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅថ្ងៃចន្ទ ទី២៤ ខែមេសា ឆ្នាំ២០២៣ បានអញ្ជើញដឹកនាំកិច្ចប្រជុំពិភាក្សា លើការរៀបចំពិធីប្រគល់សញ្ញាបត្រ ជូនដល់និស្សិតនៃគ្រឹះស្ថានឧត្តមសិក្សាទាំងបី របស់ក្រសួងកសិកម្ម រុក្ខាប្រមាញ់ និងនេសាទ។

ពិធីចែកសញ្ញាបត្រជូនដល់និស្សិតនៃគ្រឹះស្ថានឧត្តមសិក្សាទាំង៣៖ សាកលវិទ្យាល័យភូមិន្ទកសិកម្ម វិទ្យាស្ថានកសិកម្មកំពង់ចាម និងវិទ្យាស្ថានកសិកម្មព្រែកលៀប នឹងរៀបចំធ្វើនៅថ្ងៃចន្ទ ទី១៥ ខែឧសភា ឆ្នាំ២០២៣ នៅមជ្ឈមណ្ឌលពិព័រណ៍កោះពេជ្រ ក្រោមអធិបតីភាពសម្ដេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។

កិច្ចប្រជុំនេះ មានការចូលរួមពីសំណាក់ថ្នាក់ដឹកនាំនៃក្រសួងដែលជាគណៈកម្មការសម្របសម្រួលនិងគ្រប់គ្រងរួម ក៏ដូចជាថ្នាក់ដឹកនាំនៃសាកលវិទ្យាល័យទាំងបី ជាអាថិ៍៖ សាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម ដោយកិច្ចប្រជុំនេះ បានបែងចែកតួនាទី ភារកិច្ច ជូនដល់សមាជិក សមាជិកា នៃគណៈកម្មការ ធ្វើយ៉ាងណាឱ្យដំណើរការកម្មវិធីប្រព្រឹត្តទៅដោយរលូន ជាពិសេសធានាសុវត្ថិភាពដល់សម្ដេចនាយករដ្ឋមន្ដ្រី និងថ្នាក់ដឹកនាំសំខាន់ៗដែលនឹងអញ្ជើញជាអធិបតីនៅក្នុងពិធីនេះ។

សូមជម្រាបថា និស្សិតដែលនឹងចូលរួមទទួលសញ្ញាបត្រ នៅថ្ងៃចន្ទ ទី១៥ ខែឧសភា ឆ្នាំ២០២៣ ខាងមុខនេះ មានមកពីសាកលវិទ្យាល័យភូមិន្ទកសិកម្មចំនួន ២ ៤៣៣នាក់, វិទ្យាស្ថានជាតិកសិកម្មព្រែកលៀប ចំនួន ៣១៥, និងវិទ្យាស្ថានជាតិកសិកម្មកំពង់ចាម ចំនួន ៥៣១នាក់៕

សាកលវិទ្យាល័យភូមិន្ទកសិកម្ម

វិទ្យាស្ថានជាតិកសិកម្មព្រែកលៀប

វិទ្យាស្ថានជាតិកសិកម្ម កំពង់ចាម