ឯកឧត្តមអនុរដ្ឋលេខាធិការ វ៉ា ពិសី អញ្ជើញដឹកនាំក្រុមការងារចុះពិនិត្យវឌ្ឍនភាពការងារនិងដោះស្រាយបញ្ហាប្រឈមនានាក្នុងការផ្តល់សេវារដ្ឋបាលក្នុងវិស័យកសិកម្ម តាមយន្តការច្រកចេញចូលតែមួយ នៅខេត្តរតនគិរី

ចេញ​ផ្សាយ​ ៨ មីនា ២០២៦ 2150

នៅថ្ងៃទី៦ ខែមីនា ឆ្នាំ២០២៦ ឯកឧត្តម វ៉ា ពិសី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដម  អ៊ឹម ស៊ីថុល រដ្ឋលេខាធិការប្រចាំការនិងជាប្រធានលេខាធិការដ្ឋាននៃគណៈកម្មាធិការដឹកនាំការងារកំណែទម្រង់វិមជ្ឈការ និងវិសហមជ្ឈការក្រសួងកសិកម្ម រុក្ខាប្រមាញ់និងនេសាទ បានអញ្ជើញដឹកនាំក្រុមការងារជួបប្រជុំ និងពិភាក្សាការងារអំពីវឌ្ឍនភាពនៃការអនុវត្តមុខងារក្នុងវិស័យកសិកម្ម រុក្ខាប្រមាញ់ និងនេសាទ ដែលបានផ្ទេរទៅរដ្ឋបាលថ្នាក់ក្រោមជាតិ នៅខេត្តរតនគិរី។  
កិច្ចប្រជុំដំបូងនេះធ្វើឡើងនៅសាលប្រជុំមន្ទីរកសិកម្មខេត្តរតនគិរី ដោយមានការចូលរួមពីលោក ង៉ាន ណានី អគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ លោក ប៉ែន វុទ្ធី ប្រធាននាយកដ្ឋាននីតិកម្មកសិកម្ម និងសហការី តំណាងអគ្គនាយកដ្ឋានកសិកម្ម តំណាងរដ្ឋបាលជលផល តំណាងអគ្គនាយកដ្ឋានសុខភាពសត្វ និងផលិតកម្មសត្វ   លោក លោកស្រីក្រុមការងារកំណែទម្រង់វិមជ្ឈការនិងវិសហមជ្ឈការក្រសួងកសិកម្ម ជាមួយលោក ង៉ែត ធារ៉ា អនុប្រធានមន្ទីរកសិកម្មខេត្តរតនគិរី តំណាងលោកប្រធានមន្ទីរកសិកម្មខេត្តរតនគិរី ព្រមទាំងមន្ត្រីពាក់ព័ន្ធរបស់មន្ទីរផងដែរ។ 
ក្នុងនោះដែរ ឯកឧត្តម វ៉ា ពិសី បានស្តាប់សេចក្តីរាយការណ៍អំពីវឌ្ឍនភាពការងារកន្លងមក ព្រមទាំងពិនិត្យបញ្ហាប្រឈម សំណូមពរ និងដំណោះស្រាយនានាដែលបានលើកឡើង។ ទន្ទឹមគ្នានោះ ឯកឧត្តមអនុរដ្ឋលេខាធិការ បានណែនាំដល់ក្រុមការងារ និងមន្រ្តីជំនាញពាក់ព័ន្ធឱ្យបន្តពិនិត្យតាមដានដោយយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់  ចំពោះការអនុវត្តកំណែទម្រង់វិមជ្ឈការ និងវិសហមជ្ឈការ ក្នុងវិស័យកសិកម្ម រុក្ខាប្រមាញ់ និងនេសាទ ដែលក្រសួងបានផ្ទេរឱ្យរដ្ឋបាលថ្នាក់ក្រោមជាតិ ។ 
នៅថ្ងៃបន្ទាប់ឯកឧត្ដម ក៏បានជួបប្រជុំនិងពិភាក្សា ជាមួយ ឯកឧត្ដម ងិន ណែល អភិបាលរងខេត្តរតនគិរី លោក បួន ចំរើន តំណាងក្រសួងមហាផ្ទៃ លោក សយ សូណា ប្រធានមន្ទីរកសិកម្ម និងលោក លោកស្រីក្រុមការងារកំណែទម្រង់ វិមជ្ឈការនិងវិសហមជ្ឈការក្រសួងកសិកម្ម និងមន្ត្រីពាក់ព័ន្ធ នៅសាលប្រជុំសាលាខេត្តរតនគិរី។ ជាមួយគ្នានេះ ឯកឧត្តម បានធ្វើការជជែកពិភាក្សាគ្នា អំពីសេវាដែលក្រសួងកសិកម្ម បានផ្ទេរទៅរដ្ឋបាលថ្នាក់ក្រោមជាតិ រួមមាន សេវាអនុវិស័យជលផល សេវាសុខភាពសត្វនិងផលិតកម្មសត្វ និងសេវាជីនិងថ្នាំកសិកម្ម។ ទន្ទឹមនឹងនេះ ក្រុមការងារក៏បានជជែកពិភាក្សាគ្នានិងពន្យល់ពីនីតិវិធីនិងបច្ចេកទេសក្នុងការផ្តល់សេវារដ្ឋបាលក្នុងវិស័យកសិកម្មថែមផងដែរ។
ក្រោយកិច្ចប្រជុំ ឯកឧត្ដមអនុរដ្ឋលេខាធិការ ក៏បានអញ្ជើញដឹកនាំក្រុមការងារ និងមន្រ្តីជំនាញពាក់ព័ន្ធចុះពិនិត្យអង្គភាពច្រកចេញចូលតែមួយនៃរដ្ឋបាលខេត្តនិងទៅទីតាំងសត្តឃាតដ្ឋានក្រុងបានលុង នៅក្នុងខេត្តរតនគិរី ថែមទៀតផង៕