ព័ត៌មានផ្សេងៗទៀត
ក្រសួងកសិកម្ម រុក្ខាប្រមាញ់ និងនេសាទ បន្តធ្វើតេស្តរហ័សរកសារធាតុញៀន
ចេញផ្សាយ ៣០ កញ្ញា ២០២៥ 601
នៅថ្ងៃទី៣០ ខែកញ្ញា ឆ្នាំ២០២៥នេះ អនុវត្តតាមបទបញ្ជាលេខ ០១ បប របស់រាជរដ្ឋាភិបាលស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ និងផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លេីកទី១០ ក្រសួងកសិកម្ម រុក្ខាប្រមាញ់ និងនេសាទ បានបន្តអនុវត្តការធ្វើតេស្តរហ័សក្នុងទឹកមូត្ររកសារធាតុញៀន ក្នុងចំណោម មន្ត្រីរាជការនៃអគ្គនាយកដ្ឋានកៅស៊ូ វិទ្យាស្ថានជាតិកសិកម្ម ព្រែកលៀប និងវិទ្យាស្ថានស្រាវជ្រាវកៅស៊ូកម្ពុជា ដោយមានអ្នកចូលរួមសរុបចំនួន ៣១១នាក់ និងទទួលបានលទ្ធផលអវិជ្ជមានទាំងអស់គ្នា។
កម្មវិធីនេះប្រព្រឹត្តទៅក្រោមអធិបតីភាព ឯកឧត្តម គង់ ច័ន្ទវាសនា រដ្ឋលេខាធិការ និងជាប្រធានក្រុមការងារផ្សព្វផ្សាយ អប់រំ បង្ការ ទប់ស្កាត់កាប្រើប្រាស់ និងជួញដូរគ្រឿងញៀនប្រចាំក្រសួង ដោយមានការចូលរួមពីថ្នាក់ដឹកនាំក្រសួង និងអង្គភាពពាក់ព័ន្ធ។ ឯកឧត្តមបានគូសបញ្ជាក់ថា ការធ្វើតេស្តនេះគឺដើម្បីធានាភាពស្អាតស្អំ និងក្រើនរំលឹកមន្រ្តីរាជការទាំងអស់ជាប់ជាប្រចាំអំពីគ្រោះថ្នាក់នៃគ្រឿងញៀន។
សូមគូសបញ្ជាក់ថា ឯកឧត្តមរដ្ឋមន្ត្រី ឌិត ទីណា ជំរុញអនុវត្តការធ្វើតេស្តរហ័សរកសារធាតុញៀនជាបន្តបន្ទាប់ដូចភ្លៀងរលឹម ដើម្បីធានាថា ថ្នាក់ដឹកនាំ និងមន្ត្រីរាជការទាំងអស់នៃក្រសួងកសិកម្ម រុក្ខាប្រមាញ់ និងនេសាទ នៅឆ្ងាយពីគ្រឿងញៀន ស្របតាមអភិក្រម "សម្អាតចកចេញពីផ្ទៃបឹង" និង "រក្សាផ្ទៃបឹងឱ្យថ្លាជាប់ជាប្រចាំ" ដើម្បីចូលរួមកសាងសង្គមកម្ពុជាគ្មានគ្រឿងញៀន៕
