ថ្នាក់ដឹកនាំក្រសួងកសិកម្ម ដឹកនាំកិច្ចប្រជុំពិនិត្យវឌ្ឍនភាព៩ខែ និងជំរុញការអភិវឌ្ឍវិស័យកសិកម្ម ដើម្បីលើកកម្ពស់ផលិតភាព និងជីវភាពប្រជាពលរដ្ឋនៅសៀមរាប

ចេញ​ផ្សាយ​ ២៥ កញ្ញា ២០២៦ 2027

នៅថ្ងៃទី២៥ ខែកញ្ញា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតី​​ភាព ក្នុ​ងកិច្ចប្រជុំពិនិត្យវឌ្ឍនភាពការងារកសិកម្ម រុក្ខាប្រមាញ់ និងនេសាទ រយៈពេល៩ខែ ឆ្នាំ២០២៦ ក្នុងខេត្ត​សៀមរាប។ ពិធីមានការចូលរួមពី ឯកឧត្តម ជិម រ៉ា សមាជិកក្រុមប្រឹក្សាខេត្ត​ លោក ទារ គឹមសុទ្ធ ប្រធានមន្ទីរកសិកម្មខេត្ត អនុប្រធានមន្ទីរកសិកម្ម នាយខណ្ឌរដ្ឋបាលព្រៃឈើ នាយខណ្ឌរដ្ឋបាលជលផល អាជ្ញាធរមូលដ្ឋាន ព្រមទាំងមន្ត្រីជំនាញពាក់ព័ន្ធ។ 
កិច្ចប្រជុំនេះរៀបចំឡើង ក្នុងគោលបំណងពិនិត្យ និងបូកសរុបលទ្ធផលការងារដែល​សម្រេចបានក្នុង​រយៈពេល៩ខែ ឆ្នាំ២០២៦ ព្រមទាំងពិនិត្យលើបញ្ហាប្រឈម និងការងារដែលនៅសេសសល់ក្នុង​វិស័យកសិកម្ម រុក្ខាប្រមាញ់ និងនេសាទ ដើម្បីកំណត់វិធានការសមស្របសម្រាប់ការអនុវត្តការងារបន្ត​ឱ្យកាន់តែមានប្រសិទ្ធភាព។
ជាមួយគ្នានេះ អង្គប្រជុំបានផ្តោតសំខាន់លើ ការបន្តពង្រឹងប្រសិទ្ធភាពការងារជំនាញ ការជំរុញ ផលិតកម្ម​កសិកម្ម ការគ្រប់គ្រងធនធានធម្មជាតិ និងការអភិវឌ្ឍវិស័យរុក្ខាប្រមាញ់ និងនេសាទ សំដៅរួមចំណែកលើកកម្ពស់ផលិតភាព សេដ្ឋកិច្ចជនបទ និងជីវភាពរស់នៅ របស់ប្រជាពលរដ្ឋ​ក្នុងខេត្តសៀមរាប៕