ឯកឧត្តមរដ្ឋលេខាធិការ ហាស់ សារ៉េត តំណាងដ៏ខ្ពង់ខ្ពស់ ឯកឧត្តមរដ្ឋមន្រ្តី ឌិត ទីណា អញ្ជើញជាអធិបតីភាពក្នុងពិធីសំណេះសំណាលជាមួយប្រជានេសាទ នៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង

ចេញ​ផ្សាយ​ ៨ កុម្ភៈ ២០២៥ 3116

នៅព្រឹកថ្ងៃទី០៦ ខែមករា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការ​ក្រសួង​កសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ ឯកឧត្តមរដ្ឋមន្រ្តី ឌិត ទីណា បានអញ្ជើញជាអធិបតីភាពក្នុងពិធីសំណេះសំណាល​ជាមួយ​បងប្អូន​ប្រជា​នេសាទ ដែលប្រកបរបរអូសលៀស នៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។

ដំណើរបេសកកម្មនេះ មានការចូលរួមអមដំណើរពី ឯកឧត្តម ប៉ែន ផល្លីកា ឯកឧត្តម ទឹម បូរក្ស លោកជំទាវ អ៊ឹម រចនា អនុរដ្ឋលេខាធិការ ឯកឧត្តម ពុំ សុថា ប្រធានរដ្ឋបាលជលផល ឯកឧត្តម យ៉ង ភិរម្យ អភិបាលរងខេត្តកំពង់ឆ្នាំង លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង នាយខណ្ឌជលផល កងកម្លាំង មន្រ្តី​ជំនាញ​ពាក់ព័ន្ធ អាជ្ញាធរខេត្ត និងប្រជានេសាទក្នុងឃុំឆ្នុកទ្រូ សរុបប្រមាណ​ជាង​១០០នាក់។

ក្នុងពិធីសំណេះសំណាល ឯកឧត្តមរដ្ឋលេខាធិការ ហាស់ សារ៉េត បានពាំនាំ​នូវការ​ផ្តាំផ្ញើសួរសុខទុក្ខពីសំណាក់ឯកឧត្តមរដ្ឋមន្រ្តី ឌិត ទីណា ជូនដល់បងប្អូន​ប្រជានេសាទទាំងអស់។ ជាមួយគ្នានេះដែរ ឯកឧត្តមរដ្ឋលេខាធិការ បាន​អនុញ្ញាត​​ឱ្យប្រជានេសាទលើកឡើង ពីបញ្ហានានាដែលកំពុងប្រឈមនៅក្នុងការប្រកបរបរនេសាទលៀស ហើយក្រសួងកសិកម្ម ដែលជាសេនាធិការរាជរដ្ឋាភិបាល នឹងចូលរួម​ជួយ​ដោះស្រាយ​បញ្ហាប្រឈមទាំងនោះ​ជូនប្រជាជន។

តាមរយៈការពិភាក្សាយ៉ាងផុលផុស រវាងប្រជានេសាទ គណៈអធិបតី និងជំនាញជលផល ប្រជានេសាទបានយល់ថា យុទ្ធនាការ​បង្ក្រាបបទល្មើសនេសាទអូសលៀសដោយប្រើម៉ាស៊ីន ពីសំណាក់​កងអន្តរាគមន៍ គឺជាការអនុវត្តត្រឹមត្រូវតាមច្បាប់។

ឯកឧត្តមរដ្ឋលេខាធិការ ហាស់ សារ៉េត បានពន្យល់បន្ថែមទៅកាន់អង្គពិធីថា ការរឹតបន្តឹងការអនុវត្តច្បាប់របស់កម្លាំងអន្តរាគមន៍ និងមន្ដ្រីជំនាញពាក់ព័ន្ធ ធ្វើឡើងក្នុងគោលដៅថែរក្សាធនធានជលផល សម្រាប់កូនចៅជំនាន់ក្រោយ។ ការងារនេះ មិនអាចសម្រេចបានទេ បើគ្មានការចូលរួមពីបងប្អូនប្រជានេសាទ ប្រើប្រាស់ឧបករណ៍នេសាទស្របតាមច្បាប់កំណត់ ដោយធ្វើឡើង​ចេញពីបេះដូង​ស្រឡាញ់ ដើម្បីរក្សានិរន្ដរភាពធនធាននិងសម្បត្តិធម្មជាតិរបស់យើង។

តាមរយៈ​ឯកឧត្តមរដ្ឋលេខាធិការជាប្រធានអង្គប្រជុំ បងប្អូនប្រជានេសាទបានស្នើសុំរាជរដ្ឋាភិបាល ជាពិសេសក្រសួង ដាក់បញ្ចូល​ការនេសាទលៀសដោយប្រើប្រាស់ម៉ាស៊ីន ទៅក្នុងច្បាប់ជលផល តាមបច្ចេកទេស ដោយមានកំណត់ទីតាំង និងពេលវេលា​ច្បាស់លាស់។ ទាំងប្រជានេសាទ និងអ្នកប្រមូលទិញលៀស បានស្រុះស្រួលមតិ នឹងសន្យា មិនអូសនិងមិនប្រមូលទិញលៀសតូចៗនោះទេ៕