ឯកឧត្តមបណ្ឌិតរដ្ឋលេខាធិការ មាស ពិសិដ្ឋ អញ្ជើញដឹកនាំក្រុមការងារ ជួបសំណេះសំណាលជាមួយថ្នាក់ដឹកនាំ និងមន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងសំណេះសំណាលជាមួយកសិករដែលផលិតស្រូវប្រាំង ក្នុងខេត្តត្បូងឃ្មុំ

ចេញ​ផ្សាយ​ ១៨ មករា ២០២៥ 3001

នៅព្រឹកថ្ងៃទី១៦ ខែមករា ឆ្នាំ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តមអនុរដ្ឋលេខាធិការ ចាន់ សុវត្ថិភាព និងឯកឧត្តម សាយ សុភភោគា​បានជួបសំណេះសំណាលជាមួយ ឯកឧត្តម គន់ រ័ត្នមុនី អភិបាលរងនៃគណៈអភិបាលខេត្តត្បូងឃ្មុំ  ដែលទទួលបន្ទុកិច្ចការកសិកម្ម ថ្នាក់ដឹកនាំ និងមន្ត្រីមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងមន្ត្រីកសិកម្មឃុំ សរុបចំនួន ៥៦ នាក់ ។

លោក ហេង ពិសិដ្ឋ ប្រធានមន្ទីរ បានរាយការណ៍ថា ឆ្នាំនេះ ផ្ទៃដីបង្កបង្កើនផលស្រូវរដូវប្រាំងនៅទូទាំងខេត្ត មានជាង ១៥ ០០០ហិកតា (ប្រមាណ ៩០% ប្រើប្រាស់ពូជOM) គឺកើនលើសឆ្នាំ២០២៣ ប្រមាណជា ២ ០០០ហិកតា ដែលបណ្តាលឱ្យភូមិសាស្ត្រមួយចំនួនប្រឈមនឹងការខ្វះខាតទឹកស្រោចស្រព ហើយត្រូវបានអាជ្ញាធរខេត្ត និងស្រុក ចុះជួយអន្តរាគមន៍បូមទឹកសង្គ្រោះបានមួយចំនួន។

បន្ទាប់ពីស្តាប់សេចក្តីរាយការណ៍របស់លោកប្រធានមន្ទីររួច  ឯកឧត្តមរដ្ឋលេខាធិការ បានជម្រាប និងក្រើនរំឭកអំពីកម្មវិធីគោលនយោបាយថ្មីរបស់រាជរដ្ឋាភិបាល យុទ្ធសាស្ត្ររបស់ក្រសួង ក្នុងការធ្វើឱ្យសម្រេចគោលនយោបាយទាំងនោះ និងសភាពការណ៍ទូទៅនៅក្នុងវិស័យ ។ ឯកឧត្តមក៏បានណែនាំឱ្យមន្ត្រីប្រឹងប្រែងធ្វើការងារ ដើម្បីផ្តល់សេវាកម្មបានកាន់តែល្អជូនប្រជាជន ហើយទប់ស្កាត់ និងវាយបកចំពោះការផ្សព្វផ្សាយព័ត៌មានមិនពិត ឬ មិនល្អអំពីរាជរដ្ឋាភិបាល ក្រសួង មន្ទីរ និងមន្ត្រីយើង ជាពិសេសគឺត្រូវចេះពន្យល់ ឬ ផ្សព្វផ្សាយអំពីមូលហេតុដែលធ្វើឱ្យស្រូវ និងកសិផលមួយចំនួនធ្លាក់ថ្លៃ នៅឆ្នាំនេះ ។

នៅរសៀលថ្ងៃនោះ អមដំណើរដោយឯកឧត្តមអភិបាលខេត្ត លោកប្រធានមន្ទីរ លោកអភិបាលស្រុកក្រូចឆ្មារ ក្រុមប្រឹក្សាឃុំ និងប្រធានសហគមន៍កសិកម្មមួយចំនួន ឯកឧត្តមរដ្ឋលេខាធិការ បានជួបសំណេះសំណាលជាមួយកសិករប្រមាណ ១៥០ នាក់ ដែលផលិតស្រូវប្រាំង នៅភូមិបារាយណ៍ ឃុំឈូក និងភូមិអំពិល ឃុំប៉ើស១ ស្រុកក្រូចឆ្មារ ខេត្តត្បូងឃ្មុំ ដើម្បីជម្រាប និងពន្យល់អំពីកម្មវិធីគោលនយោបាយរបស់រាជរដ្ឋាភិបាលស្តីពីវិស័យកសិកម្ម យុទ្ធសាស្ត្រ និងការប្រឹងប្រែងរបស់ក្រសួង មន្ទីរ និងអាជ្ញាធរមូលដ្ឋាន ហើយពិគ្រោះ ដើម្បីក្តាប់បាននូវបញ្ហាប្រឈម និងសំណូមពររបស់បងប្អូនប្រជាកសិករ ។ ឯកឧត្តមរដ្ឋលេខាធិការក៏បានសំដែងនូវការអបអរសាទរចំពោះការខិតខំប្រឹងប្រែងរបស់ប្រជាកសិករ ដែលធ្វើឱ្យស្រូវទទួលបានទិន្នផលខ្ពស់ ហើយក៏បានពន្យល់អំពីមូលហេតុដែលធ្វើឱ្យស្រូវពូជ OM កំពុងចុះថ្លៃ និងបញ្ជាក់អំពីការយកចិត្តទុកដាក់ក្នុងការផ្តល់កិច្ចអន្តរាគមន៍របស់ប្រមុខរាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ មន្ទីរកសិកម្មខេត្ត និងអាជ្ញាធរដែនដី ដើម្បីជួយរកដំណោះស្រាយជូនប្រជាកសិករ ។

ជាមួយគ្នានោះដែរ ឯកឧត្តមបណ្ឌិតរដ្ឋលេខាធិការ បានពាំនាំប្រសាសន៍របស់ ឯកឧត្តមរដ្ឋមន្ត្រី ដែលណែនាំកសិករឱ្យពិចារណាផលិតពូជស្រូវក្រអូប និងពូជស្រូវក្នុងស្រុកផ្សេងទៀត ដែលមានទីផ្សារក្នុងស្រុក ដោយសារមានអ្នកទទួលទិញច្បាស់លាស់ ។ ឯកឧត្តមក៏បានណែនាប្រជាកសិករឱ្យពិចារណាចងក្រងគ្នាជាសហគមន៍កសិកម្មទំនើប ដើម្បីប្រមូលផ្តុំកម្លាំងផលិត ដែលអាចកាត់បន្ថយថ្លៃដើម ហើយមានលទ្ធភាពខ្ពស់ក្នុងការឆ្លើយតបនឹងតម្រូវការទីផ្សារ ៕