ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញចុះជួបសំណេះសំណាលជាមួយមន្រ្តីកសិកម្មឃុំខេត្តព្រះសីហនុ

ចេញ​ផ្សាយ​ ២០ វិច្ឆិកា ២០២៥ 2357

នៅព្រឹកថ្ងៃទី១៩ ខែវិច្ឆិកា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះជួបសំណេះសំណាលជាមួយមន្រ្តីកសិកម្មឃុំចំនួន២១រូប ក្នុងខេត្តព្រះសីហនុ។ កម្មវិធីនេះប្រព្រឹត្តទៅ នៅសាលប្រជុំរដ្ឋបាលស្រុកព្រៃនប់ ដោយមានការចូលរួមពី ឯកឧត្តមអនុរដ្ឋលេខាធិការ ឡោ រស្មី លោកប្រធានមន្ទីរកសិកម្ម រុក្ខាប្រមាញ់ និងនេសាទ លោកស្រីអភិបាលរងស្រុក ព្រមទាំងមន្ត្រីរាជការមន្ទីរ និងរដ្ឋបាលស្រុកផងដែរ។ 
ក្នុងពេលសំណេះសំណាល ឯកឧត្តមបានលើកឡើងអំពីបច្ចុប្បន្នភាពនៃវិស័យកសិកម្មកម្ពុជា,​ កម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាលកម្ពុជាពាក់ព័ន្ធនឹងវិស័យកសិកម្ម, គោលនយោបាយមាន៤ (មានហូប មានបាន មានប្រើ និងមានរហូត) របស់ក្រសួងក្នុងការអភិវឌ្ឍវិស័យកសិកម្ម និងអាទិភាពរបស់មន្ទីរក្នុងការជំរុញអភិវឌ្ឍវិស័យកសិកម្មក្នុងខេត្តព្រះសីហនុ ព្រមទាំងបានតម្រង់ទិសការអនុវត្តការងាររបស់មន្ត្រីកសិកម្មឃុំទាំង២១រូប និងលើកទឹកចិត្តឱ្យអនុវត្តតួនាទី និងភារកិច្ចប្រកបដោយការទទួលខុសត្រូវខ្ពស់ និងជួយប្រជាកសិករឱ្យកាន់តែសកម្មថែមទៀតក្នុងការកាត់បន្ថយថ្លៃដើមផលិត ផ្សារភ្ជាប់ទៅទីផ្សារ និងទទួលបានតម្លៃសមរម្យ។ 
ទន្ទឹមនឹងនេះ ឯកឧត្តមរដ្ឋលេខាធិការ បានលើកទឹកចិត្តឱ្យមន្ទីរកសិកម្ម ជួយសម្របសម្រួលផ្តល់ការស្នាក់នៅរបស់មន្រ្តីកសិកម្មឃុំដែលមកពីឆ្ងាយ និងជួយឱ្យមន្រ្តីទាំង២១រូប មានសកម្មភាពផ្ទាល់ក្នុងវិស័យកសិកម្ម នៅតាមឃុំគោលដៅដែលពួកគាត់ទទួលបន្ទុក ដើម្បីផ្សារភ្ជាប់ទ្រឹស្តី  និងការអនុវត្តជាក់ស្តែង និងធ្វើជាគម្រូក្នុងការអនុវត្តសម្រាប់ប្រជាកសិករ។ 
ក្រោយការជួបសំណេះសំណាល  ឯកឧត្តមបានបន្តចុះសាកសួរសុខទុក្ខកសិករដាំបន្លែ និងចិញ្ចឹមសត្វដែលទទួលបានការជួយគាំទ្រពីគម្រោងរបស់ក្រសួង ក្នុងស្រុកព្រៃនប់ និងកំពង់សិលា ដោយពិនិត្យឃើញថា ប្រជាកសិករមានជីវភាពល្អប្រសើរជាលំដាប់ មានផ្ទះសម្បែងសមរម្យ   និងអាចបញ្ជូនកូនទៅរៀនបន្តនៅភ្នំពេញ ដោយពឹងពាក់លើមុខរបរក្នុងវិស័យកសិកម្ម។ 
ជាមួយគ្នានេះ ប្រជាកសិករបានសម្តែងនូវទឹកចិត្តសប្បាយរីករាយចំពោះការជួយគាំទ្ររបស់ក្រសួងកសិកម្ម រុក្ខាប្រមាញ់ និងនេសាទ តាមរយៈគម្រោង ASPIRE ដែលបានជួយកែប្រែជីវភាពរស់នៅរបស់ពួកគាត់បានល្អប្រសើរឡើង៕