ព័ត៌មានផ្សេងៗទៀត
ឯកឧត្ដមរដ្ឋលេខាធិការ សេន សុវណ្ណ អញ្ជើញជាអធិបតីភាពក្នុងពិធីបិទសិក្ខាសាលាស្តីពី «ការអនុវត្តគោលការណ៍ណែនាំសម្រាប់ដោះស្រាយហានិភ័យជំងឺឆ្លងក្នុងការធ្វើពាណិជ្ជកម្មសត្វព្រៃ»
ចេញផ្សាយ ៦ កុម្ភៈ ២០២៦ 2766
នាថ្ងៃទី៥ ខែកុម្ភៈ ឆ្នាំ២០២៦ ឯកឧត្ដម សេន សុវណ្ណ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការបច្ចេកទេសសុខភាពតែមួយ បានអញ្ជើញជាអធិបតីភាពក្នុងពិធីបិទសិក្ខាសាលាស្ដីពី «ការអនុវត្តគោលការណ៍ណែនាំសម្រាប់ដោះស្រាយហានិភ័យជំងឺឆ្លងក្នុងការធ្វើពាណិជ្ជកម្មសត្វព្រៃ» នៅខេត្តសៀមរាប។
សិក្ខាសាលានេះមានអ្នកចូលរួម មកពីរដ្ឋបាលព្រៃឈើ រដ្ឋបាលជលផល អគ្គនាយកដ្ឋានផលិតកម្ម និងបសុព្យាបាល តំណាងអគ្គនាយកដ្ឋានគយនិងរដ្ឋាករកម្ពុជា នាយកដ្ឋានប្រយុទ្ធប្រឆាំងនឹងជំងឺឆ្លង អគ្គនាយកដ្ឋានរដ្ឋបាលការពារនិងអភិរក្សធម្មជាតិ មន្ទីរកសិកម្ម រុក្ខាប្រមាញ់ និងនេសាទខេត្តកណ្តាល កំពង់ស្ពឺ ព្រះសីហនុ កំពង់ចាម កំពង់ធំ កំពង់ឆ្នាំង និងពោធិសាត់ អង្គការសុខភាពសត្វពិភពលោក អង្គការ FAO, WCS, US-CDC បណ្តាកសិដ្ឋានចិញ្ចឹមបង្កាត់សត្វស្វាក្តាម និងគ្រូឧទ្ទេសនាមមកពីអូស្រ្តាលី ចក្រភពអង់គ្លេស សឹង្ហបុរី សរុបចំនួន ៦៣នាក់។
សិក្ខាសាលានេះមានគោលបំណង៖ បង្កើនការយល់ដឹងក្នុងចំណោមភាគីពាក់ព័ន្ធស្តីពីហានិភ័យឆ្លងជំងឺក្នុងពាណិជ្ជកម្មសត្វព្រៃនៅកម្ពុជានិងគោលការណ៍ណែនាំរបស់អង្គការ (WOAH) កំណត់ខ្សែច្រវាក់ពាណិជ្ជកម្មសត្វព្រៃជាអាទិភាព ឬចំណុចប្រទាក់ក្រឡាគ្នាសម្រាប់ការវាយតម្លៃហានិភ័យ កំណត់ភាគីពាក់ព័ន្ធសំខាន់ៗ និងវិភាគតួនាទី វាយតម្លៃហានិភ័យនៃជំងឺឆ្លងដែលមានការចូលរួមនៅក្នុងខ្សែច្រវាក់ផ្គត់ផ្គង់ជាក់លាក់ រៀបចំជម្រើសកាត់បន្ថយហានិភ័យ រៀបចំប្រព័ន្ធទំនាក់ទំនងជាក់លាក់ លើកកម្ពស់កិច្ចសហការសម្របសម្រួលរវាងស្ថាប័នរដ្ឋាភិបាល អង្គការក្រៅរដ្ឋាភិបាល និងភាគីពាក់ព័ន្ធ ស្តីពីពាណិជ្ជកម្មសត្វព្រៃ និងការគ្រប់គ្រងហានិភ័យសុខភាព៕
