ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចុះពិនិត្យស្ថានភាពដំណាំស្រូវប្រាំង ដែលបានទទួលទឹកពីការបូមទម្លាក់ពីទំនប់ម្កាក់ ចូលតាមប្រឡាយខ្នាត នៅក្នុងខេត្តសៀមរាប
ចេញផ្សាយ ៣១ មករា ២០២៥ 3020
នៅថ្ងៃទី៣០ ខែមករា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយថ្នាក់ដឹកនាំការិយាល័យក្សេត្រសាស្ត្រ និងផលិតភាពកសិកម្ម តំណាងរដ្ឋបាលស្រុក អាជ្ញាធរឃុំ និងមន្ត្រីកសិកម្មឃុំ បានអញើញចុះពិនិត្យស្ថានភាពដំណាំស្រូវប្រាំង ដែលបានទទួលទឹកពីការបូមទម្លាក់ពីទំនប់ម្កាក់ ចូលតាមប្រឡាយខ្នាត ស្ថិតនៅក្នុងភូមិសាស្ត្រ ឃុំស្ពានត្នោត ស្រុកជីក្រែង ខេត្តសៀមរាប។
ដំណើរចុះពិនិត្យនោះ ធ្វើឡើងបន្ទាប់ពីលោកជំទាវ ងិន សូនាថ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយអមដំណើរជាមួយថ្នាក់ដឹកនាំមន្ទីរកសិកម្ម តំណាងរដ្ឋបាលស្រុកជីក្រែង អាជ្ញាធរភូមិឃុំ បានចុះអន្តរាគមន៍បូមទឹកសង្គ្រោះស្រូវប្រាំង ដែលកំពុងប្រឈមការខ្វះទឹក ចំនួន៥០០ហិកតា នៅឃុំស្ពានត្នោត កាលពីថ្ងៃទី២៨ ខែមករា ឆ្នាំ២០២៥។
ឯកឧត្តមរដ្ឋលេខាធិការ បានគូសបញ្ជាក់ថា ថ្វីត្បិតតែមានការជួយអន្តរាគមន៍ក៏ដោយ ប៉ុន្តែបរិមាណទឹកដែលមាន មិនសមស្របទៅនឹងផ្ទៃដីដែលប្រជាកសិករបានដាំដុះ ដែលធ្វើឱ្យដំណាំស្រូវទាំងនោះមួយចំនួនកំពុងប្រឈម នៅពេលខាងមុខ ដោយសារទឹកនៅក្នុងអាងប្រើប្រាស់អស់លទ្ធភាព។ ចំពោះប្រភពទឹកនៅក្នុងអាងទំនប់ម្កាក់នេះ គឺសម្រាប់យកមកប្រើប្រាស់ជាទឹកស្អាត ចិញ្ចឹមសត្វ និងសម្រាប់ប្រជាពលរដ្ឋរាប់ម៉ឺននាក់នៅក្នុងស្រុកផងដែរ។
នាឱកាសនោះ ឯកឧត្តមរដ្ឋលេខាធិការ បានជំរុញលើកទឹកចិត្តដល់មន្ត្រីជំនាញ អាជ្ញាធរថ្នាក់ក្រោមជាតិ និងប្រជាកសិករ បន្តសហការគ្នាស្វែងរកមធ្យោបាយឱ្យអស់លទ្ធភាពនៅក្នុងការជួយសង្គ្រោះដំណាំស្រូវដែលរងផលប៉ះពាល់ ដោយសារខ្វះទឹកនេះ។ ដោយឡែក ឯកឧត្តមរដ្ឋលេខាធិការ និងក្រុមការងារ ក៏បានបន្តដំណើរចុះពិនិត្យនៅឃុំល្វែងឬស្សី ដែលមានព្រំប្រទល់ជាប់នឹងឃុំស្ពានត្នោត ដែលកំពុងប្រឈមនឹងបញ្ហានេះដូចគ្នា។
ករណីទឹកមិនគ្រប់គ្រាន់ខាងលើនេះ កន្លងមក មន្ទីរជំនាញ រដ្ឋបាលស្រុក និងអាជ្ញាធរឃុំ បានជូនដំណឹង ផ្សព្វផ្សាយ ណែនាំកុំឱ្យប្រជាកសិករធ្វើស្រែលើសពីលទ្ធភាពស្រោចស្រព ក៏ប៉ុន្តែ ដោយសារតម្លៃស្រូវកាលពីឆ្នាំមុនមានតម្លៃល្អនោះ បានជំរុញលើកទឹកចិត្តឱ្យពួកគាត់ធ្វើស្រែលើសពីផែនការ ដែលជាហេតុធ្វើឱ្យខ្វះទឹកស្រោចស្រពនៅពេលនេះ។ ដោយឡែក អាជ្ញាធរឃុំល្វែងឬស្សី បានចេញសេចក្តីណែនាំដល់ប្រជាកសិករឱ្យរាយការណ៍អំពីទីតាំងធ្វើស្រែ ទំហំដីដាំដុះ ពូជដែលត្រូវផលិត ដើម្បីងាយស្រួលអាជ្ញាធរ ចុះជួយអន្តរាគមន៍ពេលមានបញ្ហាកើតឡើង។
កម្មវិធីចុងក្រោយ ក្រុមការងារបានចុះពិនិត្យស្រែបង្ហាញ ដាំពូជនាងក្រអូប ចំប៉ីស៧០ និងស្រងែថ្មី នៅឃុំជីក្រែង ដែលជាពូជជាតិ ទើបនឹងបានរំដោះ មិនប្រកាន់រដូវ មានអាយុកាលខ្លី ប្រភេទអង្ករទន់ មានក្លិនក្រអូប ធន់ទៅនឹងជំងឺ និងទទួលបានទិន្នផលខ្ពស់ បើមានទឹកគ្រប់គ្រាន់ អាចដាំដុះបានបីដង ក្នុងមួយឆ្នាំ។
មុននឹងបញ្ចប់កម្មវិធីចុះពិនិត្យ ឯកឧត្តមរដ្ឋលេខាធិការ បានពន្យល់ណែនាំ ផ្សព្វផ្សាយ អំពីអត្ថប្រយោជន៍នៃការចូលរួមចងក្រងជាសហគមន៍កសិកម្មទំនើប ដល់អាជ្ញាធរភូមិ ឃុំ ស្រុក ឱ្យបានជ្រាប ដើម្បីជួយជំរុញប្រជាកសិករក្នុងមូលដ្ឋានឱ្យបានយល់ នឹងចូលរួមចងក្រងបង្កើតជាសហគមន៍កសិកម្មទំនើបនេះឡើងនាពេលឆាប់ៗខាងមុខ។ សហគមន៍កសិកម្មទំនើបនេះ អាចជួយប្រជាកសិករក្នុងការកាត់បន្ថយថ្លៃដើមផលិត រៀបចំផែនការផលិតកម្មច្បាស់លាស់ គ្រប់គ្រង ចាត់ចែង ទូទាត់ចំណាយ និងចំណូលត្រឹមត្រូវ អាចទទួលបានកម្ចីការប្រាក់ទាប និងមានទីផ្សារពិតប្រាកដ៕
