ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ខាត់ សុធី បានអញ្ជើញចូលរួមសម្របសម្រួលវគ្គបណ្តុះបណ្តាលមន្ត្រីកសិកម្មឃុំ នៅខេត្តសៀមរាប
ចេញផ្សាយ ២១ ធ្នូ ២០២៤ 2055
នៅថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤ ឯកឧត្តម ខាត់ សុធី អនុរដ្ឋលេខាធិការក្រសួងសិកម្ម រុក្ខាប្រមាញ់ និងនេសាទ បានអញ្ជើញចូលរួមសម្របសម្រួល វគ្គបណ្តុះបណ្តាលមន្ត្រីកសិកម្មឃុំ លើប្រធានបទ វិធីសាស្ត្រផ្សព្វផ្សាយ ជំនាញសម្របសម្រួល ការធ្វើកសិកម្មវៃឆ្លាតលើប្រព័ន្ធផលិតកម្មស្បៀងគិតគូរដល់អាហារូបត្ថម្ភ និងទទួលបានរបបអាហារសុខភាព ។ វគ្គបណ្តុះបណ្តាលប្រព្រឹត្តនៅខេត្តសៀមរាប ដែលគាំទ្រថវិកាដោយអង្គការហេឡេនខេល័រអន្តរជាតិប្រចាំកម្ពុជា។
វគ្គបណ្តុះបណ្តាលនេះ ធ្វើឡើងក្នុងគោលបំណង ពង្រឹងសមត្ថភាពមន្រ្តីកសិកម្មឃុំលើជំនាញចាំបាច់ ណែនាំពីគោលការណ៍ និងការគាំទ្រឆ្លើយតបទៅនឹងតម្រូវការទីផ្សារ និងលក់កសិផលទទួលបានតម្លៃសមរម្យ និងការចូលរួមចំណែកក្នុងការអនុវត្តន៍កម្មវិធីគោលនយោបាយអាទិភាពទី៥ សម្រាប់វិស័យកសិកម្មពីនាយកដ្ឋានផ្សព្វផ្សាយ។ វគ្គបណ្តុះបណ្តាលនេះក៏មានការអញ្ជើញចូលរួមពីលោកយឹម សារុំ និង លោក វង្ស កែវសុធន ទីប្រឹក្សាក្រសួងកសិកម្ម រុក្ខាប្រមាញ់ និងនេសាទ រួមជាមួយមន្ត្រីកសិកម្មឃុំសរុបចំនួន៧៣រូប ក្នុងនោះស្រ្តី២៦រូប ដែលមកពីតំបន់ទន្លេសាប។
ថ្លែងក្នុងពិធីបិទវគ្គ ឯកឧត្តមអនុរដ្ឋលេខាធិការ បានកោតសរសើរពីកិច្ចខិតខំប្រឹងប្រែងទទួលបានលទ្ធផលជាផ្លែផ្ការបស់មន្ត្រីកសិកម្មឃុំក្នុងការសហការជាមួយកសិករ រហូតទទួលបានការសាទរពីកសិករចំពោះវត្តមានរបស់មន្ត្រីកសិកម្មឃុំ។ បន្ថែមពីនេះ ឯកឧត្តមក៏បានលើកទឹកចិត្តដល់មន្ត្រីកសិកម្មឃុំទាំងអស់បន្តនូវបេសកកម្មដ៏វិសេសវិសាលនេះបន្តទៀត ដើម្បីលើកកម្ពស់វិស័យកសិកម្ម ដែលជាវិស័យអាទិភាព ទាំងក្នុងសន្តិសុខស្បៀង និងសេដ្ឋកិច្ច ក្នុងការសម្រេចបាននូវចក្ខុវិស័យដ៏ជាក់លាក់ ក្លាយជាប្រទេសមានចំណូលមធ្យមកម្រិតខ្ពស់ឆ្នាំ២០៣០ និងជាប្រទេសមានចំណូលខ្ពស់ឆ្នាំ២០៥០ នឹងត្រូវពង្រឹងវិស័យកសិកម្មឱ្យកាន់ទំនើបឡើងដើម្បីឆ្លើយតបបាននូវចក្ខុវិស័យដ៏មុតស្រួចរបស់ក្រសួងកសិកម្ម ដែលថា «មានហូប មានប្រើ មានបាន និងមានរហូត»៕
