ក្រសួងកសិកម្ម បើកវគ្គបណ្តុះបណ្តាលស្តីពី«បទដ្ឋានគតិយុត្ត នីតិវិធី និងវិធាន​បច្ចេកទេសសម្រាប់ការធ្វើអាជីវកម្មជី-ថ្នាំកសិកម្ម» នៅខេត្តត្បូងឃ្មុំ

ចេញ​ផ្សាយ​ ១៩ សីហា ២០២៦ 2753

នៅព្រឹកថ្ងៃទី១៩ ខែសីហា ឆ្នាំ២០២៦ ឯកឧត្តម ឡោ រស្មី អនុរដ្ឋលេខាធិការ ក្រសួង​កសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គ​បណ្តុះបណ្តាលស្តីពី «បទដ្ឋានគតិយុត្ត នីតិវិធី និងវិធានបច្ចេកទេសសម្រាប់ការ​ធ្វើអាជីវកម្មជី-ថ្នាំកសិកម្ម» នៅខេត្តត្បូងឃ្មុំ ដោយមានការចូលរួមពីថ្នាក់ដឹកនាំ​រដ្ឋបាលខេត្ត មន្ត្រីជំនាញនៃអគ្គនាយកដ្ឋានក្សេត្រសាស្ត្រ មន្ទីរកសិកម្ម រុក្ខាប្រមាញ់ និងនេសាទខេត្ត និងសិក្ខាកាមចូលរួមសរុបប្រមាណ ១៧០នាក់។
វគ្គបណ្តុះបណ្តាលនេះ មានគោលបំណងពង្រឹងការយល់ដឹងរបស់អាជីវករ និង​ប្រជាកសិករ អំពីការគ្រប់គ្រង និងការប្រើប្រាស់ជី និងថ្នាំកសិកម្មឱ្យបាន​ត្រឹមត្រូវ ប្រកបដោយប្រសិទ្ធភាព សុវត្ថិភាព និងមិនប៉ះពាល់ដល់សុខភាពមនុស្ស និងបរិស្ថាន។ ជំរុញឱ្យមានការលក់ និងប្រើប្រាស់តែផលិតផលដែលមាន​គុណភាព ស្របច្បាប់ និងបានចុះបញ្ជិកាត្រឹមត្រូវ ព្រមទាំងទប់ស្កាត់ការលក់ និងផ្សព្វផ្សាយផលិតផលខុសច្បាប់តាមបណ្តាញសង្គម។ ជាមួយគ្នានេះ ពង្រឹង​កិច្ចសហការរវាងអាជីវករ ប្រជាកសិករ មន្ត្រីជំនាញ និងមន្ត្រីកសិកម្មឃុំ ក្នុងការ​អនុវត្ត​ច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម ដើម្បីធានាគុណភាព​ផលិតកម្មកសិកម្ម សុវត្ថិភាពអ្នកប្រើប្រាស់។
ក្នុងឱកាសនោះ ឯកឧត្តមបានលើកឡើងអំពីគោលនយោបាយអាទិភាពទី៥ និងទី៦ របស់រាជរដ្ឋាភិបាលនីតិកាលទី៧នៃរដ្ឋសភា ដែលគាំទ្រដល់​វិស័យ​កសិកម្ម តាមរយៈការរក្សាលំនឹងថ្លៃកសិផល ការស្វែងរកទីផ្សារ ការដាក់​ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប។ ឯកឧត្តមក៏បានរំលេចពីទិសដៅ និងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ក្រោមការដឹកនាំរបស់ឯកឧត្តមរដ្ឋមន្ត្រី ឌិត ទីណា គឺ «មានហូប មានប្រើ មានបាន និងមានរហូត» ដែលផ្តោតលើការជំរុញ​ផលិតកម្ម​កសិកម្ម ការធានាសន្តិសុខស្បៀង ការបង្កើនតម្លៃបន្ថែម និងការធ្វើឱ្យវិស័យ​កសិកម្មមានភាពរឹងមាំ និងមានចីរភាព។ ក្នុងនោះ ក្រសួងក៏បានខិតខំជំរុញ និងគាំទ្រវិស័យឯកជនឱ្យចូលរួមផលិតជីក្នុងស្រុក ដើម្បីបង្កើនសមត្ថភា​ព​ផ្គត់ផ្គង់ និងរួមចំណែកកាត់បន្ថយការពឹងផ្អែកលើការនាំចូល។
ជាចុងក្រោយ ឯកឧត្តម ឡោ រស្មី បានផ្តាំផ្ញើដល់សិក្ខាកាមទាំងអស់ ក្នុងនាមជា​ដៃគូរបស់ក្រសួង ត្រូវយកចិត្តទុកដាក់ចូលរួមក្នុងវគ្គបណ្តុះបណ្តាល​ឱ្យបានពេញ​លេញ និងអនុវត្តចំណេះដឹងដែលទទួលបានទៅក្នុងការប្រកបអាជីវកម្ម​ប្រកប​ដោយ​វិជ្ជាជីវៈ សុចរិតភាព និងការទទួលខុសត្រូវ។ សិក្ខាកាមត្រូវខិតខំបំពេញ​តាម​កម្មវិធី​បណ្តុះបណ្តាលដែលបានកំណត់ ដើម្បីទទួលបានវិញ្ញាបនបត្រដោយ​ឈរ​លើគោលការណ៍សមធម៌ តម្លាភាព និងមនសិការវិជ្ជាជីវៈ ដោយអនុលោម​ស្រប​តាម​មាត្រា៨៥ នៃច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម។
សម្រាប់​ការទទួលបានព័ត៌មានបច្ចេកទេសកសិកម្ម ឬការផ្តល់ប្រឹក្សាដល់កសិករ ប្រជាពលរដ្ឋ និងអ្នកពាក់ព័ន្ធ អាចទំនាក់ទំនងតាមរយៈលេខ ១២៨៩ ដែលជាសេវាផ្តល់ព័ត៌មានដោយឥតគិតថ្លៃ៕