ព័ត៌មានផ្សេងៗទៀត
ឯកឧត្តមរដ្ឋលេខាធិការប្រចាំការ អ៊ឹម ស៊ីថុល អញ្ជើញជាអធិបតីភាពក្នុងពិធីបិទកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៥ និងលើកទិសដៅការងារឆ្នាំ២០២៦
ចេញផ្សាយ ៥ កុម្ភៈ ២០២៦ 1588
នារសៀលថ្ងៃទី៥ ខែកុម្ភៈ ឆ្នាំ២០២៦ ឯកឧត្តមរដ្ឋលេខាធិការប្រចាំការ អ៊ឹម ស៊ីថុល តំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបិទកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៥ និងលើកទិសដៅការងារឆ្នាំ២០២៦ នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។
ថ្លែងក្នុងពិធីបិទ ឯកឧត្តមរដ្ឋលេខាធិការប្រចាំការ បានកោតសរសើរ និងអបអរសាទរចំពោះកិច្ចខិតខំប្រឹងប្រែងយ៉ាងសកម្ម និងពុះពារគ្រប់ឧបសគ្គរបស់ថ្នាក់ដឹកនាំ និងមន្រ្តីរាជការទាំងអស់ ក្នុងការបំពេញភារកិច្ចប្រកបដោយស្មារតីទទួលខុសត្រូវខ្ពស់ រហូតសម្រេចបាននូវសមិទ្ធផលផ្លែផ្កាដ៏ល្អប្រសើរយ៉ាងច្រើនគួរឱ្យកត់សម្គាល់។
ជាមួយគ្នានេះ ឯកឧត្តមរដ្ឋលេខាធិការប្រចាំការ បានគូសបញ្ជាក់អំពីគោលនយោបាយវិស័យកសិកម្ម ក្នុងការធានាសន្តិសុខស្បៀង ប្រកបដោយនិរន្តរភាពសេដ្ឋកិច្ច និងបរិស្ថាន ពោលគឺ «មានហូប មានប្រើ មានបាន និងមានរហូត»។ ក្នុងនោះ ក្រសួងកសិកម្ម រុក្ខាប្រមាញ់ និងនេសាទ បានកំណត់សកម្មភាពយុទ្ធសាស្រ្តគាំទ្រការកសាងសហគមន៍កសិកម្មទំនើប ការរក្សាលំនឹងថ្លៃកសិផលសំខាន់ៗ ការពង្រឹងខ្សែច្រវាក់ផលិតកម្មសក្តានុពល ការផ្តល់សេវាគាំទ្របច្ចេកទេស ជំរុញកំណើនសេដ្ឋកិច្ចជាតិ និងការគ្រប់គ្រងធនធានធម្មជាតិកសិកម្មប្រកបដោយចីរភាព។
ក្នុងនាមឯកឧត្តមរដ្ឋមន្រ្តី ឌិត ទីណា ឯកឧត្តមរដ្ឋលេខាធិការប្រចាំការ បានផ្តល់អនុសាសន៍ណែនាំដល់អង្គពិធីត្រូវ រៀបចំផែនការសកម្មភាពអាទិភាពស្របតាមថវិកាសមិទ្ធកម្ម អភិវឌ្ឍប្រភេទពូជដំណាំឆ្លើយតបតាមតម្រូវការទីផ្សារ ផ្តល់សេវាគាំទ្របច្ចេកទេសគ្រប់ភាគីពាក់ព័ន្ធ លើកកម្ពស់គុណភាព សុវត្ថិភាព ភូតគាមអនាម័យ និងកិច្ចសម្រួលពាណិជ្ជកម្មកសិផល ជំរុញការគ្រប់គ្រងនិងប្រើប្រាស់ធាតុចូលកសិកម្ម ធនធានដីកសិកម្ម ពង្រីកការផ្សព្វផ្សាយឱ្យទូលំទូលាយ និងការរៀបចំពង្រឹងច្បាប់បទដ្ឋានពាក់ព័ន្ធនានា សំដៅជំរុញការអភិវឌ្ឍអនុវិស័យដំណាំកាន់តែរីកចម្រើន មាននិរន្តរភាព និងប្រសិទ្ធភាពសេដ្ឋកិច្ច។
ជាទីបញ្ចប់ ឯកឧត្តមរដ្ឋលេខាធិការប្រចាំការ មានទំនុកចិត្តយ៉ាងមុតមាំថា អគ្គនាយកដ្ឋានកសិកម្ម នឹងបន្តកិច្ចខិតខំប្រឹងប្រែងអនុវត្តការងារប្រកបដោយស្មារតីទទួលខុសត្រូវខ្ពស់ ដើម្បីសម្រេចបានសមិទ្ធផលការងារធំធេងថ្មីៗ ក្នុងទិសដៅចូលរួមបង្កើនល្បឿននៃការអភិវឌ្ឍវិស័យកសិកម្មកម្ពុជា ស្របតាមកម្មវិធីគោលនយោបាយរបស់រាជរដ្ឋាភិបាល ដើម្បីរួមចំណែកលើកកម្ពស់ជីវភាពប្រជាជន និងជំរុញកំណើនសេដ្ឋកិច្ចជាតិ៕
