ព័ត៌មានផ្សេងៗទៀត
លោកប្រធាននាយកដ្ឋានចូលរួមកម្មវិធីសន្និបាតលទ្ធផលដាំដំណាំកសិ-ឧស្សហកម្ម (ដាំកៅស៊ូ) របស់ក្រុមហ៊ុនសមាជិក VGR និងបណ្តាក្រុមហ៊ុនវិនិយោគផ្សេងៗទៀតរបស់វៀតណាមនៅកម្ពុជា
ចេញផ្សាយ ០៤ មីនា ២០១៩ 11473
ភ្នំពេញ៖ នារសៀលថ្ងៃព្រហស្បតិ៍ ៩រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែកុម្ភៈ ឆ្នាំ ២០១៩ ក្រសួងកសិកម្ម រុក្ខាប្រមាញ់ និងនេសាទបានរៀបចំកម្មវិធីសន្និបាតលទ្ធផលដាំដំណាំកសិ-ឧស្សហកម្ម (ដាំកៅស៊ូ) របស់ក្រុមហ៊ុនសមាជិក VGR និងបណ្តាក្រុមហ៊ុនវិនិយោគផ្សេងៗទៀតរបស់វៀតណាមនៅកម្ពុជា ក្រោមអធិបតិភាពដ៏ខ្ពង់ខ្ពស់ ឯកឧត្តម យឹម ឆៃលី ឧបនាយករដ្ឋមន្រ្តី និងជាប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្ម និងជនបទ និងឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម Vu Quang Minh ឯកអគ្គរដ្ឋទូតវិសាមញ្ញា និងពេញសមត្ថភាពនៃសាធារណៈរដ្ឋសង្គមនិយមវៀតណាមប្រចាំព្រះរាជាណាចក្រកម្ពុជា អមដោយឯកឧត្តមអនុប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្ម និងជនបទ ឯកឧត្តមលោកជំទាវជាថ្នាក់ដឹកនាំក្រសួង ឯកឧត្តមរដ្ឋលេខាធិការតំណាងក្រសួងយុត្តិធម៌ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងរៀបចំដែនដី នគរូបនីយកម្ម និងសំណង់ តំណាងក្រសួងពាណិជ្ជកម្ម ក្រសួងបរិស្ថាន តំណាងក្រសួងការងារ និងបណ្តុះបណ្តាលវិជ្ជាជីវៈ តំណាងអគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានពន្ធដារ ឯកឧត្តមប្រតិភូរាជរដ្ឋាភិបាលកម្ពុជា តំណាងសភាពាណិជ្ជកម្មកម្ពុជា តំណាងឯកឧត្តមគណៈអភិបាលរាជខេត្តពាក់ព័ន្ធទាំង៧រួមមាន៖ ឧត្តរមានជ័យ ព្រះវិហារ កំពង់ធំ ក្រចេះ មណ្ឌលគិរី រតនគិរី និងខេត្តសៀមរាប ឯកឧត្តម លោក លោកស្រី ប្រធានគ្រប់អង្គភាពក្រោមឱវាទក្រសួង តំណាងក្រុមហ៊ុនវិនិយោគវៀតណាម និងបណ្តាក្រុមហ៊ុនជាសមាជិក VGR និងមន្ទីរកសិកម្ម រុក្ខាប្រមាញ់ និងនេសាទខេត្តពាក់ព័ន្ធ ព្រមទាំងមន្រ្តីរាជការក្រោមឱវាទក្រសួង នៅទីស្តីការក្រសួងកសិកម្ម រុក្ខាប្រមាញ់ និងនេសាទ សាលសែនពិដោរនៃអគារផ្ការំដួល ប្រមាណ៥០០នាក់។
គោលបំណងសំខាន់ៗរបស់អង្គសន្និបាតនេះគឺ៖
ទី១- ធ្វើការវាយតម្លៃលើវឌ្ឍនភាពនៃដំណាំកៅស៊ូដែលបានដាំដុះលើដីសម្បទានសេដ្ឋកិច្ចដោយក្រុមហ៊ុនដែលជាសមាជិកសម្ព័ន្ធកៅស៊ូវៀតណាម។
ទី២- ពិនិត្យតាមដានលើផែនការអនុវត្តរបស់ក្រុមហ៊ុននីមួយៗ ផ្លាស់ប្តូរ និងចែករំលែកបទពិសោធន៍ល្អៗចំណុចខ្លាំង ចំណុចខ្សោយ និងយន្តការដោះស្រាយទំនាស់ បញ្ហាប្រឈម និងឧបសគ្គនានាដែលបាននិងកំពុងជួបប្រទះ ដើម្បីអភិវឌ្ឍអនុវិស័យកៅស៊ូឱ្យកាន់តែមានភាពរីកចម្រើន។
ទី៣- កំណត់ទិសដៅ និងវិធានការអនុវត្តបន្តដើម្បីទទួលបានលទ្ធផលល្អប្រសើរ មានប្រសិទ្ធភាព ប្រសិទ្ធផលសមស្របតាមគោលនយោបាយ និងយុទ្ធសាស្រ្តចតុកោណតំណាក់ទី៤ របស់រាជរដ្ឋាភិបាលកម្ពុជា និងគោលនយោបាយ និងផែនការអភិវឌ្ឍវិស័យកសិកម្មឆ្នាំ២០១៩-២០២៣ របស់ក្រសួងកសិកម្ម រុក្ខាប្រមាញ់ និងនេសាទ។
