ព័ត៌មានផ្សេងៗទៀត
ឯកឧត្តមរដ្ឋលេខាធិការ ម៉ាន សុគ្រី អញ្ជើញដឹកនាំក្រុមការងារចម្រុះចុះសិក្សា និងពិនិត្យស្ថានភាពផលិតកម្មដំណាំស្រូវ ក្នុងភូមិសាស្រ្តខេត្តកំពង់ធំ
ចេញផ្សាយ ២០ មករា ២០២៥ 2183
នៅថ្ងៃទី១៩ ខែមករា ឆ្នាំ២០២៥ ឯកឧត្តម ម៉ាន សុគ្រី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណេីរដោយឯកឧត្តម អេង ជាសាន អនុរដ្ឋលេខាធិការ លោក ព្រឹម រដ្ឋា អភិបាលរងខេត្តកំពង់ធំ លោកប្រធានមន្ទីរកសិកម្មខេត្ត និងមន្រ្តីការិយាល័យជំនាញ បានអញ្ជើញចុះសិក្សា និងពិនិត្យស្ថានភាពផលិតកម្មដំណាំស្រូវ ក្នុងភូមិសាស្រ្តខេត្តកំពង់ធំ។
នាឱកាសនេះ ឯកឧត្តមរដ្ឋលេខាធិការ បានជួបសំណេះសំណាលជាមួយប្រជាកសិករ និងម្ចាស់រោងម៉ាស៊ីនកិនស្រូវមួយចំនួនដូចជា ទី១ រោងម៉ាស៊ីន១៦៨៨ មានលទ្ធភាពទទួលទិញស្រូវអូអឹម ៥៤៥១ ថ្លៃ៨០០-៨២០រៀល/គីឡូក្រាម អាចសម្ងួតបាន ៥០០តោន/ថ្ងៃ និងមានឃ្លាំងស្តុកទុកបានចំនួន ១២ ០០០តោន។ ទី២ រោងម៉ាស៊ីនកិនស្រូវ ងួន ហុង មានលទ្ធភាពទទួលទិញស្រូវអូអឹម ៥៤៥១ ថ្លៃ៨០០រៀល/គីឡូក្រាម អាចសម្ងួតបាន ៥០០ តោន/ថ្ងៃ និងមានឃ្លាំងស្តុកទុកបានចំនួន ២មុឺនតោន ។ ទី៣ រោងម៉ាស៊ីនកិនស្រូវ Amru Rice មានលទ្ធភាពទទួលទិញស្រូវអូអឹម ៥៤៥១ ថ្លៃ៨២០រៀល/គីឡូក្រាម អាចសម្ងួតបាន ៥០០ តោន/ថ្ងៃ និងមានឃ្លាំងស្តុកទុកបានចំនួន ២ម៉ឺនតោន និងទី៤ រោងម៉ាស៊ីន BRM មានលទ្ធភាពទទួលទិញស្រូវអូអឹម ៥៤៥១ ចំនួន ៨៣០រៀល/គីឡូក្រាម អាចសម្ងួតបាន ៥៥០ តោន/ថ្ងៃ និងមានឃ្លាំងស្តុកទុកបានចំនួន២ម៉ឺនតោន។
ជាមួយគ្នានេះ ឯកឧត្តមរដ្ឋលេខាធិការ បានបន្តជួបសំណេះសំណាលដេីម្បីស្វែងយល់ពីការលំបាករបស់កសិករ និងអ្នកជួលដីសម្រាប់ធ្វេីស្រែព្រមទាំងបានសំណូមពរដល់ម្ចាស់ដីមានការយោគយល់កសិករដែលបានជួលដីខ្លួន អាចឱ្យពួកគាត់អាចមានលទ្ធភាពបន្តផលិតនៅតាមរដូវ ឬឆ្នាំក្រោយទៀត ដើម្បីបញ្ចៀសនូវបញ្ហាប្រឈមផ្សេងៗរបស់កសិករ។
ជាទីបញ្ចប់ ឯកឧត្តមរដ្ឋលេខាធិការ បានគូសបញ្ជាក់ថា ប្រជាពលរដ្ឋភាគច្រើនធ្វើស្រែប្រាំងពីរដង/ឆ្នាំ ដោយប្រើពូជនាំចូលពីបរទេស ហើយស្ថានភាពតម្លៃនៅឆ្នាំនេះមានការធ្លាក់ចុះ ធ្វើឱ្យប្រជាកសិករមានការខកចិត្តជាខ្លាំង។ ជាមួយគ្នានោះដែរ ឯកឧត្តមរដ្ឋលេខាធិការ បានសំណូមពរឱ្យរោងម៉ាស៊ីនទាំងអស់ ជួយអន្តរាគមន៍ទិញស្រូវពីកសិករ និងសូមឱ្យមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ខិតខំជួយជំរុញក្នុងការរៀបចំជាសហគមន៍កសិកម្មទំនើបដេីម្បីផ្តល់ផលចំនេញដល់ប្រជាកសិករ៕
