ឯកឧត្តមរដ្ឋលេខាធិការ ម៉ាន សុគ្រី អញ្ជើញដឹកនាំក្រុមការងារជំនាញពាក់ព័ន្ធ ចុះពិនិត្យការងារផលិតកម្មសត្វចតុប្បាទធំ ក្នុងខេត្តកំពង់ធំ

ចេញ​ផ្សាយ​ ១៣ ឧសភា ២០២៦ 588

នៅថ្ងៃទី១៣ ខែឧសភា ឆ្នាំ២០២៦ ឯកឧត្តម ម៉ាន សុគ្រី រដ្ឋលេខាធិការ និង​ឯកឧត្តម ឃី វិបុលបុត្រា អនុរដ្ឋលេខាធិការក្រសួងកសិកម្ម រុក្ខាប្រមាញ់ និង​នេសាទ អមដោយមន្រ្តីជំនាញនៃអគ្គនាយកដ្ឋានសុខភាពសត្វ និងផលិតកម្ម ថ្នាក់ដឹកនាំមន្ទីរ លោកប្រធានការិយាល័យផលិតកម្ម និងបសុព្យាបាលនៃ​មន្ទីរ​កសិកម្ម រុក្ខាប្រមាញ់ និងនេសាទខេត្តកំពង់ធំ បានចុះពិនិត្យការងារសត្តឃាត​ដ្ឋានគោ-ក្របី ស្ថិតក្នុងភូមិត្រល់ ឃុំបល្ល័ង ស្រុកបារាយណ៍ ដើម្បីវាយតម្លៃលើការ​អនុវត្តអនុក្រឹត្យលេខ ១០៨ ស្តីពី «ការគ្រប់គ្រងសត្តឃាតដ្ឋាន អនាម័យសត្វ និង​សាច់ និងកសិដ្ឋានចិញ្ចឹមគោយកសាច់»។
នាដំណើរបេសកកម្ម តាមការពិនិត្យទីតាំងជាក់ស្តែងឃើញថា ការធ្វើអនាម័យ​មិន​ទាន់បានអនុវត្តតាមបច្ចេកទេសត្រឹមត្រូវនៅឡើយ ដូចជា៖ ការប្រើប្រាស់ទឹក ឧបករណ៍សម្រាប់ព្យួរសាច់ ការសម្អាតបរិវេណជុំវិញ ។ ក្រុមការងារបាន​ណែនាំ​ឱ្យម្ចាស់សត្តឃាតដ្ឋាន កែលម្អចំណុចខ្វះខាតទាក់ទងអនាម័យ បទបញ្ជាផ្ទៃក្នុង​សត្តឃាតដ្ឋាន ឧបករណ៍ប្រើប្រាស់ និងបរិស្ថានជុំវិញ។ កិច្ចការនេះបានប្រគល់​ឱ្យទៅអគ្គនាយកដ្ឋានជំនាញ សហការជាមួយការិយាល័យជំនាញនៃ​មន្ទីរ​កសិកម្ម​ខេត្តកំពង់ធំ ដើម្បីធានាឱ្យម្ចាស់សត្តឃាតដ្ឋានអនុវត្តឱ្យបានត្រឹមត្រូវ តាម​បទដ្ឋាន​បច្ចេកទេសជាធរមាន។
ទន្ទឹមនឹងនោះ ឯកឧត្តមក៏បានជួបប្រជុំ ក្រើនរំលឹកការងារសំខាន់ៗមួយ​ចំនួនដល់​ថ្នាក់ដឹកនាំ និងមន្ត្រីរាជការនៃមន្ទីកសិកម្មខេត្តកំពង់ធំ និងមន្ត្រីកសិកម្មឃុំ-សង្កាត់ មាន​ដូចជា ៖ ការបង្ការគ្រោះមហន្តរាយអាចកើតឡើង ជំងឺឆ្លងសត្វ សត្វល្អិត​ចង្រៃ​បំផ្លាញដំណាំ តម្លៃកសិផលដូចជាដំឡូងមី គ្រាប់ស្វាយចន្ទី ការប្រមូល​ទិន្នន័យ និងរាយការណ៍។ 
បន្ថែមពីនេះឯកឧត្តម ម៉ាន សុគ្រី បានណែនាំមន្ត្រីឃុំ-សង្កាត់ខិតខំសិក្សារៀន​សូត្រ​បន្ថែម ដើម្បីបង្កើនសមត្ថភាពការងារ។ មន្រ្តីនីតិកម្ម និងមន្រ្តីផលិតកម្ម និងបសុព្យាបាល ត្រូវបង្កើនស្មារតីទទួលខុសត្រូវបំពេញភារកិច្ចជាមន្រ្តីអធិការ​កិច្ច ចុះពិនិត្យដេប៉ូជី-ថ្នាំកសិកម្ម សត្តឃាតដ្ឋាន និងកសិដ្ឋានចិញ្ចឹមសត្វ។ ពង្រឹង​សាមគ្គី​ភាពផ្ទៃក្នុង គោរពឱ្យបាននូវលក្ខន្តិកៈមន្រ្តីរាជការស៊ីវិល និងបន្តអនុវត្ត​គោល​នយោបាយអភិវឌ្ឍវិស័យកសិកម្ម និងយុទ្ធសាស្រ្តបញ្ចកោណ ដំណាក់​កាល​ទី១ របស់រាជរដ្ឋាភិបាល ដើម្បីអភិវឌ្ឍមូលដ្ឋាន និងអភិវឌ្ឍ​សង្គមជាតិ​ជាដើម៕