ពិធីប្រគល់វិញ្ញាបនបត្របញ្ជាក់ ការចុះបញ្ជីសហភាពសហគមន៍កសិកម្មបន្លែសុវត្ថិភាពបៃតងចម្រុះខេត្តកណ្តាល និងពិធីចុះកិច្ចសន្យាផលិតកម្មកសិកម្មលើដំណាំបន្លែស្តង់ដារសុវត្ថិភាព រវាងសហភាព និងក្រុមហ៊ុន CSDS និងGOF

ចេញ​ផ្សាយ​ ១៣ កក្កដា ២០២២ 14318

នាព្រឹកថ្ងៃពុធ ១៥កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែកក្កដា ឆ្នាំ២០២២ លោក ហង់ សុវណ្ណ អនុប្រធាននាយកដ្ឋានកសិ-ឧស្សាហកម្ម បានចូលរួមជាគណៈអធិបតីក្នុងពិធីប្រគល់វិញ្ញាបនបត្របញ្ជាក់ ការចុះបញ្ជីសហភាពសហគមន៍កសិកម្មបន្លែសុវត្ថិភាពបៃតងចម្រុះខេត្តកណ្តាល និងពិធីចុះកិច្ចសន្យាផលិតកម្មកសិកម្មលើដំណាំបន្លែស្តង់ដារសុវត្ថិភាព រវាងសហភាព និងក្រុមហ៊ុន CSDS និងGOF ក្រោមអធិបតីភាព ឯកឧត្តម តាំង ម៉េងលាន អភិបាលរងខេត្តកណ្ដាល និងលោក ស្រុន សុខុម អគ្គនាយករង នៃអគ្គនាយកដ្ឋានកសិកម្ម និងជានាយកកម្មវិធីការគ្រប់គ្រងធនធានទឹក និងការផ្លាស់ប្តូរវិស័យកសិកម្មសម្រាប់ប្រទេសកម្ពុជាដំណាក់កាលទី១ នៅមជ្ឍមណ្ឌលត្រួតពិនិត្យគុណភាពបន្លែសុវត្ថិភាព នៃមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល។ ក្នុងពិធីនេះមានការអញ្ជើញចូលរួមពីអគ្គនាយកដ្ឋានកសិកម្ម គណៈអភិបាលខេត្តកណ្តាល ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល ប្រធានមន្ទីរពាណិជ្ជកម្មខេត្តកណ្តាល ការិយាល័យកសិ-ឧស្សាហកម្ម និងការិយាល័អភិវឌ្ឍន៍សហគមន៍ អង្គភាពគ្រប់គ្រងកម្មវិធីWAT4CAM តំណាងភ្នាក់ងារបារាំងសម្រាប់ការអភិវឌ្ឍន៍និងសហគមន៍អឺរ៉ុបប្រចាំកម្ពុជា អភិបាលស្រុកស្អាង កោះធំ និងលើកដែក សហភាពសហគមន៍កសិកម្មបន្លែសុវត្ថិភាពបៃតងចម្រុះខេត្តកណ្តាល តំណាងសហគមន៍កសិកម្មទាំង១១ តំណាងក្រុមហ៊ុនCSDS និងNOF និងអង្គការក្រៅរដ្ឋាភិបាល។

គួរបញ្ជាក់ផងដែរថា សហភាពសហគមន៍កសិកម្មបន្លែសុវត្ថិភាពបៃតងចម្រុះខេត្តកណ្តាល ត្រូវបានបង្កើតឡើងនៅថ្ងៃទី១១ ខែមីនា ឆ្នាំ២០២២ ដែលមានសហគមន៍ចំនួន ១១ក្នុងខេត្តកណ្តាល និងក្រុមហ៊ុនឯកជនដែលមានអាជីវកម្មលើដំណាំបន្លែនិងផ្លែឈើ ចំនួន ០២ចូលរួមជាសមាជិក។ដោយបានការសម្របសម្រួល និងគាំទ្រពីកម្មវិធីការគ្រប់គ្រងធនធានទឹក និងការផ្លាស់ប្តូរវិស័យកសិកម្មសម្រាប់ប្រទេសកម្ពុជាដំណាក់កាលទី១ ក្រុមហ៊ុនខេមបូឌាស្តេនដាតឌីវីឡុបមែនអែនសិបផ្លាយឯ.ក(CSDS) និងផ្សារកសិដ្ឋានធម្មជាតិ(GOF) និងសហភាពសហគមន៍កសិកម្មបន្លែសុវត្ថិភាពបៃតងចម្រុះខេត្តកណ្តាល បានចុះកិច្ចសន្យាផលិតកម្មកសិកម្មលើដំណាំបន្លែ ដើម្បីផលិត និងផ្គត់ផ្គង់បន្លែស្តង់ដារសុវត្ថិភាពក្នុងបរិមាណចន្លោះពី១,៥តោន ទៅ ៣តោន ក្នុង១ថ្ងៃ។

ពិធីចុះកិច្ចសន្យាផលិតកម្មកសិកម្មនេះនឹងចូលរួមចំណែកគាំទ្រ និងពង្រឹងលទ្ធភាពផលិតកម្ម និងរក្សាលំនឹងទីផ្សារសម្រាប់កសិករតាមរយៈភាពជាដៃគូរវាងអ្នកផលិត វិស័យឯកជន និងសាធារណៈ ក្នុងគោលបំណងដើម្បីជំរុញ និងធានាបាននូវការផលិត និងផ្គត់ផ្គង់ទីផ្សារបន្លែ។